រាជធានីភ្នំពេញ ៖ យោងតាមសេចក្តីថ្លែងការណ៍រួមរបស់បណ្តាញប្រជាជនកម្ពុជា ដើម្បីសន្តិភាពមានអង្គការ សមាគម ចំនួន១៤៩បានចេញផ្សាយកាលពីថ្ងៃទី១៦ មិថុនា ២០១១ ដែលកោះសន្តិភាពទទួលបានឱ្យដឹងថា ឆ្លើយតបចំពោះនាយករដ្ឋមន្ត្រីថៃ អាប់ភីស៊ីត វ៉េចាជីវ៉ា ដែលបានសុំឱ្យគណៈកម្មាធិការបេតិកភណ្ឌពិភពលោកពន្យារពេលលើផែនការអភិរក្ស និងអភិវឌ្ឍន៍តំបន់ប្រាសាទព្រះវិហារ និងការចុះបញ្ជីប្រាសាទព្រះវិហារជាបេតិកភណ្ឌពិភពលោក រួមគ្នានោះ។ យើងសូមសម្តែងការសោកស្តាយ «ចំពោះការលើកឡើងរបស់នាយករដ្ឋមន្ត្រីថៃ ដែលបានប្រាប់សារព័ត៌មានថៃ កាលពីថ្ងៃទី១៥ មិថុនា ២០១១ ទាំងងងឹតងងល់ មិនយល់ច្បាប់អន្តរជាតិ និងរំលោភសាលដីកាតុលាការយុត្តិធម៌អន្តរជាតិ»។
បណ្តាញប្រជាជនកម្ពុជា ដើម្បីសន្តិភាព លើកឡើងថា យើងតំណាងបណ្តាញប្រជាជនកម្ពុជា ដើម្បីសន្តិភាព (CPNP) មានសមាជិកអង្គការ សមាគមមិនមែនរដ្ឋាភិបាល និងសហជីពនៅកម្ពុជាចំនួន១៤៩សម្តែងការសោកស្តាយចំពោះ នាយករដ្ឋមន្ត្រីថៃ លោកអាប់ភីស៊ីត បានបញ្ជាទៅគណៈប្រតិភូថៃ ដែលទៅប្រជុំគណៈកម្មាធិការបេតិកភណ្ឌពិភពលោកប្រចាំឆ្នាំពីថ្ងៃទី១៩ ដល់ថ្ងៃទី២៩ មិថុនា ២០១១ នៅប្រទេសបារាំងឱ្យដាក់ជូនគណៈកម្មាធិការបេតិកភណ្ឌពិភពលោកធ្វើយ៉ាងណា «ពន្យារពេលវេលា និងមិនឱ្យពិចារណានូវគម្រោងអភិវឌ្ឍន៍ និងអភិរក្សតំបន់ប្រាសាទព្រះវិហាររបស់ប្រទេសកម្ពុជា និងដកចេញការចុះបញ្ជីប្រាសាទព្រះវិហារជាបេតិកភណ្ឌពិភពលោក ឬឱ្យចុះបញ្ជីរួមគ្នា»។ បណ្តាញប្រជាជនកម្ពុជា ដើម្បីសន្តិភាពសូមបញ្ជាក់ថា សាលដីកាតុលាការយុត្តិធម៌អន្តរជាតិថ្ងៃទី១៥ មិថុនា ១៩៦២ បានកំណត់បង្ហាញច្បាស់លាស់ណាស់អំពីប្រាសាទព្រះវិហារស្ថិតក្នុងអធិបតេយ្យរបស់កម្ពុជា។
គួរបញ្ជាក់ថា លោកឧបនាយករដ្ឋមន្ត្រីសុខ អាន បានដឹកនាំគណៈប្រតិភូវប្បធម៌ បេតិកភណ្ឌមួយក្រុមអញ្ជើញចូលរួមប្រជុំអង្គការយូណេស្កូប្រចាំឆ្នាំលើកទី៣៥ នៅទីក្រុងប៉ារីស ប្រទេសបារាំង ដែលការចាកចេញនេះនឹងធ្វើឡើងនៅវេលាម៉ោងជាង៥ល្ងាចថ្ងៃទី១៧ មិថុនា២០១១។ សូមបញ្ជាក់ថា កិច្ចប្រជុំប្រចាំឆ្នាំរបស់អង្គការយូណេស្កូនេះនឹងចាប់ផ្តើមពីថ្ងៃទិ១៩ ដល់២៩ មិថុនា ២០១១ បន្តពីកិច្ចប្រជុំនៅទីក្រុងប្រេស៊ីលាន