ទីក្រុងយេរូសាឡឹម៖ សង្គ្រាមទ្រង់ទ្រាយធំចាប់ផ្ដើមផ្ទុះឡើងជាបណ្ដើរៗហើយរវាងអ៊ីស្រាអែល និងក្រុមហេសបូឡាទោះបីសហគមន៍អន្តរជាតិ និងប្រទេសមហាអំណាចខិតខំទប់ស្កាត់យ៉ាងណាក្ដី។ ចំនួនអ្នកស្លាប់ដោយសារការវាយប្រហាររបស់អ៊ីស្រាអែលទៅលើប្រទេសលីបង់ភាគខាងត្បូងដែលជាសម្បុករបស់ក្រុមហេសបូឡាបានឆក់យកជីវិតមនុស្សរាប់រយនាក់។
គេមិនទាន់ដឹងថាតើជនស៊ីវិលស្លាប់ប៉ុន្មាននាក់ និងយុទ្ធជនរបស់ហេសបូឡាស្លាប់ប៉ុន្មាននាក់ទេ។ អ៊ីស្រាអែលអះអាងថាទីតាំងវាយប្រហារទាំងនោះសុទ្ធតែជាមូលដ្ឋានយោធារបស់ក្រុមហេសបូឡា។ ប៉ុន្តែបើគេពិនិត្យជាក់ស្ដែងភាគច្រើនជាផ្ទះរបស់ជនស៊ីវិល។ អ៊ីស្រាអែលបន្តវាយប្រហារតាមអាកាសទៅលើប្រទេសលីបង់ភាគខាងត្បូង និងភាគខាងកើត បង្កជាផ្សែងក្រាស់ឃ្មឹកហោះហើរខ្មួលខ្មាញ់ទៅលើអាកាស។ ជនស៊ីវិលមិនអាចបន្តរស់នៅទីនោះបានតទៅទៀតឡើយ។
ពួកគេត្រូវតែវេចសម្ពាយ ដឹកកូនជញ្ជូនចៅ ចាកចេញជាបន្ទាន់។ ទិដ្ឋភាពនេះធ្វើឱ្យគេនឹកឃើញទៅដល់ព្រឹត្តិការណ៍សង្គ្រាមរវាងអ៊ីស្រាអែល និងហេសបូឡាកាលពីឆ្នាំ២០០៦ដែលបណ្ដាលឱ្យស្លាប់មនុស្សយ៉ាងរង្គាល។ ប៉ុន្តែសង្គ្រាមលើកនេះមើលមិនឃើញ ថាមិនត្រូវឡើយ។ ហេងស៊យអាចនឹងផ្ទុះឡើងខ្លាំងជាងពេលនោះទៅទៀតក៏អាចថាបានដែរ។
អ្នកខ្លះចាត់ទុកភ្លើងសង្គ្រាមនៅថ្ងៃចន្ទថាមានសភាពខ្លាំងក្លាជាងសង្គ្រាមឆ្នាំ២០០៦ទៅទៀត។ កាលនោះ ភាគីទាំងពីរវាយប្រហារគ្នាដោយកងទ័ពជើងគោក ជើងទឹក និងជើងអាកាស ធ្វើឱ្យប្រទេសលីបង់រងគ្រោះយ៉ាងដំណំ។ គេប៉ាន់ស្មានថាមនុស្សលើសពី១១០០នាក់បានស្លាប់មុនពេលភាគីទាំង២យល់ព្រមបញ្ចប់សង្គ្រាម និងចុះហត្ថលេខាលើបទឈប់បាញ់។
