រាជធានីភ្នំពេញ ៖ ជនសង្ស័យចំនួន៥នាក់បានធ្វើសកម្មភាពលួចម៉ូតូ១គ្រឿងចេញពីក្នុងវត្តមួយនៅក្នុងភូមិសាស្ត្រស្រុកអង្គស្នួល ខេត្តកណ្ដាល បន្ទាប់មកបានជិះយកទៅស្វែងរកកន្លែងលក់នៅឯភូមិសាស្ត្រខណ្ឌព្រែកព្នៅ រាជធានីភ្នំពេញ ក៏ត្រូវបាននគរបាលខណ្ឌព្រែកព្នៅឃាត់ខ្លួនបានទាំងសម្បុកតែម្ដង ។ អំពើលួចនោះបានប្រព្រឹត្តទៅនៅថ្ងៃទី០៩ ខែតុលា…
រាជធានីភ្នំពេញ ៖ ជនសង្ស័យចំនួន៥នាក់បានធ្វើសកម្មភាពលួចម៉ូតូ១គ្រឿងចេញពីក្នុងវត្តមួយនៅក្នុងភូមិសាស្ត្រស្រុកអង្គស្នួល ខេត្តកណ្ដាល បន្ទាប់មកបានជិះយកទៅស្វែងរកកន្លែងលក់នៅឯភូមិសាស្ត្រខណ្ឌព្រែកព្នៅ រាជធានីភ្នំពេញ ក៏ត្រូវបាននគរបាលខណ្ឌព្រែកព្នៅឃាត់ខ្លួនបានទាំងសម្បុកតែម្ដង ។
អំពើលួចនោះបានប្រព្រឹត្តទៅនៅថ្ងៃទី០៩ ខែតុលា ឆ្នាំ២០២៤ វេលាម៉ោង១១និង ៣០នាទីព្រឹក ស្ថិតនៅក្នុងវត្តឈូកក្រពុំ ភូមិខ្នា ឃុំទួលព្រេជ ស្រុកអង្គស្នួល ខេត្តកណ្ដាល។
ជនសង្ស័យទាំង០៥នាក់នោះរួមមាន១-ឈ្មោះ រស់ តុលា ហៅកា អាយុ១៦ឆ្នាំ មានទីលំនៅភូមិត្រពាំងស្គន់ សង្កាត់ពន្សាំង ខណ្ឌព្រែកព្នៅ រាជធានីភ្នំពេញ(គឺជាអ្នកលួច ឃាត់ខ្លួន) ។ ២-ឈ្មោះ រ៉ាន រតនា អាយុ២៤ឆ្នាំ មុខរបរកម្មករសំណង់ ស្នាក់នៅក្នុងការដ្ឋានសំណង់ ភូមិផ្សារលិច សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ ។ ៣-ឈ្មោះ វង្ស រ៉ៃយ៉ា អាយុ២៣ឆ្នាំ ស្នាក់នៅក្រោមស្ពានលីយ៉ុងផាត់ ភូមិព្រែកព្នៅ សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ ។
៤-ឈ្មោះ តេង សុខផាត អាយុ២៣ឆ្នាំ មុខរបរលក់ដូរ ស្នាក់នៅផ្ទះគ្មានលេខ ផ្លូវបេតុង ភូមិផ្សារលិច សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ។ ៥-ឈ្មោះ លឹម ចំនិត អាយុ៣៧ឆ្នាំ មុខរបរកម្មករសែងត្រី ស្នាក់នៅផ្ទះគ្មានលេខ ផ្លូវលំ ភូមិពោធិ៍មង្គល សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ (ជនសង្ស័យ៤នាក់ខាងក្រោមនេះគឺជាអ្នកយកម៉ូតូទៅលក់ក្រោយពេលលួចបាន ) ។
