ទីក្រុងបេរូត៖ កាលពីយប់ថ្ងៃសុក្រ អ៊ីស្រាអែលប៉ងផ្ដាច់ផ្ដិលជីវិតមេធំរបស់ក្រុមហេសបូឡា លោកណាស្រាឡា (Nasrallah)។ ប៉ុន្តែជីវិតថ្លៃ ទោះបីអ៊ីស្រាអែលទម្លាក់គ្រាប់បែកជញ្ជ្រំទៅលើបញ្ជាការដ្ឋានសម្ងាត់របស់គាត់នៅទីក្រុងបេរូត ក៏គាត់អាចគេចផុតពីការស្លាប់យ៉ាងចម្លែក។ ការវាយប្រហារលើកនេះធ្វើឱ្យគាត់ និងអ្នកក្រោមបង្គាប់ភ័យផ្អែមមាត់មិនតិចទេព្រោះអ៊ីស្រាអែលធ្លាប់មានស្នាដៃឆ្នើមក្នុងការកំណត់ទីតាំង និងប្រមាញ់មេៗរបស់ហាម៉ាស់ ហេសបូឡា និងហ៊ូទីមិនដែលចេះខុស។
មន្ត្រីរដ្ឋាភិបាលអាមេរិក២រូបដែលស្នើសុំមិនបញ្ចេញឈ្មោះ រួមទាំងមន្ត្រីរដ្ឋាភិបាលអ៊ីស្រាអែល២រូប និងសាក្សី២រូបទៀតសុទ្ធតែនិយាយដូចៗគ្នាថាអ៊ីស្រាអែលវាយឆ្មក់ពីលើអាកាសតាមយន្តហោះទៅលើមេដឹកនាំកំពូលរបស់ហេសបូឡា។ វាជាសញ្ញាបង្ហាញថាសង្គ្រាមនេះមិនអាចបញ្ចប់ទៅវិញនៅក្នុងពេលឆាប់ៗនេះទេទោះបីសហគមន៍អន្តរជាតិរួមទាំងសម្ព័ន្ធមិត្តជិតស្និទ្ធរបស់អ៊ីស្រាអែលដូចជាអាមេរិក បារាំង និងអឺរ៉ុបខំនិយាយសឹងបែកពពុះមាត់ឱ្យមានបទឈប់បាញ់យ៉ាងណាក្ដី។
រហូតមកដល់ពេលនេះ គេមិនទាន់ដឹងច្បាស់១០០%ថាតើមេធំរបស់ហាម៉ាស់ លោកណាស្រាឡាមានសុខទុក្ខយ៉ាងណាទេក្រោយការវាយប្រហារនោះ? គាត់ត្រូវរបួសដែរឬទេ? ឬមួយក៏គាត់មិនបានស្ថិតនៅទីនោះទេនៅពេលមានការវាយប្រហារពីសំណាក់អ៊ីស្រាអែល? រដ្ឋាភិបាលអ៊ីរ៉ង់កំពុងតាមដានព្រឹត្តិការណ៍ជុំវិញជោគវាសនារបស់មេដឹកនាំកំពូលរបស់ក្រុមហេសបូឡារូបនេះដោយយកចិត្តទុកដាក់។ ប៉ុន្តែប្រភពដែលស្និទ្ធនឹងក្រុមហេសបូឡាឱ្យដឹងថាគាត់មានសុវត្ថិភាពជាធម្មតាទេ។
គាត់ជាមេដឹកនាំក្រុមហេសបូឡាចាប់តាំងពីឆ្នាំ១៩៩២។ គិតទៅរយៈពេល៣២ឆ្នាំកន្លងមកហើយ។ លោកហ្វ៊ីរ៉ាស់ ម៉ាក់សាត (Firas Maksad) ជាអ្នកស្រាវជ្រាវម្នាក់យល់ថាមិនសំខាន់ថាអ៊ីស្រាអែលសម្លាប់មេដឹកនាំហេសបូឡារូបនេះបានឬមិនបានទេ។ សំខាន់នៅត្រង់ថាអំណឹះតទៅ ជម្លោះនេះកាន់តែឆាបឆេះខ្លាំងឡើងៗដល់ដំណាក់កាលប្រយុទ្ធគ្នាយកស្លាប់-រស់។ រឹតតែច្បាស់បំផុតនោះគឺអ៊ីស្រាអែលកំពុងហ្វឹកហាត់នៅតាមព្រំដែនដើម្បីត្រៀមវាយលុកទ័ពជើងគោកចូលប្រទេសលីបង់។
អ្នកសារព័ត៌មានព្យាយាមទាក់ទងទៅក្រុមប្រឹក្សាសន្តិសុខជាតិអ៊ីស្រាអែលដើម្បីស្នើសុំការឆ្លើយបំភ្លឺ។ ប៉ុន្តែគ្មាននរណាឆ្លើយតបទេ។ អ្នកនាំពាក្យកងទ័ពអ៊ីស្រាអែលបានចេញសេចក្ដីថ្លែងការណ៍មួយមានសេចក្ដីថា «កងទ័ពអ៊ីស្រាអែលទើបតែវាយប្រហារទៅលើបញ្ជាការដ្ឋានកណ្ដាលរបស់ក្រុមហេសបូឡា ហើយវាយចំគោលដៅបានល្អណាស់។ នេះជាអ្វីដែលអ៊ីស្រាអែលត្រូវតែធ្វើជាចាំបាច់ដើម្បីការពារប្រជាជនរបស់ខ្លួន និងដើម្បីឱ្យពួកគេវិលត្រឡប់ទៅលំនៅដ្ឋានវិញដោយសុវត្ថិភាព»។
គួរកត់សម្គាល់ថាការសម្រេចចិត្តវាយប្រហារលើកនេះកើតឡើងចំពេលដែលមន្ត្រីរដ្ឋាភិបាលរបស់ប្រទេសអាមេរិកកំពុងខិតខំយ៉ាងដុតដៃដុតជើងដើម្បីបញ្ចុះបញ្ចូលឱ្យអ៊ីស្រាអែល និងក្រុមហេសបូឡាទទួលយកបទឈប់បាញ់រយៈពេល២១ថ្ងៃ។ បើមិនអីចឹងទេ សង្គ្រាមទ្រង់ទ្រាយធំនៅប្រទេសលីបង់ខាងត្បូងអាចនឹងផ្ទុះឡើងហើយ។ អ្នកវេទនាជាងគេគឺជនស៊ីវិល។
កាលពីមុន វេទនាតែប្រជាជនប៉ាឡេស្ទីននៅតំបន់ហ្កាហ្សាប៉ុណ្ណោះ។ ប៉ុន្តែឥឡូវនេះ ប្រជាជនលីបង់ក៏ជួបនឹងរឿងទុក្ខសោកដូចគ្នា។ គិតទៅត្រឹមតែរយៈពេល៥ថ្ងៃប៉ុណ្ណោះចាប់ពីថ្ងៃចន្ទដល់ថ្ងៃសុក្រសប្ដាហ៍នេះ សង្គ្រាមរវាងអ៊ីស្រាអែល និងហេសបូឡាបានឆក់យកជីវិតមនុស្សជិត៧០០នាក់ និងបង្ខំឱ្យមនុស្ស៩ម៉ឺននាក់រត់ចោលផ្ទះសម្បែងដើម្បីគេចចេញពីការប្រយុទ្ធគ្នា៕
ចែករំលែកព័តមាននេះ