រាជធានីភ្នំពេញ ៖ បុរសម្នាក់ដែលអ្នកភូមិអះអាងថា ជាមនុស្សញៀនថ្នាំនិងចូលចិត្តផឹកស្រាជាប្រចាំ ហើយតែងតែដើរគ្មានគោលដៅច្បាស់លាស់ យប់ត្រង់ណាដេកត្រង់នោះ ពុំដឹងថាមានព្រួតវាយធ្វើបាប ព្រោះតែគាត់ដើរចូលផ្ទះគេពេលយប់ ឬ ក៏ដើររអិលដួលដោយខ្លួនឯងនោះទេ…
រាជធានីភ្នំពេញ ៖ បុរសម្នាក់ដែលអ្នកភូមិអះអាងថា ជាមនុស្សញៀនថ្នាំនិងចូលចិត្តផឹកស្រាជាប្រចាំ ហើយតែងតែដើរគ្មានគោលដៅច្បាស់លាស់ យប់ត្រង់ណាដេកត្រង់នោះ ពុំដឹងថាមានព្រួតវាយធ្វើបាប ព្រោះតែគាត់ដើរចូលផ្ទះគេពេលយប់ ឬ ក៏ដើររអិលដួលដោយខ្លួនឯងនោះទេ ត្រូវបានអ្នកភូមិប្រទះឃើញរងរបួសបែកក្បាលធ្ងន់ធ្ងរហូរឈាមកក្លាក់ និងដួលដេកនៅថ្លុកឈាមក្នុងទីស្នាក់ការភូមិមួយកន្លែង បង្កឲ្យមានការភ្ញាក់ផ្អើលទាំងព្រឹក បន្ទាប់ក៏បានបញ្ជូនទៅសង្គ្រោះមន្ទីរពេទ្យជាតិតេជោសន្តិភាព ។
ហេតុការណ៍ខាងលើនោះ បានកើតឡើងកាលពីវេលាម៉ោង១០ព្រឹកថ្ងៃទី២៨ ខែកញ្ញា ឆ្នាំ២០២៤ នៅក្នុងទីស្នាក់ការភូមិចាក់ជ្រូក សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ។
អ្នកភូមិចាក់ជ្រូកបានប្រាប់ឲ្យដឹងថា បុរសរងគ្រោះរូបនោះនោះឈ្មោះឈិន ដេត អាយុជាង៣០ឆ្នាំ មានទីលំនៅក្នុងភូមិកើតហេតុខាងលើនោះដែរ គាត់គឺជាកូនកំព្រាដែលត្រូវបានឪពុកម្ដាយស្លាប់ចោលអស់ហើយ ។ ប៉ុន្តែក៏នៅមានបងប្អូនសាច់ញាតិផងដែរ ហើយបុរសនេះជាមនុស្សញៀនថ្នាំនិងចូលចិត្តផឹកស្រាជាប្រចាំទៀតផង ដោយគាត់តែងតែដើរគ្មានគោលដៅច្បាស់លាស់នោះទេ គឺយប់ត្រង់ណាដេកត្រង់នោះតែម្ដង ។
អ្នកភូមិដដែលបានប្រាប់ឲ្យដឹងបន្តទៀតថា កន្លងមកធ្លាប់ត្រូវបានបងប្អូនសាច់ញាតិនាំយកទៅដាក់នៅមណ្ឌលកែប្រែន្សាបគ្រឿងញៀនជាបន្តបន្ទាប់ច្រើនលើករួចមកហើយដែរ ប៉ុន្តែពុំដឹងថាយ៉ាងម៉េចនោះទេ ទើបកែប្រែមិនបានសោះ ។ ដោយឡែកនៅមុនពេលកើតហេតុពុំមាននរណាបានដឹងថាមានរឿងអ្វីកើតឡើងចំពោះបុរសនេះនោះទេ ស្រាប់តែនៅវេលាព្រឹកថ្ងៃកើតហេតុក៏ប្រទះឃើញរងរបួសបែកក្បាលធ្ងន់និងដួលដេកនៅក្នុងថ្លុកឈាមបែបនេះទៅវិញ ។
អ្នកភូមិខាងលើបានប្រាប់ឲ្យដឹងបន្ថែមថា ថ្វីដ្បិតតែបុរសជាមនុស្សញៀនថ្នាំមែន ប៉ុន្តែពេលឃើញស្ថានភាពបែបនេះពិតជាមានការអាណិតអាសូរខ្លាំងណាស់ ពេលនោះពួកគាត់ក៏បាននាំគ្នាសាកសួរទៅកាន់បុរសនោះពីមូលហេតុដែរ ប៉ុន្តែគាត់បានប្រាប់ថារងរបួសដោយសារតែមានអ្នកព្រួតវាយធ្វើបាបឬក៏ដើរដួលដោយខ្លួនឯងនោះទេ ។ បន្ទាប់មកក៏បានរាយការណ៍ជូនអាជ្ញាធរនិងសមត្ថកិច្ចបានដឹង និងហៅក្រុមសង្គ្រោះមន្ទីរពេទ្យជាតិតេជោសន្តិភាពដឹកយកទៅសង្គ្រោះបន្ទាន់ភ្លាមៗផងដែរ ៕
ចែករំលែកព័តមាននេះ