រាជធានីភ្នំពេញ ៖ ដើម្បីអស់ចម្ងល់ជុំវិញការរុះរើរដ្ឋមន្ត្រីថ្មី២រូបពីក្រសួងអធិការកិច្ច មកក្រសួងទេសចរណ៍ និងពីក្រសួងទេសចរណ៍ មកក្រសួងអធិការកិច្ច ត្រូវបានសម្តេចធិបតី ហ៊ុន ម៉ាណែត នាយករដ្ឋមន្ត្រីបានបញ្ជាក់កុំឱ្យមានមន្ទិលសង្ស័យទៀតថា…
រាជធានីភ្នំពេញ ៖ ដើម្បីអស់ចម្ងល់ជុំវិញការរុះរើរដ្ឋមន្ត្រីថ្មី២រូបពីក្រសួងអធិការកិច្ច មកក្រសួងទេសចរណ៍ និងពីក្រសួងទេសចរណ៍ មកក្រសួងអធិការកិច្ច ត្រូវបានសម្តេចធិបតី ហ៊ុន ម៉ាណែត នាយករដ្ឋមន្ត្រីបានបញ្ជាក់កុំឱ្យមានមន្ទិលសង្ស័យទៀតថា ជាយុទ្ធសាស្ត្រនៃការគ្រប់គ្រងដែលមិនត្រូវងា.ប់ក្រឡា ហើយជាការសាកល្បងប្តូរអ្នកកាន់ចង្កូត ក្រែងទទួលបានលទ្ធផលល្អជាងនេះ ។
ការលើកឡើងរបស់សម្តេចធិបតីខាងលើនេះធ្វើឡើង ក្នុងឱកាសអញ្ជើញប្រគល់សញ្ញាបត្រដល់និស្សិតជ័យលាភី ថ្នាក់បរិញ្ញាបត្រ និងថ្នាក់បរិញ្ញាបត្រជាន់ខ្ពស់នៃសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច នាថ្ងៃទី២៦ ខែកញ្ញា ឆ្នាំ២០២៤ សាលមជ្ឈមណ្ឌលសន្និបាទកោះពេជ្រ ។
និយាយដល់ការឆ្លើយឆ្លងគ្នារឿងកម្មវិធី Gumball 3000 ដែលទើបតែបញ្ចប់ថ្មីៗនេះទាក់ទិននឹងទេចរណ៍ សម្តេចធិបតី នាយករដ្ឋមន្ត្រីក៏បានឆ្លៀតយកឱកាសនេះបកស្រាយជុំវិញការរុះរើរដ្ឋមន្ត្រីពីររូប ទៅវិញទៅមកថា «ហេតុអ្វីក៏ត្រូវ reshuffle (រុះរើ) រឿងការដឹកនាំជា Managermant (អ្នកគ្រប់គ្រង) ខ្ញុំជាប្រមុខរាជរដ្ឋាភិបាល ពេលខ្លះយើងត្រូវសាកអ្នកកាន់ចង្កូតប្តូរគ្នា ដើម្បីបង្កើនល្បើនសួរថា មួយឆ្នាំនេះអត់ធ្វើ? ធ្វើច្រើន រៀបចំពិធីច្រើនណាស់ សួរអ្នកសៀមរាបទៅមួយឆ្នាំនេះគ្រាន់តែប្រជុំនៅសៀមរាប មិនចេះខ្វះ ទោះបីជាទេសចរណ៍មិនឡើង តែកិច្ចប្រជុំរុញទៅនឹងទាំងអស់» ។
សម្តេចធិបតី បញ្ជាក់បន្ថែមថា «Managermant យើងដូរ ហើយសាកល្បងរុញទៅជា Team (ក្រុម) តែមួយទេ ។ Team អាណត្តិទី៧ ប្រឹងប្រែងទាំងអស់គ្នា មិនល្អឥតខ្ចោះទេ គ្មានអ្វីធ្វើមួយថ្ងៃបាននោះទេ យើងចង់បាន តែមិនដូចចិត្ត យើងត្រូវតែពុះពាររុញតទៅទៀត ខិតខំអស់លទ្ធភាព ។
ឯកឧត្តម សុខ សូកេន ទៅជំរុញក្រសួងអធិការកិច្ច ដើម្បីចាប់ផ្តើមក្រសួង ឯកឧត្តម ហួត ហាក់ រុញមួយឆ្នាំនៅទីនោះក៏មកទីនេះ ដើម្បីផ្លាស់ប្តូរបទពិសោធន៍ រុញតទៅទៀត Team តែមួយទេ ជា Managermant យើងមិនត្រូវងា.ប់ក្រឡាទេ យើងដើរល្អហើយ ប៉ុន្តែយើងចង់សាកល្បង ក្រែងបានផលល្អជាងនេះ ធ្វើការ reshuffle» ។
សូមបញ្ជាក់ថា ឯកឧត្តមសុខ សូកេន ត្រូវបានសម្តេចតេជោ ហ៊ុន សែន ប្រមុខរដ្ឋស្តីទីកម្ពុជា ចេញព្រះរាជក្រឹត្យ កែសម្រួល និងតែងតាំងជារដ្ឋមន្ត្រីក្រសួងអធិការកិច្ច ដែលផ្លាស់ប្តូរជាមួយ ឯកឧត្តម ហួត ហាក់ ដែលត្រូវបានតែងតាំងជារដ្ឋមន្ត្រីក្រសួងទេសចរណ៍ ។ ការចេញព្រះរាជក្រឹត្យតែងតាំងនេះ បានធ្វើឡើងបន្ទាប់ពីរដ្ឋសភាអនុម័តគាំទ្រទាំងស្រុងលើការកែសម្រួលសមាសភាព រាជរដ្ឋាភិបាលចំនួន២រូបក្នុងកិច្ចប្រជុំវិសាមញ្ញ នាថ្ងៃទី២០ ខែកញ្ញា ឆ្នាំ២០២៤ ក្រោមអធិបតីភាព សម្តេច ឃួន សុដារី ប្រធានរដ្ឋសភា ដោយមានវត្តមានចូលរួមពីសមាជិក-សមាជិករដ្ឋសភា សរុប ១០៦រូប ៕
ចែករំលែកព័តមាននេះ