ទីក្រុងញូយ៉ក៖ នាយករដ្ឋមន្ត្រីអ៊ីស្រាអែល លោកណឺតាន់យ៉ាហ៊ូ ថ្លែងនៅក្នុងមហាសន្និបាតអង្គការសហប្រជាជាតិថាលោកត្រូវតែបន្តវាយប្រហារក្រុមហេសបូឡារហូតដល់សម្រេចផែនការរៀបចំសណ្ដាប់ធ្នាប់ឡើងវិញនៅតំបន់ព្រំដែនជាប់នឹងប្រទេសលីបង់។ តាមរយៈពាក្យសម្ដីនេះមានន័យថាអ្នកដែលអំពាវនាវឱ្យអ៊ីស្រាអែលទទួលយកបទឈប់បាញ់ប្រហែលជាគ្មានសង្ឃឹមទេ។ មិនតែប៉ុណ្ណោះ សង្គ្រាមនេះអាចនឹងរីករាលដាលទូទាំងតំបន់មជ្ឈិមបូព៌ាក៏ថាបាន។
មេដឹកនាំអ៊ីស្រាអែលរូបនេះថ្លែងថាលោកលែងអត់ធ្មត់តទៅទៀតហើយចំពោះករណីដែលហេសបូឡាបាញ់រ៉ុកកែតចូលទឹកដីអ៊ីស្រាអែលរាល់ថ្ងៃចេញពីតំបន់ព្រំដែន។ អ៊ីស្រាអែលមានសិទ្ធិគ្រប់យ៉ាងដើម្បីកម្ចាត់រាល់ការគំរាមកំហែង និងនាំប្រជាជនត្រឡប់ទៅរស់នៅលើទឹកដីរបស់ខ្លួនវិញដោយសុវត្ថិភាព។ អ្វីដែលយើងកំពុងធ្វើសព្វថ្ងៃនេះគឺដើម្បីបុព្វហេតុ១នេះឯង។
លោកណឺតាន់យ៉ាហ៊ូបានប្រៀបប្រដូចទឹកចិត្តរបស់អ៊ីស្រាអែល និងទឹកចិត្តរបស់អាមេរិកមិនខុសគ្នាទេ។ ឧបមាថាបើពួកភេរវកម្មចូលអុកឡុកទីក្រុងរបស់អាមេរិកឱ្យក្លាយទៅជាទីក្រុងខ្មោច។ តើរដ្ឋាភិបាលអាមេរិកឈរឱបដៃមើលបានទេ? ប្រាកដជាមិនបានទេ។ លោកណឺតាន់យ៉ាហ៊ូនិយាយហាក់ដូចជាធ្វើកាយវិការមាំសម្បើមណាស់។ លោកនិយាយសុទ្ធតែក្ដាប់ដៃឡើងទៅលើ។ លោកថាអ៊ីស្រាអែលបានអត់ធ្មត់នឹងការអុកឡុករបស់ក្រុមហេសបូឡាច្រើនពេកហើយរហូតដល់ជិត១ឆ្នាំ។
លោកណឺតាន់យ៉ាហ៊ូបាននិយាយការពារវិធានការវាយបករបស់អ៊ីស្រាអែលទៅលើក្រុមហាម៉ាស់ដែលបើកការវាយប្រហារកាលពីថ្ងៃទី៧ ខែតុលា ឆ្នាំ២០២៣។ លោកសង្កត់ធ្ងន់ថាអ៊ីស្រាអែលពិតជាចង់បានណាស់សន្តិភាព។ ប៉ុន្តែលោកសូមផ្ដាំរដ្ឋាភិបាលអ៊ីរ៉ង់ថាបើអ្នកឯងវាយខ្ញុំ ខ្ញុំត្រូវតែវាយអ្នកឯងវិញ។ លោកយល់ថាអ៊ីរ៉ង់បង្កបញ្ហាច្រើនណាស់នៅតំបន់មជ្ឈិមបូពា។
លោកណឺតាន់យ៉ាហ៊ូយល់ថាពិភពលោកខិតខំយកចិត្តយកថ្លើមអ៊ីរ៉ង់យូរពេកហើយ។ ឥឡូវនេះ ពួកគេល្មមឈប់ប្រើនយោបាយផ្គាប់ចិត្តនេះតទៅទៀត។ ងាកចេញពីហេសបូឡា យើងសូមរំលឹកបន្តិចអំពីសង្គ្រាមនៅតំបន់ហ្កាហ្សារវាងអ៊ីស្រាអែល និងក្រុមហាម៉ាស់ដែលជាកូនចៅរបស់អ៊ីរ៉ង់។ រហូតមកដល់ពេលនេះ ចំនួនអ្នកស្លាប់នៅហ្កាហ្សាកើនឡើងដល់ជាង៤១៥០០នាក់ និងរបួសជាង៩៦០០០នាក់។ អ៊ីស្រាអែលចាត់ទុកថាវាជារឿងសមហេតុផលដែលខ្លួនត្រូវតែវាយប្រហារការពារខ្លួន។
លោកណឺតាន់យ៉ាហ៊ូថ្លែងថាសង្គ្រាមនៅហ្កាហ្សាបើចង់បញ្ចប់ងាយស្រួលទេ។ សំខាន់ឱ្យតែក្រុមហាម៉ាស់ទម្លាក់អាវុធចុះ, ដោះលែងចំណាប់ខ្មាំងទាំងអស់ និងលើកដៃសារភាពចុះចាញ់ ពេលនោះអ្វីៗត្រូវបញ្ចប់ទាំងស្រុង។ ប៉ុន្តែពួកគេមិនធ្វើដូច្នេះទេ។ ហេតុនេះយើងត្រូវតែបន្តវាយប្រហាររហូតដល់ទទួលបានជ័យជម្នះទាំងស្រុង។ លោកអះអាងថាអីស្រាអែលបានកម្ទេចគ្រាប់រ៉ុកកែតរបស់ក្រុមហាម៉ាស់៩០% និងសម្លាប់ ឬចាប់បានទាំងរស់នូវយុទ្ធជនរបស់ហាម៉ាស់ប្រហែលពាក់កណ្ដាល។
ដោយសារមានប្រៀបបែបនេះ អ៊ីស្រាអែលក៏បង្វែរមុខព្រួញទៅវាយប្រហារក្រុមហេសបូឡាវិញម្ដង។ ត្រឹមតែរយៈពេល៥ថ្ងៃចាប់ពីថ្ងៃចន្ទដល់ថ្ងៃសុក្រ ជនស៊ីវិលលីបង់ជាង៩ម៉ឺននាក់ត្រូវផ្លាស់ប្ដូរទីកន្លែងរស់នៅរបស់ខ្លួនដើម្បីគេចចេញពីសង្គ្រាម។ ដូច្នេះធ្វើឱ្យអ្នកផ្លាស់ប្ដូរទីលំនៅសរុបនៅលីបង់កើនឡើងដល់២សែននាក់។ ចំនួនអ្នកស្លាប់កើនឡើងដល់ជាង៦០០នាក់៕
ចែករំលែកព័តមាននេះ