ដាក់ប្រព័ន្ធលូជ្រុងខ្នាតធំ តភ្ជាប់ទៅប្រឡាយបឹងសាឡាង ដើម្បីរំដោះជំនន់ទឹកភ្លៀង
រាជធានីភ្នំពេញ ៖ ការងារដាក់ប្រព័ន្ធលូ ជ្រុងខ្នាតធំ មុខកាត់ទំហំ ៤ម៉ែត្រ គុណ២ម៉ែត្រ ១ខ្សែប្រវែង ១៧៩ម៉ែត្រ លើបណ្ដោយផ្លូវ២៣០…
រាជធានីភ្នំពេញ ៖ ការងារដាក់ប្រព័ន្ធលូ ជ្រុងខ្នាតធំ មុខកាត់ទំហំ ៤ម៉ែត្រ គុណ២ម៉ែត្រ ១ខ្សែប្រវែង ១៧៩ម៉ែត្រ លើបណ្ដោយផ្លូវ២៣០ (ផ្លូវកោសដូង) ចាប់ពីភ្លើងស្តុប២៣០ កែងមហាវិថីម៉ៅសេទុង ដល់ប្រឡាយបឹងសាឡាង ក្នុងសង្កាត់បឹងសាឡាង ខណ្ឌទួលគោក ដែលបានចាប់ផ្តើមការដ្ឋានកាលពីថ្ងៃទី១៩ ខែសីហា កន្លងមក គិតមកដល់ពេលនេះ ការស្ថាបនា សម្រេចបានជាច្រើនភាគរយហើយ គ្រោងបញ្ចប់ក្នុងខែវិច្ឆិកា ២០២៤នេះ ជាមួយនឹងការអ៊ុតកៅស៊ូ ពីលើផងដែរ នៅពេលការដ្ឋានដាក់លូនេះ បានរួចរាល់ ។
មន្ត្រីជំនាញ នៃមន្ទីរសាធារណការ និងដឹកជញ្ជូនរាជធានីភ្នំពេញ បានឱ្យដឹងនៅថ្ងៃទី២៤ ខែកញ្ញានេះទៀតថា ការដ្ឋានដាក់លូខ្នាតធំនេះ ក្រោយស្ថាបនារួចរាល់ អាចនឹងរំដោះទឹកជំនន់ទឹកភ្លៀង នៅតំបន់ម៉ុងឌីយ៉ាល់ បានយ៉ាងល្អប្រសើរ នៅក្នុងរដូវវស្សា ។
មន្ត្រីដដែល បានបញ្ជាក់ថា ការដ្ឋាននេះ ស្ថិតក្នុងគម្រោងរបស់ថ្នាក់ជាតិ អនុវត្តដោយក្រុមហ៊ុន Precast Plants ដែលជាក្រុមហ៊ុន ដែលមានការផ្គត់ផ្គង់ និងដំឡើងលូជ្រុង មុខកាត់ទំហំ៤ម៉ែត្រ កំពស់២ម៉ែត្រ ។
មន្ត្រីដដែល បានបន្តទៀតថា ការដ្ឋានដាក់លូ ប្រអប់លើផ្លូវលេខ 108 BT ទំហំ ៤ម៉ែត្រ គុណនឹង ២ម៉ែត្រ មានប្រវែង១៩៧ម៉ែត្រ បានដំណើរការកាលពីខែឧសភា ដើម្បីដោះស្រាយទឹកលិច នៅតំបន់វត្តដំបូកខ្ពស់ ក្រោយផ្សារប៉េសេ ក្នុងភូមិសាស្ត្រសង្កាត់បឹងទំពុនទី១ ខណ្ឌមានជ័យ ក៏ជាគម្រោងរបស់ថ្នាក់ជាតិអនុវត្ត ដោយក្រុមហ៊ុន Precast Plants នេះដែរ ។
ដោយឡែក ការដ្ឋានដាក់លូប្រអប់ ទំហំ ៤ម៉ែត្រ គុណ ២ម៉ែត្រ នៅផ្លូវជាតិលេខ៤ ប្រវែង ៥,៦៥០ម៉ែត្រ ក្នុងសង្កាត់ចោមចៅទី៣ ខណ្ឌពោធិសែនជ័យ និងគម្រោងស្ថាបនាជញ្ជាំងបេតុង នៃប្រឡាយបារាំង ចាប់ពីផ្លូវមហាវិថី ស៊ី ជីនពីង ដល់អាកាសយានដ្ឋានអន្តរជាតិភ្នំពេញ ដែលបាននិងកំពុងអនុវត្តដោយក្រុមហ៊ុន Precast Plants នេះដែរនោះ ក៏ស្ថិតក្នុងគម្រោងផែនការវិនិយោគហេដ្ឋារចនាសម្ព័ន្ឋ ប្រព័ន្ឋលូ និងប្រព័ន្ឋរំដោះទឹក សម្រាប់បញ្ចៀសការជន់លិច ក្នុងភូមិសាស្ត្ររាជធានីភ្នំពេញ ផងដែរ ៕
ចែករំលែកព័តមាននេះ