ក្រោយការវាយប្រហាររបស់ក្រុមហាម៉ាស់ទៅលើអ៊ីស្រាអែលកាលពីថ្ងៃទី៧ ខែតុលា ឆ្នាំ២០២៣ ក្រុមហេសបូឡាចាប់ផ្ដើមដើរចេញពីកិច្ចព្រមព្រៀងនោះ ហើយចាប់ផ្ដើមដុតបញ្ឆេះសង្គ្រាមនៅតាមព្រំដែនដើម្បីបង្ហាញការគាំទ្រចំពោះហាម៉ាស់។ កាលពីពេលកន្លងមក ការប៉ះទង្គិចគ្នារប៉េះរប៉ោះតាមព្រំដែនច្រើនកើតឡើងនៅក្នុងរង្វង់៤គីឡូម៉ែត្រនៃព្រំដែនប្រទេសទាំង២។
លើកនេះមិនមែនជាការប៉ះទង្គិចគ្នាទេ ប៉ុន្តែជាសង្គ្រាមទ្រង់ទ្រាយធំតែម្ដងបន្ទាប់ពីអ៊ីស្រាអែលកាលពីថ្ងៃអង្គារសប្ដាហ៍មុនបានអនុម័តជាផ្លូវការទៅលើការធ្វើមាតុភូមិនិវត្តជនជាតិអ៊ីស្រាអែលដែលបានផ្លាស់ប្ដូរទីលំនៅទៅនៅតំបន់ខាងជើងនោះត្រឡប់មកវិញ។ ចាប់តាំងពីពេលនោះមក អ៊ីស្រាអែលវាយប្រហារក្រុមហេសបូឡាកាន់តែខ្លាំងឡើងៗ។ វាយប្រហារទីតាំងយោធាមិនថ្វីទេ ប៉ុន្តែគេសង្កេតឃើញថាទីតាំងរងការវាយប្រហារពីអ៊ីស្រាអែលភាគច្រើនមានជនស៊ីវិលរស់នៅជាច្រើន។
អ៊ីរ៉ង់ព្រមានអ៊ីស្រាអែលថានឹងទទួលរងផលវិបាកធ្ងន់ធ្ងរ
រដ្ឋាភិបាលអ៊ីរ៉ង់ចេញសេចក្ដីព្រមានធ្ងន់ៗថាអ៊ីស្រាអែលនឹងទទួលរងផលវិបាកធ្ងន់ធ្ងរក្រោយការវាយប្រហារមួយប្រាវកាលពីថ្ងៃចន្ទបណ្ដាលឱ្យស្លាប់មនុស្សជាង២៧០នាក់។ អ្នកនាំពាក្យក្រសួងការបរទេសអ៊ីរ៉ង់ លោកណាស៊ែ ខាណានី (Nasser Kanaani) ប្រកាសថ្កោលទោសការវាយប្រហាររបស់អ៊ីស្រាអែលជាទម្ងន់។ លោកចាត់ទុកថានេះជាទង្វើដ៏ឆ្កួតលេលា។
អ្នកនាំពាក្យរូបនេះក៏ឆ្លៀតរិះគន់ប្រទេសអាមេរិកយ៉ាងចាស់ដៃផងដែរដែលបន្តគាំទ្រអ៊ីស្រាអែលដើម្បីប្រព្រឹត្តអំពើឧក្រិដ្ឋនៅលើទឹកដីប៉ាឡេស្ទីន។ លោកចាត់ទុកថាការដែលអ៊ីស្រាអែលពង្រីកសង្គ្រាមចូលប្រទេសលីបង់ជាសក្ខីភាពបញ្ជាក់ថាសន្តិភាព និងសន្តិសុខនៅក្នុងតំបន់ និងនៅលើឆាកអន្តរជាតិកំពុងទទួលរងការគំរាមកំហែងយ៉ាងធ្ងន់ធ្ងរ។ ដូច្នេះ លោកបានអំពាវនាវយ៉ាងទទូចឱ្យក្រុមប្រឹក្សាសន្តិសុខអង្គការសហប្រជាជាតិចាត់វិធានការជាបន្ទាន់ដើម្បីបញ្ឈប់អំពើឧក្រិដ្ឋទាំងនេះ៕
ចែករំលែកព័តមាននេះ