ដោយឡែកម៉ូតូដែលលួចបាននោះម៉ាកហុងដាឌ្រីមសេ១២៥ ពណ៌ខ្មៅ ស៊េរីឆ្នាំ២០២៣ លេខតួនិងលេខម៉ាស៊ីន0189744 ពាក់ស្លាកលេខ 1KV-6514 គឺជាកម្មសិទ្ធិរបស់យុវជនម្នាក់ឈ្មោះ សោម ចំរើន អាយុ១៨ឆ្នាំ ជនជាតិខ្មែរមុខរបរ ជាងតម្លើងស្លាកយីហោ មានទីលំនៅផ្ទះគ្មានលេខ ផ្លូវលំ ភូមិបឹងខ្នា ឃុំទួលព្រេជ ស្រុកអង្គស្នួល ខេត្តកណ្ដាល ។
តាមប្រភពពីកន្លែងកើតហេតុបានប្រាប់ថា នៅថ្ងៃកើតហេតុខណៈពេលជនរងគ្រោះជិះម៉ូតូទៅទុកនៅក្នុងវត្តឈូកក្រពុំនោះ ស្រាប់តែជនសង្ស័យបានលួចជិះគេចខ្លួនទៅបាត់ស្រមោល ជាហេតុបង្កឲ្យមានការភ្ញាក់ផ្អើលពេញក្នុងវត្តខាងលើ ។ ពេលនោះម្ចាស់ម៉ូតូបានប្ដឹងអាជ្ញាធរ និងសមត្ថកិច្ចឲ្យជួយអន្តរាគមន៍ និងផ្ដល់ព័ត៌មានដល់នគរបាលខណ្ឌព្រែកព្នៅ ជួយចេញពួនស្ទាក់ចាប់បានជន សង្ស័យ ។
ក្រោយមក នគរបាលខណ្ឌព្រែកព្នៅ បានប្រទះឃើញក្រុមជនសង្ស័យ និងភិនភាគខាងលើក៏បានធ្វើការឃាត់ខ្លួនបានទាំង៥នាក់ និងដកហូតយកបានម៉ូតូដែលលួចនោះប្រគល់ឲ្យម្ចាស់វិញ ព្រមទាំងដកហូតទូរស័ព្ទដៃ ម៉ាកណូគាអិនចុចពិល១គ្រឿង និងម៉ាកOPPO១គ្រឿងដែលជារបស់ជនសង្ស័យផងដែរ ។
បន្ទាប់មកនគរបាលបាននាំជនសង្ស័យទៅសាកសួរនៅអធិការដ្ឋានខណ្ឌព្រែកព្នៅ ហើយបើតាមជនសង្ស័យឈ្មោះ រស់ តុលា ហៅកា បានសារភាពថា ខ្លួនបានធ្វើសកម្មភាពលួចម៉ូតូរបស់ជនរងគ្រោះ លុះពេលលួចបានជិះចេញដល់ក្លោងទ្វារមុខវត្តកើតហេតុ បានជួបជាមួយគូកនម្នាក់ឈ្មោះ រ៉ាន រតនា ហើយក៏បានជិះម៉ូតូឌុបគ្នាគេចខ្លួន ។
ពេលទៅដល់ម្តុំផ្សារបឹងបៃតង ឈ្មោះ រ៉ាន រតនា បានឲ្យខ្លួនចុះពីលើម៉ូតូ បន្ទាប់មកបានជិះម៉ូតូនោះយកទៅឲ្យបក្សពួក៣នាក់ទៀតរួមមានឈ្មោះ វង្ស រ៉ៃយ៉ា , តេង សុខផាត និងលឹម ចំនិត ដើម្បីរកកន្លែងលក់ម៉ូតូនោះ។ ប៉ុន្តែនៅពេលពួកខ្លួនកំពុងជិះម៉ូតូដែលលួចបាននេះ ដើម្បីស្វែងរកកន្លែងលក់នោះ ក៏ស្រាប់តែនគរបាលខណ្ឌព្រែកព្នៅទៅដល់ឡោមព័ទ្ធចាប់ខ្លួនទាំងអស់គ្នាតែម្ដង ៕
ចែករំលែកព័តមាននេះ