ទីក្រុងវ៉ាស៊ីនតោន៖ នៅរាត្រីថ្ងៃចន្ទ លោកបៃដិនរៀបចំរំលឹកខួបមួយឆ្នាំនៃការវាយប្រហាររបស់ក្រុមហាម៉ាស់ទៅលើប្រទេសអ៊ីស្រាអែលកាលពីថ្ងៃទី៧ ខែតុលា ឆ្នាំ២០២៣ដែលអមដោយសារការចាប់មនុស្សរាប់រយនាក់ធ្វើជាចំណាប់ខ្មាំង និងការវាយសងសឹករបស់អ៊ីស្រាអែលទៅលើមូលដ្ឋានរបស់ក្រុមហាម៉ាស់នៅតំបន់ហ្កាហ្សាស្លាប់យ៉ាងរង្គាលរហូតមកដល់សព្វថ្ងៃ។
នៅក្នុងពិធីរំលឹកខួបនោះ លោកបៃដិនបានអុជទៀនបួងសួងសូមសេចក្ដីសុខ និងសូមឱ្យមានបទឈប់បាញ់នៅក្នុងពេលឆាប់ៗនេះ។ ការបន់ស្រន់នេះធ្វើឡើងនៅពេលសង្គ្រាមឆាបឆេះមិនត្រឹមតែនៅហ្កាហ្សាប៉ុណ្ណោះទេ ប៉ុន្តែបានរីករាលដាលទៅដល់ប្រទេសលីបង់ថែមទៀត។ មានវត្តមាននៅក្បែរលោកបៃដិនគឺលោកស្រីជីលបៃដិន (Jill Biden) ដែលជាភរិយារបស់លោក។
កាលពីមុននេះ លោកបៃដិនប្រកាសថ្កោលទោសទង្វើរបស់ក្រុមហាម៉ាស់កាលពីថ្ងៃទី៧ ខែតុលា និងចាត់ទុកថានេះជាអំពើឃោរឃៅដែលហួសពីការថ្លែង។ លោកបានសម្ដែងមរណទុក្ខដ៏ក្រៀមក្រំជូនចំពោះវិញ្ញាណក្ខន្ធជនរងគ្រោះដែលមានជនជាតិអាមេរិកនៅក្នុងនោះផងដែរ។ ពួកគេបានស្លាប់ ឬត្រូវគេចាប់ពង្រត់យកទៅលាក់ទុកនៅក្នុងរូងក្រោមដីស៊ីអត់ស៊ីឃ្លាន។ ជាថ្មីម្ដងទៀត លោកនៅតែគាំទ្រអ៊ីស្រាអែលដដែល។ ជាពិសេសលោកយល់ថាអ៊ីស្រាអែលត្រូវតែមានសិទ្ធិការពារខ្លួន។
លោកបៃដិននិយាយរៀបរាប់បន្ថែមនៅក្នុងសេចក្ដីថ្លែងការណ៍របស់លោកដោយបង្ហាញភាពជឿជាក់ថាប្រវត្តិសាស្ត្រនឹងចារទុកថ្ងៃទី៧ ខែតុលាជាព្រឹត្តិការណ៍ដ៏ខ្មៅងងឹតសម្រាប់ជនជាតិប៉ាឡេស្ទីនដោយសារតែជម្លោះប្រដាប់អាវុធដែលដុតបញ្ឆេះដោយក្រុមហាម៉ាស់។ លោកប្ដេជ្ញាថានឹងខិតខំធ្វើការដោយឥតឈប់ឈរដើម្បីឱ្យមានបទឈប់បាញ់នៅហ្កាហ្សា។
នៅទូទាំងពិភពលោក ក្រុមអ្នកគាំទ្រអ៊ីស្រាអែលបានជួបជុំគ្នាដើម្បីរំលឹកខួបអនុស្សាវរីយ៍ដ៏ជូរចត់នេះ។ អធិការបតីអាល្លឺម៉ង់ថ្លែងថាលោកនៅតែមានអារម្មណ៍តក់ស្លុតចំពោះព្រឹត្តិការណ៍នោះ។ ចំណែកនាយករដ្ឋមន្ត្រីបារាំងថ្លែងថាបញ្ហាសន្តិសុខជាតិរបស់អ៊ីស្រាអែលជារឿងសំខាន់ណាស់ដែលមិនអាចមានអ្វីយកមកចរចាគ្នាបានឡើយ។ លោកសូមអំពាវនាវឱ្យក្រុមហាម៉ាស់ដោះលែងចំណាប់ខ្មាំងទាំងអស់ និងអំពាវនាវឱ្យអ៊ីស្រាអែលជួយសម្រួលការដឹកជញ្ជូនជំនួយមនុស្សធម៌ចូលតំបន់ហ្កាហ្សា៕
ចែករំលែកព័តមាននេះ