រាជធានីភ្នំពេញ ៖ យោងតាមការប្រាប់ឲ្យដឹងពីសមត្ថកិច្ចមកថា ទីតាំងដែលត្រូវបានភ្លើងលេបត្របាក់ នាវេលាម៉ោង០៩និង២៥នាទីព្រឹកថ្ងៃទី៣០ ខែកញ្ញា ឆ្នាំ២០២៤ នៅតាមផ្លូវបេតុង មុខវត្តតាភេម ស្ថិតនៅក្នុងភូមិកំបូល…
រាជធានីភ្នំពេញ ៖ យោងតាមការប្រាប់ឲ្យដឹងពីសមត្ថកិច្ចមកថា ទីតាំងដែលត្រូវបានភ្លើងលេបត្របាក់ នាវេលាម៉ោង០៩និង២៥នាទីព្រឹកថ្ងៃទី៣០ ខែកញ្ញា ឆ្នាំ២០២៤ នៅតាមផ្លូវបេតុង មុខវត្តតាភេម ស្ថិតនៅក្នុងភូមិកំបូល ព្រំប្រទល់ភូមិតាភេម សង្កាត់កំបូល ខណ្ឌកំបូល រាជធានីភ្នំពេញនោះ គឺជារោងចក្រផលិតពូក ខ្នើយ ស្រោមពូក និងស្រោមខ្នើយ ដែលរោងចក្រមួយនោះ មានយីហោ «អិមអ ហ្គូជ ណាយ ថេកស្ថាយ» ពុំមែនជាឃ្លាំងស្តុកកម្ទេចក្រណាត់ និងអេតចាយនោះឡើយ ។
អគាររោងចក្រខាងលើនោះ គឺជាប្រភេទសំណង់ ដែកប្រក់សង្ក័សី ទំហំ៥០ម៉ែត្រ គុណ ៥០ម៉ែត្រ ហើយរោងចក្រទាំងមូលរួមទាំងសម្ភារនៅក្នុងនោះផង ត្រូវបានភ្លើងឆេះអស់ទាំងស្រុង ប៉ុន្តែពុំបានដឹងពីទំហំ នៃការខាតនោះបង់គិតជាទឹកប្រាក់ប៉ុន្មានម៉ឺនដុល្លារនោះទេ។ ម្យ៉ាងទៀត ក៏ពុំបានបណ្តាលឲ្យឆេះរាលដាលដល់ផ្ទះអ្នកភូមិ ដែលស្ថិតនៅក្បែរខាងនោះឡើយ ចំណែកកម្លាំងសមត្ថកិច្ចបានធ្វើការបាញ់ទឹករហូតរលត់ទៅវិញ នៅវេលាម៉ោង៣រសៀលថ្ងៃដដែលនោះ គឺប្រើពេលក្នុងការពន្លត់រហូតដល់ជិត៦ម៉ោងឯណោះ ។
សមត្ថកិច្ច បានប្រាប់ឲ្យដឹងបន្តទៀតថា ប្រតិបត្តិការពន្លត់ភ្លើងខាងលើនោះ បានប្រើប្រាស់រថយន្តពន្លត់អគ្គិភ័យសរុបចំនួន៣១គ្រឿង និងបាញ់ទឹកអស់ចំនួនចំនួន១៦៤ ស៊ីទែន ស្មើនឹង៦៦២ម៉ែត្រគូប។ ក្នុងនោះ រួមមាន រថយន្តពន្លត់អគ្គិភ័យរបស់ការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ ចំនួន១៧គ្រឿង ប្រើប្រាស់ទឹកអស់ចំនួន ១១៩ស៊ីទែន ស្មើនឹង៤៧៦ម៉ែត្រគូប ។ រថយន្តជំនួយមកពីកងពលតូចលេខ៧០ ចំនួន០៧គ្រឿង ប្រើប្រាស់ទឹកអស់២១ ស៊ិទែន ស្មើនឹង៨៤ម៉ែត្រគូប, រថយន្តបញ្ជាការដ្ឋានទ័ពពិសេសឆ័ត្រយោង៩១១ ចំនួន០៣គ្រឿង ប្រើប្រាស់ទឹកអស់១២ស៊ីទែន ស្មើនឹង៤៨ម៉ែត្រគូប, រថយន្តរបស់តម្រួតបទបញ្ជា ចំនួន០១គ្រឿង ប្រើប្រាស់ទឹកអស់០៣ស៊ីទែន ស្មើនឹង១២ម៉ែត្រគូប, រថយន្តរបស់បុរីសង្ឃឹមថ្មី ចំនួន០២គ្រឿង ប្រើប្រាស់ទឹកអស់០៦ស៊ីទែន ស្មើនឹង២៤ម៉ែត្រគូប និងរថយន្តក្រុមហ៊ុន ស្រាបៀរកម្ពុជា ចំនួន០១គ្រឿង ប្រើប្រាស់ទឹក០៣ស៊ីទែន ស្មើរនឹង១៨ម៉ែត្រគូប ។
