ប្រទេសថៃ ៖ យោងតាមប្រភពពីសារព័ត៌មានថៃ The Nation កាលពីពេលថ្មីៗនេះ បានរាយការណ៍ថា ឧស្សាហកម្មភោជនីយដ្ឋានរបស់ប្រទេសថៃកំពុងជួបវិបត្តិធ្ងន់ធ្ងរ ហើយភោជនីយដ្ឋាន អាហារដ្ឋានជាង៦០ម៉ឺនកន្លែងទាំងតូចទាំងធំបានបិទទ្វារក្នុងរយៈពេល៣ឆ្នាំចុងក្រោយនេះ។
លោកស្រី ថានីវ៉ាន់ គុណមង្គល (Thaniwan Kulmongkol) ប្រធានសមាគមភោជនីយដ្ឋានថៃបានថ្លែងថា ភោជនីយដ្ឋានជាច្រើនមិនអាចសម្របខ្លួនទៅនឹងការផ្លាស់ប្តូរទីផ្សារនាប៉ុន្មានឆ្នាំចុងក្រោយនេះ ពិសេសអ្នកដែលប្រកាន់ខ្ជាប់គំរូអាជីវកម្មបែបប្រពៃណីកំពុងតែពិបាកកាន់តែខ្លាំង នៅក្នុងការប្រកួតប្រជែងជាមួយគូប្រជែងបែបទំនើបកម្មជាងមុន ដែលនាំឱ្យមានការខាតបង់ និងបិទទ្វារជាបន្តបន្ទាប់។
ស្ថានភាពនេះបានក្លាយទៅជាការព្រួយបារម្ភជាពិសេសសម្រាប់ភោជនីយដ្ឋានធំៗ និងហាងដែលពឹងផ្អែកលើការជួបជុំរបស់អតិថិជន ដូចជាពិធីជប់លៀងជាដើម។ ការកក់ទុកសម្រាប់កម្មវិធិបែបនេះបានធ្លាក់ចុះយ៉ាងខ្លាំង ដែលបណ្តាលឱ្យប្រាក់ចំណូលក៏ធ្លាក់ចុះយ៉ាងខ្លាំងផងដែរ។ សូម្បីតែភោជនីយដ្ឋានលំដាប់ផ្កាយ ដែលទទួលបានពានរង្វាន់ ក៏បានឃើញប្រាក់ចំណូលរបស់ពួកគេធ្លាក់ចុះផងដែរ។
ទោះបីមានបញ្ហាប្រឈមទាំងនេះក៏ដោយ ក៏ការព្យាករណ៍ពីទីភ្នាក់ងារ TTB Analytics បានបង្ហាញថា ទីផ្សារភោជនីយដ្ឋានទាំងមូលនៅក្នុងប្រទេសថៃមានតម្លៃរហូតដល់ ៦៦៩ពាន់លានបាត ដែលស្មើនឹង ២០ពាន់លានដុល្លារក្នុងឆ្នាំ ២០២៤ ដែលបង្ហាញពីសក្តានុពលដ៏រឹងមាំ ចំពេលមានការប្រកួតប្រជែងខ្លាំង។
កម្មវិធី Lineman Wongnai ដែលជាវេទិកាពាណិជ្ជកម្មអេឡិចត្រូនិកលេខ១ សម្រាប់សេវាកម្មនៅប្រទេសថៃបានរាយការណ៍ថា ភោជនីយដ្ឋានថ្មីជាង ១០ម៉ឺនកន្លែងបានបើកកាលពីឆ្នាំមុន ពោលគឺកើនឡើង ១៣.៦% ដែលនាំឱ្យចំនួនភោជនីយដ្ឋានសរុបនៅក្នុងប្រទេសថៃកើនឡើងដល់ ៦៨០,១៩០ម៉ឺនកន្លែង។ ទោះយ៉ាងណាក៏ដោយ ភោជនីយដ្ឋានប្រហែល ៥០% បានបិទក្នុងរយៈពេល៦ខែដំបូង នៃឆ្នាំនេះ។ ខណៈពេលដែលអំណាចនៃការទិញបានធ្លាក់ចុះ ទោះបីជាប្រជាជនថៃនៅតែរក្សាទម្លាប់របស់ពួកគេ ក្នុងការទទួលទានអាហារក្រៅផ្ទះ ក៏ព្រោះតែសម្ពាធសេដ្ឋកិច្ចបាននាំឱ្យពួកគេជ្រើសរើសជម្រើសការចំណាយដែលមានតម្លៃសមរម្យជាងមុន។
ដើម្បីដោះគន្លឹះសោវិបត្តិនាពេលបច្ចុប្បន្ន លោកស្រី ថានីវ៉ាន់ គុណមង្គល បានជំរុញឱ្យម្ចាស់ភោជនីយដ្ឋានទទួលយកដំណើរការតាមបច្ចេកវិទ្យាទំនើបដូចជា ទីផ្សារអនឡាញ ការគ្រប់គ្រងចំណូល-ចំណាយត្រឹមត្រូវ និងការបញ្ជាទិញតាមអ៊ីនធឺណិត។ ភាពខុសប្លែកពីគេតាមរយៈការផ្តល់ជូនម្ហូបអាហារប្លែកៗ ឬបរិយាកាសទាក់ទាញក៏ជាកត្តាសំខាន់សម្រាប់ការទាក់ទាញអតិថិជនផងដែរ។
អ្នកស្រីបានបន្តថា ការគ្រប់គ្រងការចំណាយប្រកបដោយប្រសិទ្ធភាព និងការយល់ដឹងស៊ីជម្រៅអំពីអាកប្បកិរិយាអតិថិជនគឺចាំបាច់សម្រាប់ការអភិវឌ្ឍផលិតផល និងសេវាកម្មដែលស្របនឹងទីផ្សារ។ ខណៈពេលដែលអនាគតនៃឧស្សាហកម្មភោជនីយដ្ឋាននៅក្នុងប្រទេសថៃបង្ហាញពីបញ្ហាប្រឈមដ៏សំខាន់នោះ លោកស្រីនៅតែមានសុទិដ្ឋិនិយមចំពោះទស្សនវិស័យរយៈពេលវែង ដែលជំរុញដោយទម្លាប់នៃការទទួលទានអាហាររបស់ប្រជាជនថៃចំនួន ៦០លាននាក់ និងការហូរចូលនៃភ្ញៀវទេសចរបរទេសផងដែរ៕ (ប្រភព ៖ The Nation និង VnExpress)
ចែករំលែកព័តមាននេះ