រាជធានីភ្នំពេញ ៖ រថយន្តម៉ាកតូយ៉ូតាព្រូស ១គ្រឿង ខណៈកំពុងបើបរលឿន ពុំដឹងថា អ្នកបើកបរស្រវឹងស្រា ឬងងុយដេកនោះទេ ស្រាប់តែរេចង្កូតជ្រុលទៅបុកម៉ូតូសណ្ដោងរ៉ឺម៉ក ដឹកអេតចាយ ១គ្រឿង ពេញទំហឹង បណ្ដាលឲ្យប៉ើងខ្ទាតបុរស ដែលជាអ្នកបើកបរម៉ូតូសណ្ដោងរ៉ឺម៉ក រួមជាមួយប្រពន្ធ និងកូន២នាក់ ធ្លាក់ចូលស្រែ រងរបួសធ្ងន់ និងស្រាល។ ចំណែករ៉ឺម៉ក រងការខូចខាតខ្ទេចទាំងស្រុងប្រើការលែងកើត ហើយរថយន្តខ្ទេចមុខមួយចំហៀង បន្ទាប់មក អ្នកបើកបររថយន្តចេញសំណងជាប្រាក់ចំនួន៦០ម៉ឺនរៀលបញ្ចប់រឿង ។
ឧប្បត្តិហេតុនេះ បានកើតឡើងកាលពីវេលាម៉ោង១២ និង៣៥នាទីរសៀលថ្ងៃទី១៦ ខែតុលា ឆ្នាំ២០២៤ នៅតាមផ្លូវបែកចាន-ភ្នំប្រសិទ្ធ ស្ថិតនៅក្នុងភូមិអំពិល សង្កាត់កំបូល ខណ្ឌកំបូល រាជធានីភ្នំពេញ ។
តាមប្រភពពីកន្លែងកើតហេតុ បានប្រាប់ឲ្យដឹងថា នៅមុនពេលកើតហេតុ មានរថយន្ត១គ្រឿង ម៉ាកតូយ៉ូតាព្រូស ពណ៍ប្រផេះ ពាក់ស្លាកលេខភ្នំពេញ បើកបរធ្វើដំណើរក្នុងទិសដៅពីត្បូងទៅជើង ក្នុងល្បឿនលឿនគួរសមដែរ ។ ខណៈពេលទៅដល់ត្រង់ចំណុចកើតហេតុ កំពុងបើកសុខៗ ស្រាប់តែរេចង្កូតជ្រុលទៅបុកម៉ូតូសណ្ដោងរ៉ឺម៉ក ដឹកអេតចាយ ១គ្រឿង ជិះគ្នា៤នាក់ ពេញទំហឹង ក្នុងពេល ដែលកំពុងបើកបរបញ្ច្រាស់ទិសគ្នា ។
ប្រភពដដែល បានបញ្ជាក់ប្រាប់ឲ្យដឹងបន្តទៀតថា ពេលនោះពុំដឹងថា អ្នកបើកបររថយន្តនេះស្រវឹងស្រា ឬងងុយដេកនោះឡើយ ហើយបានបណ្ដាលឲ្យបុរស ដែលជាអ្នកបើកបររ៉ឺម៉ក និងប្រពន្ធរួមទាំងកូន២នាក់ទៀត ប៉ើងខ្ទាតធ្លាក់ចូលក្នុងស្រែ រងរបួសធ្ងន់ និងស្រាល។ ចំណែករថយន្តបានកិនរ៉ឺម៉ក រងការការខូចខាតខ្ទេចទាំងស្រុង ប្រើការលែងកើតតែម្ដង ហើយរថយន្តនោះ ក៏បានរងការខូចខាតខ្ទេចមុខមួយចំហៀងខាងឆ្វេងផងដែរ ។
ក្រោយពេលកើតហេតុ នគរបាលខណ្ឌកំបូល បានចុះទៅបាញ់ថ្នាំវាស់វែង បន្ទាប់មកម្ចាស់រថយន្តបង្ក បានចេញសំណងជាប្រាក់ចំនួន៦០ម៉ឺនរៀល ជូនដល់ភាគីរងគ្រោះ ដើម្បីបញ្ចប់រឿងនៅនឹងកន្លែងនោះតែម្ដង ៕
ចែករំលែកព័តមាននេះ