បើតាមប្រភពពីកន្លែងកើតហេតុ បានអះអាងថា គ្រោះអគ្គិភ័យនេះ បង្កឡើងដោយការឆ្លងចរន្តអគ្គិសនី នៅក្នុងអគាររោងចក្រនោះផ្ទាល់តែម្ដង ប៉ុន្តែលោកវរសេនីយ៍ឯក ព្រហ្ម យ៉ន នាយការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានបញ្ជាក់ថា ចំពោះហេតុការណ៍គ្រោះអគ្គិភ័យនេះ កម្លាំងសមត្ថកិច្ចជំនាញ បាននិងកំពុងតែធ្វើការស្រាវជ្រាវ ដើម្បីបញ្ជាក់អំពីមូលហេតុ នៃការឆាបឆេះខាងលើនេះនៅឡើយ ។
សូមរំឭកថា នៅព្រឹកកើតហេតុនោះកម្មករ ដែលបម្រើការងារនៅក្នុងរោងចក្រខាងលើ នោះមិនទាន់ឈប់សម្រាកនៅឡើយទេ គឺនៅធ្វើការ១ព្រឹកថ្ងៃកើតហេតុនោះទៀត ហើយថៅកែត្រៀម នឹងបើកប្រាក់ខែឲ្យដើម្បីឈប់សម្រាកទៅបុណ្យភ្ជុំបិណ្ឌ នៅតាមបណ្ដាស្រុកកំណើតរៀងៗខ្លួន ។
ដោយឡែកនៅមុនពេលកើតហេតុ ខណៈពេលកម្មករ កម្មការិនី កំពុងធ្វើការសុខៗ ស្រាប់តែមានហេតុការណ៍ឆ្លងចរន្តអគ្គិសនី នៅក្នុងរោងចក្របង្កជាអណ្ដាតភ្លើងឆាបឆេះយ៉ាងឆាបរហ័ស និងមានផ្សែងពេញក្នុងអគាររោងចក្រ មិនអាចពន្លត់ទាន់ឡើយ ។
ប្រភពដដែលបានប្រាប់ឲ្យដឹងបន្តទៀតថា ពេលនោះកម្មករបាននាំគ្នារត់ចេញក្រៅប្រសេចប្រសាច ហើយពុំមានអ្នករងរបួសនោះទេ ខណៈនោះអាជ្ញាធរ និងសមត្ថកិច្ច ដែលកំពុងរក្សាសណ្ដាប់ធ្នាប់នៅក្នុងពិធីបុណ្យភ្ជុំបិណ្ឌ ក្នុងវត្តតាភេម ដែលស្ថិតនៅជិតនោះស្រាប់ បានចេញអន្តរាគមន៍និងហៅក្រុមអ្នកពន្លត់អគ្គិភ័យឲ្យទៅកាន់ទីនោះ ។ ខណៈនោះអណ្ដាតភ្លើង និងផ្សែងហុយឡើងលើយ៉ាងឃ្មួលខ្មាញ់ កប់អាកាសវេហាស៍ ហើយមិនយូរប៉ុន្មានរថយន្តពន្លត់អគ្គិភ័យ ដែលមកពីអង្គភាពយោធា និងនគរបាល ព្រមទាំងក្រុមហ៊ុននានាជាច្រើនគ្រឿង បានទៅដល់ជាបន្តបន្ទាប់ និងធ្វើសកម្មភាពពន្លត់ភ្លើង ។
ប្រភពខាងលើបានបញ្ជាក់ឲ្យដឹងបន្តថា ប៉ុន្តែភ្លាមៗ ភ្លើងមិនបានថមថយនោះទេ អគាររោងចក្រ ២ខ្នងទំហំ៥០ម៉ែត្រ គុណនឹង៥០ម៉ែត្រ ត្រូវបានភ្លើងបានឆេះរាលចូលពីមួយទៅមួយទៀតយ៉ាងឆាប់រហ័ស ព្រោះក្នុងរោងចក្រមានសុទ្ធតែសម្ភារងាយឆាបឆេះ។ អគាររោងចក្រទាំងមូល និងសម្ភារម៉ាស៊ីនសង្វាក់ផលិតកម្មទាំងអស់ បានក្លាយជាចំណីព្រះអគ្គិ ហើយអគាររោងចក្រក៏បាក់ស្រុតរាបដល់ដី ពិតជាគួរឲ្យសោកស្ដាយខ្លាំងណាស់ ។ បើទោះបីបាក់ស្រុតទៅហើយ ក៏ភ្លើងនៅតែបន្តឆេះដដែល ដោយរហូតដល់វេលាម៉ោង៣រសៀលថ្ងៃដដែល ទើបក្រុមអ្នកពន្លត់ភ្លើងបានពន្លត់រលត់ទាំងស្រុង និងពុំបានឆេះរាលដល់ផ្ទះប្រជាពលរដ្ឋនោះឡើយ ៕
ចែករំលែកព័តមាននេះ