ខេត្តស្វាយរៀង ៖ ជនបរទេសម្នាក់មកអង្គុយស្លាប់នៅក្បែររបងកាស៊ីណូឃីងក្រោន ជិតច្រកទ្វារព្រំដែនអន្តរជាតិបាវិត បង្កឲ្យមានការភ្ញាក់ផ្អើលដល់ប្រជាពលរដ្ឋ ដែលធ្វើដំណើរតាមដងផ្លូវមកឈប់មើលជាច្រើន ហើយបានរាយការណ៍ជូនសមត្ថកិច្ចឲ្យមកពិនិត្យនិងធ្វើកោសល្យវិច្ច័យតែម្តង ។ ករណីនេះ បានកើតឡើងនៅវេលាម៉ោង៤និង៣០នាទីរសៀលថ្ងៃទី៩…
ខេត្តស្វាយរៀង ៖ ជនបរទេសម្នាក់មកអង្គុយស្លាប់នៅក្បែររបងកាស៊ីណូឃីងក្រោន ជិតច្រកទ្វារព្រំដែនអន្តរជាតិបាវិត បង្កឲ្យមានការភ្ញាក់ផ្អើលដល់ប្រជាពលរដ្ឋ ដែលធ្វើដំណើរតាមដងផ្លូវមកឈប់មើលជាច្រើន ហើយបានរាយការណ៍ជូនសមត្ថកិច្ចឲ្យមកពិនិត្យនិងធ្វើកោសល្យវិច្ច័យតែម្តង ។
ករណីនេះ បានកើតឡើងនៅវេលាម៉ោង៤និង៣០នាទីរសៀលថ្ងៃទី៩ តុលា ២០២៤ ស្ថិតនៅចំណុចក្បែររបងកាស៊ីណូឃីងក្រោណ ភូមិបាវិតកណ្តាល សង្កាត់បាវិត ក្រុងបាវិត ។ បើតាមប្រជាពលរដ្ឋនៅជិតកន្លែងកើតហេតុបានឲ្យដឹងថា កាលពីវេលាម៉ោង០៣រសៀល គេប្រទះឃើញបុរសម្នាក់នេះដើរចេញពីកាស៊ីណូឃីងក្រោណដោយស្លៀកខោខ្លី ខ្លួនទទេរ អត់ពាក់អាវទេ ដើរមកអង្គុយនៅក្បែររបងកាស៊ីណូឃីងក្រោណ មើលទៅដូចជាមនុស្សបែកថ្នាំ ប្រើប្រាស់គ្រឿងញៀនហួសកម្រិត មកអង្គុយផ្ទាល់ដី លុះបានប្រហែលជាជាង១ម៉ោង ។ ក្រោយមក នៅវេលាម៉ោង៤និង៣០នាទីរសៀល ស្រាប់តែដួលផ្កាប់មុខទៅលើដីស្លាប់អង្គុយ បង្កឲ្យភ្ញាក់ផ្អើលតែម្តង ។
ប្រភពបន្តថា អ្នកខ្លះនិយាយថា សង្ស័យជាជនជាតិចិន ទំនងចាញ់ល្បែងក្នុងកាស៊ីណូ អ្នកខ្លះនិយាយថា សង្ស័យប្រើប្រាស់ថ្នាំញៀន ហួសកម្រិតធ្វើឲ្យវង្វេងស្មារតី បែកថ្នាំដើរមកអង្គុយហាលក្តៅ ទើបខ្យល់គរគាំងបេះដូងស្លាប់អង្គុយបែបនេះ ។
ប្រភពបន្តទៀត នៅវេលាម៉ោង៥និង១៥នាទីល្ងាចគេឃើញសមត្ថកិច្ចនគបាលក្រុងបាវិតចុះមកដល់កន្លែងកើតហេតុចងខ្សែព័ទ្ធ កន្លែងកើតហេតុលុះដល់ម៉ោង៦និង៣០នាទីយប់ទើបឃើញនគបាលការិយាល័យបច្ចេកទេសនៃស្នងការដ្ឋាននគបាលខេត្តស្វាយរៀងចុះទៅដល់ពិនិត្យនិងធ្វើកោសល្យវិច្ច័យ ក៏ប៉ុន្តែសមត្ថកិច្ចមិនអនុញ្ញាតិឲ្យអ្នកសារព័ត៌មានយើងចូលទៅជិតផ្តិតយករូបភាពទេ ហើយក៏មិនបានផ្តល់ព័ត៌មានអំពីលទ្ធផល ធ្វើកោសល្យវិច្ច័យថាជាអំពើឃាត្តកម្ម ឬ ជាករណី បែកថ្នាំ ខ្យល់គរស្លាប់ ឬយ៉ាងណានោះទេ។ហើយក៏ពុំទាន់ស្គាល់អត្តសញ្ញាណ ថាជនជាតិចិន ឬ ជនជាតិវៀតណាមនោះទេ សមត្ថកិច្ចកំពុងស្រាវជ្រាវ ។
បើតាមលោកហែម សុវណ្ណរិទ្ធ អធិការនគបាលក្រុងបាវិតបានមានប្រសាសន៍ថា មិនទាន់ដឹងអត្តសញ្ញាណនៅឡើយទេ រហូតមកដល់រសៀលថ្ងៃទី១០ តុលា ២០២៤នេះ សមត្ថកិច្ចកំពុងសើបអង្កេតស្រាវជ្រាវឆែកមើលតាមកាមរ៉ាសុវត្ថិភាពថា ជនបរទេសម្នាក់នេះដើរចេញមកពីណា ហើយមកកន្លែងកើតហេតុ មានអ្វីកើតឡើង គ្រាន់សង្ស័យជាជនជាតិចិន ។
រហូតមកដល់ម៉ោង៣និង៤៥នាទីរសៀលថ្ងៃទី១០ តុលា ២០២៤ កោះសន្តិភាពមិនអាចសុំការបំភ្លឺពីលោកប្រធានការិយាលយ័បច្ចេកទេសនៃស្នងការដ្ឋាននគបាលខេត្តស្វាយរៀងបានទេ ដោយទូរសព្ទ័មិនចូល ។ រីឯសពជនរងគ្រោះសមត្ថកិច្ចយកទៅតម្កល់ទុកនៅវត្តបាវិតក្រុងបាវិត ។
ចែករំលែកព័តមាននេះ