ទីក្រុងយេរូសាឡឹម៖ ប្រទេសអាមេរិកប្រកាសថាខ្លួនត្រៀមបញ្ជូនកងទ័ពទៅតំបន់មជ្ឈិមបូព៌ាដើម្បីការពារផលប្រយោជន៍ជាតិរបស់ខ្លួននៅពេលសង្គ្រាមរវាងអ៊ីស្រាអែល និងហេសបូឡាចាប់ផ្ដើមផ្ទុះឡើងនៅក្នុងទ្រង់ទ្រាយធំ។ សង្គ្រាមនេះស្រួលមិនស្រួលអាចនឹងផ្ទុះឡើងមិនត្រឹមតែនៅលីបង់ និងអ៊ីស្រាអែលប៉ុណ្ណោះទេ ប៉ុន្តែអាចនឹងរីករាលដាលទូទាំងមជ្ឈិមបូព៌ា។
មន្ទីរបញ្ចកោណប្រកាសថាកងទ័ពអាមេរិកបន្ថែមទៀតនឹងដាក់ពង្រាយបន្ថែមពីលើកងទ័ពអាមេរិកដែលមានស្រាប់ចំនួន៤ម៉ឺននាក់នៅមជ្ឈិមបូព៌ា។ ក្រៅពីនេះ អាមេរិកក៏ត្រៀមបញ្ជូននាវា និងយន្តហោះចម្បាំងរាប់សិបគ្រឿងបន្ថែមទៀតផងដែរ។ ចំណាត់ការនេះធ្វើឡើងបន្ទាប់ពីអ៊ីស្រាអែលវាយប្រហារខ្លាំងៗតាមអាកាសចូលកាន់តែជ្រៅទៅក្នុងប្រទេសលីបង់។
ក្រសួងការបរទេសអាមេរិកប្រកាសឱ្យពលរដ្ឋរបស់ខ្លួនទាំងអស់ប្រញាប់ចាកចេញពីប្រទេសលីបង់។ ភាពតានតឹងបានឈានដល់កម្រិតខ្ពស់បំផុតដូចទឹកពុះ១០០អង្សាកាលពីមួយសប្ដាហ៍មុននេះ ហើយរឹតតែធ្ងន់ធ្ងរបន្ថែមទៀតក្រោយហេតុការណ៍ផ្ទុះឧបករណ៍ផ្ញើសារ និងវិទ្យុទាក់ទងនៅទូទាំងប្រទេសលីបង់កាលពីថ្ងៃអង្គារ និងថ្ងៃពុធសប្ដាហ៍មុន។ ឧបករណ៍ទាំង២នេះប្រើប្រាស់ដោយយុទ្ធជន និងមន្ត្រីគ្រប់លំដាប់ថ្នាក់របស់ក្រុមហេសបូឡា ហើយធ្វើឱ្យពួកគេស្លាប់យ៉ាងតិច៣៧នាក់ និងរបួស៣ពាន់នាក់។ អ៊ីរ៉ង់, លីបង់ និងហេសបូឡាចាត់ទុកថានេះជាស្នាដៃរបស់អ៊ីស្រាអែលយ៉ាងពិតប្រាកដ។
តាមពិត ការវាយប្រហារកើតឡើងតាំងពីយប់ថ្ងៃសៅរ៍នៅពេលអ៊ីស្រាអែលបើកយុទ្ធនាការទម្លាក់គ្រាប់បែកទៅលើមូលដ្ឋានរបស់ក្រុមហេសបូឡា និងបាញ់កម្ទេចជើងទម្របាញ់កាំជ្រួចហ្វូងមួយរយគ្រឿងដែលអ៊ីស្រាអែលអះអាងថានេះជាការវាយប្រហារការពារខ្លួនទុកជាមុន ខណៈដែលហេសបូឡាចង់ប្រើប្រាស់អាវុធទាំងនេះដើម្បីសងសឹកទៅលើអ៊ីស្រាអែលនៅក្នុងករណីផ្ទុះឧបករណ៍ខាងលើ។ នៅយប់ថ្ងៃសៅរ៍ ហេសបូឡាអះអាងថាខ្លួនបាញ់រ៉ុកកែត១០០គ្រាប់ចូលទឹកដីអ៊ីស្រាអែល។