ប្រទេសប្រេស៊ីល កាលពីឆ្នាំទៅ។ កិច្ចប្រជុំនេះនឹងអនុញ្ញាតឱ្យបណ្តាប្រទេសនីមួយៗបង្ហាញពីភាពរងគ្រោះរបស់បេតិកភណ្ឌ ការខូចខាត ការរអភិរក្ស និងការអភិវឌ្ឍ ហើយក្រុមជំនាញបេតិកភណ្ឌពិភពលោកនឹងរិះរកវិធីសាស្ត្រធ្វើយ៉ាងណាឱ្យបេតិកភណ្ឌនៃបណ្តាប្រទេសនីមួយៗរឹតតែប្រសើរឡើង។ ចំណែកប្រទេសកម្ពុជាក៏គ្រោងនឹងបង្ហាញពីផែនការអភិរក្ស និងអភិវឌ្ឍន៍លើប្រាសាទព្រះវិហារផងដែរ។
សូមរំឭកឡើងវិញថា ថៃបានសុំឱ្យបង្អាក់ផែនការអភិវឌ្ឍន៍ប្រាសាទព្រះវិហាររបស់កម្ពុជាជាច្រើនលើកច្រើនសាទៅអង្គការយូណេស្កូ ប៉ុន្តែលោកស្រីអ៊ីរីណា បូកូវ៉ា អគ្គនាយកអង្គការយូណេស្កូមិនបានយល់ព្រមតាមសំណើរបស់ថៃនោះទេ ហើយការប្រជុំនៅអង្គការយូណេស្កូ នាទីក្រុងប៉ារីស ប្រទេសបារាំង រយៈពេល២ថ្ងៃកន្លងមក គឺថ្ងៃទី២៦ និង២៧ ឧសភា ២០១១ នោះ មិនបានទទួលលទ្ធផលអ្វីទេ ដោយកំពុងស្ថិតនៅក្នុងការពិចារណា ហើយត្រូវរង់ចាំការសម្រេចនៅក្នុងកិច្ចប្រជុំលើកទី៣៥ ថ្ងៃទី១៩ដល់២៩ មិថុនានេះ។
កិច្ចប្រជុំនៅអង្គការយូណេស្កូរវាងកម្ពុជា-ថៃ និងអង្គការយូណេស្កូ ស្តីពីផែនការអភិវឌ្ឍន៍ប្រាសាទព្រះវិហារកន្លងមកនោះ គឺមិនមានការប្រកាសព័ត៌មានអ្វី និងមិនមានការចេញសេចក្តីថ្លែងការណ៍អ្វីទាំងអស់ ។ ផ្ទុយទៅវិញ លោកស្រីអគ្គនាយកបានសម្តែងការសោកស្តាយ និងមិនសប្បាយចិត្ត ចំពោះអត្តចរិត ច្រឡើសបើសរបស់ថៃ យ៉ាងខ្លាំងក្លាទៀតផង ហើយអ្វីដែលថា អង្គការយូណេស្កូយល់ព្រមតាមសំណើរបស់ថៃនោះគឺជាការប្រឌិតទាំងស្រុង ។
បើយោងតាមបណ្តាញផ្សព្វផ្សាយរបស់ថៃចេញផ្សាយនៅរសៀលថ្ងៃសុក្រ ទី២៧ ឧសភា ២០១១ កន្លងទៅនេះថា អង្គការយូណេស្កូបានឯកភាពតាមសំណើរបស់ថៃក្នុងការសុំឱ្យផ្អាកផែនការអភិរក្ស និងអភិវឌ្ឍន៍ប្រាសាទព្រះវិហារ ។ ប៉ុន្តែបើការយល់ព្រមនេះចូលជាផ្លូវការមែននោះ គឺអង្គការយូណេស្កូខ្វះគតិយុត្តិពន់ពេកណាស់ និងបានរំលោភលើអធិបតេយ្យភាពរបស់កម្ពុជា ដែលជាម្ចាស់ប្រាសាទយ៉ាងខ្លាំង រំលោភលើផែនទីឧបសម្ព័ន្ធ១នាឆ្នាំ១៩០៧ និង១៩០៨ ដែលជាផែនទីកំណត់ព្រំដែនអន្តរជាតិ ហ៊ុមព័ទ្ធប្រាសាទព្រះវិហារ និងផ្ទៃដីជុំវិញប្រាសាទ ស្ថិតក្នុងប្រទេសកម្ពុជា និងរំលោភលើសាលក្រមតុលាការយុត្តិធម៌អន្តរជាតិដែលបានកំណត់ឱ្យប្រាសាទព្រះវិហារ និងផ្ទៃដីជុំវិញប្រាសាទជារបស់កម្ពុជា។
