ខេត្តពោធិ៍សាត់ ៖ កម្លាំងប៉ុស្តិ៍នគរបាលរដ្ឋបាលបន្ទាយដី សហការជាមួយកម្លាំងអន្តរាគមន៍ នៃអធិការដ្ឋាននគរបាលក្រុងពោធិ៍សាត់ ដឹកនាំបញ្ជាផ្ទាល់ ដោយលោកវរសេនីយ៍ឯក កែវ សារិ អធិការនគរបាលក្រុងពោធិ៍សាត់…
ខេត្តពោធិ៍សាត់ ៖ កម្លាំងប៉ុស្តិ៍នគរបាលរដ្ឋបាលបន្ទាយដី សហការជាមួយកម្លាំងអន្តរាគមន៍ នៃអធិការដ្ឋាននគរបាលក្រុងពោធិ៍សាត់ ដឹកនាំបញ្ជាផ្ទាល់ ដោយលោកវរសេនីយ៍ឯក កែវ សារិ អធិការនគរបាលក្រុងពោធិ៍សាត់ បានចុះល្បាតត្រួតពិនិត្យតាមគោលដៅសំខាន់ៗ ក្នុងមូលដ្ឋានក្រុងពោធិ៍សាត់ បានឃើញជនគួរអោយសង្ស័យម្នាក់ កំពុងអង្គុយលើម៉ូតូ ក៏បានធ្វើការឃាត់ខ្លួន ដើម្បីសួរនាំ និងឆែកឆេរ ។ ជាលទ្ធផលឃាត់ខ្លួនបានជនសង្ស័យចំនួន ០១នាក់ និងចាប់យកសម្ភារវត្ថុតាងមួយចំនួន ។
លោកវរសេនីយ៍ឯក កែវ សារិ អធិការនគរបាលក្រុងពោធិ៍សាត់ បានបញ្ជាក់ឲ្យដឹងថា នៅវេលាម៉ោង២០និង៤៥នាទីថ្ងៃទី០៧ ខែតុលា ឆ្នាំ២០២៤ កម្លាំងប៉ុស្តិ៍នគរបាលរដ្ឋបាលបន្ទាយដី សហការជាមួយកម្លាំងប្រជាការពារ បានចុះល្បាតតាមភូមិសាស្ត្រសំខាន់ៗ លុះដល់ចំណុចទំនប់ ក្បាលហុង ស្ថិតនៅភូមិក្បាលហុង សង្កាត់បន្ទាយដី ក្រុងពោធិ៍សាត់ ស្រាប់តែឃើញជនសង្ស័យចំនួន ០១នាក់ ដែលជាមុខសញ្ញាទើបចេញពីពន្ធនាគារ រយៈពេល០៥ខែ ពាក់ពន្ធ័នឹងរឿងគ្រឿងញៀន កំពុងអង្គុយលើម៉ូតូ សមត្ថកិច្ចយើងបានឃាត់ខ្លួនដើម្បីសួរនាំ និងឆែកឆេរ ដោយនៅក្បែរនោះសមត្ថកិច្ចយើងបានរកឃើញកាបូបខ្មៅ នៅប្រហែល ៥ម៉ែត្រ ពីជនសង្ស័យ និងមានថ្នាំញៀននៅក្នុងកាបូបនោះ ក្រោយមកកម្លាំងប៉ុស្តិ៍នគរបាលរដ្ឋបាលបន្ទាយដី ក៏បានហៅកម្លាំងជំនាញ ផ្នែកប្រឆាំងគ្រឿងញៀន នៃអធិការដ្ឋាននគរបាលក្រុងពោធិ៍សាត់ ទៅកន្លែងកើតហេតុភ្លាមៗ ជាលទ្ធផលឃាត់ខ្លួនបានជនសង្ស័យចំនួន ០១នាក់ ឈ្មោះ ឈុន វុទ្ធី ភេទប្រុស អាយុ ៣៧ ឆ្នាំ រស់នៅភូមិអូរជ្រៅ សង្កាត់រលាប ក្រុងពោធិ៍សាត់ ខេត្តពោធិ៍សាត់ ។
វត្ថុតាងរួមមាន ៖ ម៉ូតូម៉ាកស្កុបពី ០១គ្រឿងពណ៌សលាយខៀវ, កាបូបខ្មៅនៅប្រហែល ៥ ម៉ែត្រពីជនសង្ស័យចំនួន ០១កាបូប, ម្សៅក្រាមសថ្លា សង្ស័យជាសារធាតុញៀនចំនួន ០៤កញ្ចប់, ដែកកេះចំនួន ០១ដើម, អំពូលសម្រាប់ជក់គ្រឿងញៀន ០១ និងទូរស័ព្ទចំនួន ០១គ្រឿង ម៉ាក Vivo ពណ៌ខៀវ ។
បច្ចុប្បន្នជនសង្ស័យរួមជាមួយវត្ថុតាង សមត្ថកិច្ចឃាត់ខ្លួន នៅអធិការដ្ឋាននគរបាលក្រុងពោធិ៍សាត់ ដើម្បីចាត់ការតាមនិតិវិធី ៕
ចែករំលែកព័តមាននេះ