រាជធានីភ្នំពេញ ៖ ឆ្លងចរន្តអគ្គិសនីបណ្ដាលឲ្យឆាបឆេះឃ្លាំងស្តុកកម្ទេចក្រណាត់ដេរពូក និងស្តុកអេតចាយ២ខ្នងយ៉ាងសន្ធោសន្ធៅ ដែលបង្កឲ្យមានផ្សែងហុយឡើងលើយ៉ាងខ្មួលខ្មាញ់កប់អាកាសវេហាស៍ ។ បើទោះជាមានការអន្តរាគមន៍ពីកម្លាំងសមត្ថកិច្ចនិងក្រុមពន្លត់អគ្គិភ័យ ចេញរថយន្តពន្លត់អគ្គិភ័យច្រើនគ្រឿងទៅបាញ់ពន្លត់ក្ដី ប៉ុន្តែភ្លើងបានលេបត្របាក់ឃ្លាំង២ខ្នងនិងកម្ទេចក្រណាត់…
រាជធានីភ្នំពេញ ៖ ឆ្លងចរន្តអគ្គិសនីបណ្ដាលឲ្យឆាបឆេះឃ្លាំងស្តុកកម្ទេចក្រណាត់ដេរពូក និងស្តុកអេតចាយ២ខ្នងយ៉ាងសន្ធោសន្ធៅ ដែលបង្កឲ្យមានផ្សែងហុយឡើងលើយ៉ាងខ្មួលខ្មាញ់កប់អាកាសវេហាស៍ ។ បើទោះជាមានការអន្តរាគមន៍ពីកម្លាំងសមត្ថកិច្ចនិងក្រុមពន្លត់អគ្គិភ័យ ចេញរថយន្តពន្លត់អគ្គិភ័យច្រើនគ្រឿងទៅបាញ់ពន្លត់ក្ដី ប៉ុន្តែភ្លើងបានលេបត្របាក់ឃ្លាំង២ខ្នងនិង
កម្ទេចក្រណាត់ ព្រមទាំងសម្ភារៈពូកនិងអេត ចាយអស់ទាំងស្រុង ហើយអគារឃ្លាំងបាក់ដួលរាបដល់ដី ។
ហេតុការណ៍ខាងលើ បានកើតឡើងកាលពីវេលាម៉ោង៩ និង២៥នាទីព្រឹកថ្ងៃទី៣០ ខែកញ្ញា ឆ្នាំ២០២៤ នៅតាមផ្លូវបេតុង មុខវត្តតាភេម ស្ថិតនៅក្នុងភូមិតាភេម សង្កាត់កំបូល ខណ្ឌកំបូលរាជធានីភ្នំពេញ ។ យោងតាមប្រពព័ត៌មានបឋមពីកន្លែងកើតហេតុបានឲ្យដឹងថា កម្មករដែលបម្រើការងារនៅក្នុងឃ្លាំងខាងលើ មិនទាន់ឈប់សម្រាកនៅឡើយទេ គឺនៅធ្វើការ១ព្រឹកថ្ងៃកើតហេតុនោះទៀត ហើយថៅកែនិងបើកប្រាក់ខែឲ្យ ដើម្បីឈប់សម្រាកទៅបុណ្យភ្ជុំបិណ្ឌនៅតាមបណ្ដាស្រុកកំណើតរៀងៗខ្លួន ។
ដោយឡែក នៅមុនពេលកើតហេតុ ខណៈពេលកម្មករ កម្មការិនីកំពុងធ្វើការសុខៗ ស្រាប់តែមានហេតុការណ៍ឆ្លងចរន្តអគ្គិសនីនៅក្នុងឃ្លាំងកម្ទេចក្រណាត់និងដេរពូក បង្កជាអណ្ដាតភ្លើងឆាបឆេះយ៉ាងឆាបរហ័ស និងមានផ្សែងពេញក្នុងអគារឃ្លាំងមិនអាចពន្លត់ទាន់ឡើយ ។
ប្រភពដដែលបានប្រាប់ឲ្យដឹងបន្តទៀតថា ពេលនោះកម្មករបាននាំគ្នារត់ចេញក្រៅប្រសេចប្រសាច ហើយពុំមានអ្នករងរបួសនោះទេ បន្ទាប់មកបានរាយការណ៍ទៅកាន់អាជ្ញាធរនិងសមត្ថកិច្ចព្រមទាំងក្រុមអ្នកពន្លត់អគ្គិភ័យឲ្យជួយអន្តរាគមន៍ ។ខណៈនោះបង្កឲ្យមានអណ្ដាតភ្លើង និងផ្សែងហុយឡើងលើយ៉ាងឃ្មួលខ្មាញ់កប់អាកាសវេហាស៍ ។ ភ្លាមៗនោះមានរថយន្តពន្លត់អគ្គិភ័យ មកពីអង្គភាពយោធានិងនគរបាលព្រមទាំងក្រុមហ៊ុននានាជាច្រើនគ្រឿង បានចេញទៅពន្លត់ភ្លើង។
ប្រភពខាងលើបានបញ្ជាក់ឲ្យដឹងបន្តថា ប៉ុន្តែភ្លាមៗមិនបានថមថយនោះទេ ភ្លើងបានឆេះរាលចូលដល់ឃ្លាំងស្តុកអេតចាយជាប់គ្នានោះទៀតដែលស្តុកភាគីច្រើនគ្រឿងជ័រងាយនិងឆាបឆេះ ហើយឃ្លាំងទាំង២បានក្លាយជាចំណីព្រះអគ្គិបាក់ស្រុតដល់ដីអស់ទៅហើយ ពិតជាគួរឲ្យសោកស្ដាយខ្លាំងណាស់ ។
បើទោះបីឃ្លាំងបាក់ស្រុតទៅហើយ ក៏ភ្លើងនៅតែបន្តឆេះដដែល ដោយរហូតមកដល់វេលាម៉ោង១១ព្រឹកថ្ងៃដដែលនៅពុំទាន់ពន្លត់រលត់នៅឡើយ ប៉ុន្តែភ្លើងពុំបានឆេះរាលដល់ផ្ទះប្រជាពលរដ្ឋនោះឡើយ៕
ចែករំលែកព័តមាននេះ