ក្រុមអ្នកច្បាប់ដែលតាមដានករណី ប្រាសាទព្រះវិហារបានលើកឡើងថា ប្រសិនបើលោកស្រីអ៊ីរីណា បូកូវ៉ា អគ្គនាយកអង្គការយូណេស្កូដាក់កំណត់ថា «រង់ចាំឱ្យប្រទេសទាំង២ ព្រមព្រៀងគ្នាបោះបង្គោលព្រំដែនឱ្យរួចរាល់សិន ទើបតម្រូវឱ្យមានការអភិវឌ្ឍន៍នោះ» គឺជាការជឿជាក់ទៅលើការសន្យាខ្យល់របស់សៀមតែប៉ុណ្ណោះ ព្រោះសៀមមិនដែលគោរពកិច្ចសន្យារបស់ខ្លួនទេ ហើយសៀមក៏មិនដែលមានចេតនាចង់បោះបង្គោលព្រំដែនដែរ ព្រោះចក្ខុវិស័យរបស់សៀមគឺថាបើសៀមហ៊ានបោះបង្គោលព្រំដែនសៀមច្បាស់ជាមិនអាចរំលោភយកទឹកដីកម្ពុជាបានទេ…ជាក់ស្តែងផែនទីសន្ធិសញ្ញាអន្តរជាតិឆ្នាំ១៩០៧ និងឆ្នាំ១៩០៨ បារាំង-សៀម ក៏សៀមមិនគោរពដែរ ហើយសូម្បីតែដាក់អ្នកសង្កេតការណ៍ឥណ្ឌូណេស៊ីមកលើតំបន់ឈ្លានពាន ដើម្បីពិនិត្យវាយតម្លៃឈានទៅដោះស្រាយដោយសន្តិវិធីក៏សៀមមិនព្រមដែរ ។
ក្រៅពីនេះនៅមានទៀត ដូចជាកិច្ចព្រមព្រៀងលើអនុស្សរណៈស្តីពីកិច្ចការព្រំដែនចំនួន៣ ដែលសៀមធ្វើឡើងជាមួយកម្ពុជានេះ ក៏សៀមព្យាយាមបង្កកការអនុវត្តដែរ គឺកប់ទុកត្រឹមសភាសៀមតែម្តង ។ តួយ៉ាងកិច្ចព្រមព្រៀងជាកញ្ចប់លើវិធាន៦ចំណុចរវាងរដ្ឋមន្ត្រីការបរទេសកម្ពុជា និងរដ្ឋមន្ត្រីការបរទេសសៀម ក្រោមការសម្របសម្រួលពីរដ្ឋមន្ត្រីការបរទេសឥណ្ឌូណេស៊ី និងជាប្រធានអាស៊ានផងនោះ ក៏សៀមមិនទាន់ចុះហត្ថលេខាដែរ…ដូច្នេះតើលោកស្រីអគ្គនាយកអង្គការយូណេស្កូមានហេតុផលអ្វីទៅជឿលើការសន្យារខ្យល់របស់សៀមនោះ។
គួររំឭកទៀតថា នៅក្នុងសង្គ្រាមព្រំដែនដែលបង្កឡើងដោយការឈ្លានពានរបស់សៀមកាលពីថ្ងៃទី៤ ដល់ថ្ងៃទី៧ កុម្ភៈ ២០១១ កន្លងមកនេះ ប្រាសាទព្រះវិហារបានទទួលរងនូវគ្រាប់កាំភ្លើងធំរបស់ទាហានសៀមចំនួន៤១៤គ្រាប់ និងគ្រាប់កាំភ្លើងធុនតូច និងមធ្យម និងគ្រាប់បែកចង្កោម ជាច្រើនពាន់គ្រាប់ទៀត ។ ដូច្នេះពិភពលោកត្រូវចាប់បង្ខំឱ្យភាគីសៀមត្រូវតែទទួលខុសត្រូវចំពោះការប្រឆាំងនឹងអង្គការយូណេស្កូ សហគមន៍អន្តរជាតិ និងការបំផ្លាញប្រាសាទព្រះវិហារដែលត្រូវបានចុះបញ្ជីជាសម្បត្តិបេតិកភណ្ឌពិភពលោកកាលពីថ្ងៃទី៧ កក្កដា ២០០៨ កន្លងមក ៕
ចែករំលែកព័តមាននេះ