អ្នកប្រឡងបាក់ឌុប ៖ កុំភ័យពេក ព្រោះនាំឱ្យបាត់ការចងចាំ
- ភ្នំពេញ
ព្រះគ្រូគូ សុភាព បានមានថេដីកាណែនាំដល់អ្នកប្រឡងបាក់ឌុប កុំអោយមានការភ័យពេក ពីព្រោះវាអាចធ្វើអោយបាត់ការចងចាំ ។ តាមរយ:ហ្វេសប៊ុកផេក ព្រះគ្រូ គូ សុភាព…
ព្រះគ្រូគូ សុភាព បានមានថេដីកាណែនាំដល់អ្នកប្រឡងបាក់ឌុប កុំអោយមានការភ័យពេក ពីព្រោះវាអាចធ្វើអោយបាត់ការចងចាំ ។
តាមរយ:ហ្វេសប៊ុកផេក ព្រះគ្រូ គូ សុភាព បានមានថេដីកាថា ភ័យពេកនាំឱ្យបាត់ការចងចាំទៅវិញ ។ សម្រួលកាយ សម្រួលចិត្ត ចូលប្រលងដោយស្មារតីស្វាហាប់ កុំស្លុតពេកអី ។ ព្រះគ្រូមានថេដីកាបែបនេះ ខណ:ដែលការប្រឡងបាក់ឌុបនឹងចាប់ផ្តើម នៅថ្ងៃទី៨ ខែ តុលា ខាងមុខនេះ ។
គួរបញ្ជាក់ថា យុវសិស្សជាច្រើនតែងតែមានអារម្ភភ័យព្រួយ នៅពេលការប្រឡងខិតចូលមកដល់ពីព្រោះលទ្ធផលអាចប៉ះពាល់ដល់អនាគតរបស់ពួកគេ ។
លើសពីនេះ ក្រសួងអប់រំបានណែនាំឱ្យបេក្ខជនគ្រប់គ្រងអារម្មណ៍ឱ្យបាននឹងនរ និងមានភាពក្លាហាន ករណីមានបញ្ហាមិនស្រួលខ្លួនត្រូវជួបពិគ្រោះយោបល់ជាមួយមន្ត្រីសុខាភិបាលប្រចាំការនៅតាមមណ្ឌលប្រឡង ។
ក្រសួងអប់រំ ក៏បានធ្វើការណែនាំដល់អង្គភាពក្រោមឱវាទទាំងអស់ដែលបានកំណត់ និង ជ្រើសរើសយកធ្វើជាមណ្ឌលប្រឡងត្រូវអនុវត្តតាមគោលការណ៍ណែនាំប្រតិបត្តិ ។
បើតាមសេចក្ដីណែនាំ ចំពោះគ្រឹះស្ថានសិក្សាដែលយកធ្វើជាមណ្ឌលប្រឡង ត្រូវធ្វើអនាម័យបោសសម្អាតបន្ទប់ អគារ បរិវេណ និងរៀបចំកន្លែងទុកដាក់សំរាមឱ្យបានត្រឹមត្រូវ ។ រម្ងាប់មេរោគលើតុ កៅអី ដៃទ្វារ បង្កាន់ដៃ ផ្ទៃរាបបន្ទប់ប្រឡង និងកន្លែងចាប់កាន់ញឹកញាប់ ។ ពិនិត្យលទ្ធភាពរៀបចំគំនូសគម្លាតសុវត្ថិភាពនៅក្នុងបរិវេណគ្រឹះស្ថានសិក្សា ព្រមទាំងរៀបចំតុកៅអីសម្រាប់បេក្ខជនក្នុងបន្ទប់ប្រឡងនីមួយៗ ដោយរក្សាគម្លាតសុវត្ថិភាពយ៉ាងតិច ១,៥ម៉ែត្រ ៕
ចែករំលែកព័តមាននេះ