អ្វីដែលជាចំណាប់ផ្ដើមនៃសង្គ្រាមទ្រង់ទ្រាយធំគឺការវាយប្រហារគ្នាកាលពីថ្ងៃចន្ទ។ ត្រឹមតែប៉ុន្មានម៉ោងប៉ុណ្ណោះ យុទ្ធនាការវាយប្រហារតាមអាកាសទៅលើប្រទេសលីបង់ឆក់យកជីវិតមនុស្សជាង២៧០នាក់ និងរបួសជាង៧០០នាក់។ អ៊ីស្រាអែលអះអាងថាហេសបូឡាបាញ់រ៉ុកកែតរាប់ម៉ឺនគ្រាប់។ ប៉ុន្តែប្រព័ន្ធការពារដែនអាកាសរបស់ខ្លួនអាចបាញ់ទម្លាក់បានភាគច្រើន។
រដ្ឋាភិបាលរបស់លោកបៃដិនប្រាប់អ៊ីស្រាអែលថាបើសង្គ្រាមនេះផ្ទុះឡើងកាន់តែខ្លាំងគ្មានផលចំណេញសម្រាប់អ៊ីស្រាអែលទេ។ ដូច្នេះ គួរណាស់ងាកមករកការដោះស្រាយផ្នែកការទូតវិញល្អជាង។ នៅសេតវិមាន លោកបៃដិនបញ្ជាក់ថាលោកនឹងធ្វើអ្វីៗគ្រប់បែបយ៉ាងទៅតាមលទ្ធភាពដែលអាចធ្វើបានដើម្បីទប់ស្កាត់មិនឱ្យភ្លើងសង្គ្រាមឆាបឆេះកាន់តែខ្លាំង។លោកថ្លែងប្រាប់អ្នកសារព័ត៌មានថាយើងនឹងពិភាក្សាគ្នាអំពីការបញ្ចប់សង្គ្រាមនៅតំបន់ហ្កាហ្សា និងបញ្ហាដទៃទៀតនៅក្នុងតំបន់។
ក្រសួងការបរទេសអាមេរិកថ្លែងថាសង្គ្រាមអាចនឹងផ្ទុះឡើងហួសពីការស្មាន។ ដូច្នេះ ស្ថានទូតអាមេរិកអំពាវនាវឱ្យពលរដ្ឋរបស់ខ្លួនទាំងអស់ចាកចេញពីប្រទេសលីបង់ជាបន្ទាន់នៅពេលដែលមិនទាន់ហួសពេល, នៅពេលសង្គ្រាមទើបតែផ្ទុះឡើងថ្មីៗ និងនៅពេលយន្តហោះដឹកអ្នកដំណើររបស់ក្រុមហ៊ុនឯកជននៅអាចឆ្លៀតហោះចូលប្រទេសលីបង់ដើម្បីដឹកមនុស្ស។
អាមេរិកដាក់ពង្រាយកងទ័ព និងនាវាចម្បាំងនៅសមុទ្រមេឌីទែរ៉ាណេខាងកើត និងឈូងសមុទ្រអូម៉ង់ (Oman)តាំងពីយូរមកហើយ។ គ្រាន់តែថាក្រោយពេលផ្ទុះសង្គ្រាមនៅតំបន់ហ្កាហ្សាកាលពីខែតុលា ឆ្នាំ២០២៣ អាមេរិកបន្ថែមកងទ័ពរហូតដល់៤ម៉ឺននាក់។ បន្ទាប់ពីដកនាវាដឹកយន្តហោះ១គ្រឿងទៅអាស៊ីប៉ាស៊ីហ្វិក អាមេរិកសព្វថ្ងៃនេះនៅសល់នាវាដឹកយន្តហោះ១គ្រឿងនៅមជ្ឈិមបូព៌ា, នៅសល់នាវាពិឃាតឈរជើងនៅសមុទ្រក្រហម និងនៅសល់នាវាចម្បាំង៦គ្រឿងនៅសមុទ្រមេឌីទែរ៉ាណេ៕
ចែករំលែកព័តមាននេះ