រាជធានីភ្នំពេញៈទីប្រឹក្សាររាជរដ្ឋាភិបាលម្នាក់បានបើករថយន្តវង្វេងផ្លូវចូលស្រែលិចទឹកជាប់ផុងទៅមុខមិនរួច ដោយសារជនរងគ្រោះមានជំងឺបេះដូងប្រចាំកាយ ទើបជំងឺធ្វើទុក្ខ បណ្ដាលឲ្យស្លាប់នៅក្នុងរថយន្ត ។ ហេតុការណ៍នេះបង្កអោយមានការភ្ញាក់ផ្អើលនៅវេលាម៉ោង១២ និង១២នាទី ថ្ងៃទី២១ ខែកញ្ញា ឆ្នាំ២០២៥…
រាជធានីភ្នំពេញៈទីប្រឹក្សាររាជរដ្ឋាភិបាលម្នាក់បានបើករថយន្តវង្វេងផ្លូវចូលស្រែលិចទឹកជាប់ផុងទៅមុខមិនរួច ដោយសារជនរងគ្រោះមានជំងឺបេះដូងប្រចាំកាយ ទើបជំងឺធ្វើទុក្ខ បណ្ដាលឲ្យស្លាប់នៅក្នុងរថយន្ត ។
ហេតុការណ៍នេះបង្កអោយមានការភ្ញាក់ផ្អើលនៅវេលាម៉ោង១២ និង១២នាទី ថ្ងៃទី២១ ខែកញ្ញា ឆ្នាំ២០២៥ នៅចំណុចដីស្រែលិចទឹក ភូមិសំរោងទាវ សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ។
តាមក្រុមការងារប្រតិកម្មរហ័សនៃស្នងការនគរបាលរាធានីភ្នំពេញបានអោយដឹងថា ករណីមានមនុស្សស្លាប់ នៅវេលាម៉ោង១២ និង១២នាទីថ្ងៃទី២១ ខែកញ្ញា ឆ្នាំ២០២៥ នៅចំណុចដីស្រែលិចទឹក ភូមិសំរោងទាវ សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ។
ជនរងគ្រោះ ឈ្មោះ ហែម ប្រសើរ ភេទប្រុស អាយុ៤៣ឆ្នាំ មុខរបរទីប្រឹក្សាររាជរដ្ឋាភិបាល ទីលំនៅក្រាំងដូនទី សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ។
សមត្ថកិច្ចនិងគ្រូពេទ្យចុះទៅត្រួតពិនិត្យនិងធ្វើកោសល្យវិច័យសពគឺនៅលើខ្លួនប្រាណមិនមានស្លាកស្នាមអ្វីទេ។
តាមក្រុមកាងារប្រតិកម្មរហ័សបានអោយដឹងទៀតថា នៅវេលាម៉ោង២២ និង១០នាទី ថ្ងៃទី២០ ខែកញ្ញា ឆ្នាំ២០២៥ អ្នកផ្ទះជនរងគ្រោះបានទទួលទូរស័ព្ទពីជនរងគ្រោះប្រាប់ថា រថយន្តជាប់ផុងដី។
ក្រោយមកជនរងគ្រោះបានទំនាក់ទំនងតាមលេខទូរស័ព្ទនៅលើរបងដីឡូតិ៍នៅក្បែរកន្លែងកើតហេតុចម្ងាយប្រហែល២៥០ម៉ែត្រដើម្បីឲ្យម្ចាស់ទីតាំងចេញមកជួយរកសម្ភារគាស់កង់ឡានជាប់ផុង ខណៈនោះម្ចាស់ទីតាំងដីឡូត៍ប្រាប់ថា ខ្លួនមិននៅភ្នំពេញទេ ឲ្យទំនាក់ទំនងទៅក្រុមកាងារខ្លួន ហើយម្ចាស់ទីតាំងដីឡូត៍បានទូរស័ព្ទទំនាក់ទំនងទៅក្រុមការងារខ្លួនថាបើជនរងគ្រោះសុំក្ដារគាស់កង់រថយន្តឲ្យជនរងគ្រោះខ្ចីយកទៅប្រើផង។ លុះនៅវេលាម៉ោងដឹងកើតហេតុខាងលើស្រាប់មានមនុស្សប្រទះឃើញជនរងគ្រោះស្លាប់នៅក្នុងរថយន្តនៅកន្លែងកើតហេតុ ទើបផ្ដល់ដំណឹងឲ្យសមត្ថកិច្ច។
តាមការបញ្ជាក់ពីក្រុមគ្រួសារជនរងគ្រោះថាជនរងគ្រោះមានជំងឺបេះដូងប្រចាំកាយ។
តាមការពិនិត្យកន្លែងកើតហេតុជាដីផ្លូវទាល់មានទឹកលិច នៅចំងាយពីផ្លូវបេតុងខាងលើប្រវែង១,៥០គីឡូម៉ែត្រឃើញមានរថយន្ត១គ្រឿងម៉ាកLEXUS RX300 ពណ៌ទឹកមាស ពាក់ស្លាកលេខភ្នំពេញ2L-8047 បានធ្លាក់ផ្លូវចូលទៅក្នុងដីស្រែលិចទឹក ក្បាលរថយន្តចេញ កង់ទាំង៤ជាប់ផុងដីភក់ ស្ថានភាពកង់រុលឡើងពីដីលិចទឹក, ទ្វាចំហៀងខាងស្តាំបើកចំហរ កូនសោរកាច់បើក ចង្កៀងខាងមុខបើកភ្លើង ម៉ាស៊ីនត្រជាក់បើក, នៅលើកៅអីខាងមុខចំហៀងខាងស្តាំ មានសាកសពមនុស្សប្រុសម្នាក់ស្លា ប់ខ្នងផ្អែកកៅអី ពាក់អាវយឺតដៃខ្លី ស្លៀកខោជើងខ្លី ជើងខោទាំងសងខាងមានស្នាមដានទឹកប៉ុន្ដែមានសភាពស្ងួត ហើយជាប់ស្មៅ បាត់ជើងទាំងសងខាងប្រឡាក់ភក់។
តាមការសន្និដ្ឋានជនរងគ្រោះស្លាប់ដោយគាំងបេះដូង អាចបណ្ដាលមកពីជំងឺបេះដូង (ជនរងគ្រោះបានបើករថយន្តវង្វេងផ្លូវ រួចក៏បានធ្លាក់ចូលដីស្រែលិចទឹក ដោយសារជនរងគ្រោះមានជំងឺបេះដូងប្រចាំកាយ ទើបជំងឺធ្វើទុក្ខបណ្ដាលឲ្យស្លាប់) ។
សពជនរងគ្រោះត្រូវបានសមត្ថកិច្ចយកទៅតម្កល់ក្នុងវត្តស្ទឹងមានជ័យរង់ចាំប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី៕
ចែករំលែកព័តមាននេះ