រាជធានីភ្នំពេញ ៖ មនុស្ស១ក្រុមនិងនារីៗ នាំគ្នាផឹកស៊ីចាក់ធុងបាស់ លុះពេលអ្នកជិតខាងប្រាប់អោយបន្ថយសំឡេង ក៏ខឹងឌឺដងពាក្យសំដីដាក់គ្នាទៅវិញទៅមក ហើយត្រូវគេស្រែកហៅអាខ្ទើយ ក៏ឈានដល់ប្រើអំពើហិង្សាទៅវិញទៅមក បណ្តាលអោយរងរបួសស្រាលរៀងៗខ្លួន ។
ក្រោយមក នគរបាលប៉ុស្តិ៍ចុះមកសំរបសំរួលអោយចូលផ្ទះរៀងៗខ្លួន ដែលបង្កអោយមានការភ្ញាក់ផ្អើល កាលពីវេលាម៉ោង១១និង៣០នាទីយប់ថ្ងៃទី១៤ ខែតុលា ឆ្នាំ២០២៤ នៅតាមបណ្ដោយផ្លូវវត្តអង្គតា មិញ ក្នុងភូមិត្រពាំងថ្លឹង១ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។
តាមប្រភពពីបងប្អូនប្រជាពលរដ្ឋបាននិយាយប្រាប់ថា នៅមុនពេលកើតហេតុ មានការផឹកស៊ីនៅកន្លែងកើតហេតុ ដោយមានគ្នាប្រមាណ៦នាក់ ក្នុងនោះមានភេទទី៣ចំនួន៣នាក់ និងមានស្រី៣នាក់ផងដែរ ហើយមានអ្នកជិតខាងទល់មុខផ្ទះផឹកស៊ីនោះបានមកប្រាប់ អោយបន្ថយសំឡេងបន្តិចទៅ នៅពេលនោះក្រុមអ្នកផឹកស៊ីខាងលើមិនព្រមស្តាប់ បែរជា យកធុងបាស់មកដាក់កណ្តាលផ្លូវហើយនិយាយប្រាប់ថា ពួកយើងចាក់ធុងបាស់ត្រង់នឹង មិនចាក់ដល់ដីគាត់ណា ហើយណាមួយមិនទាន់ដល់ម៉ោង១២អធ្រាត្រនៅឡើយ ។
ប្រភពព័ត៌មានដដែលបានបន្តទៀតថា បន្ទាប់មក ភាគីអ្នកជិតខាងទល់មុខផ្ទះខាងលើ មាននារីម្នាក់បាននិយាយថា យ៉ាប់ណាស់ពួកអាខ្ទើយ និយាយមិនចេះស្តាប់គ្នាសោះ ចំណែកខាងភាគីភេទទី៣លឺសំឡេងគេថា អោយបានខឹងសម្បាឌឺដងពាក្យសំដីដាក់គ្នាទៅវិញទៅមក ដល់ថ្នាក់ប្រើអំពើហិង្សាទៅវិញទៅមកខ្លះទាញដំបងមកវាយ និងខ្លះទៀតយកកៅអី ខ្លះទាញដងឆ័ត្រ បណ្តាលឲ្យរងរបួសស្រាល២ទៅ៣នាក់ទាំងសង្ខាង ។
ក្រោយពេលកើតហេតុ ភាគីទាំងសងខាងត្រូវបានកំលាំងនគរបាលប៉ុស្តិ៍បានមកជួយអន្តរាគមន៍ឃាត់បំបែកគ្នាភ្លាមៗ ហើយសមត្ថកិច្ចប្រាប់ថា ខាងណាមិនសុខចិត្តសូមទៅដាក់ពាក្យបណ្ដឹងចុះដើម្បីអោយសមត្ថកិច្ចចាត់ការតាមនិតិវិធី ៕
ចែករំលែកព័តមាននេះ