ទីក្រុងកូឡុំបូ៖ នៅទីបំផុត ប្រទេសស្រីលង្ការកបានប្រធានាធិបតីថ្មីហើយ។ គាត់ឈ្មោះអនុរក្ស កុមារា ឌីសាណាយ៉ាកេ (Anura Kumara Dissanayake) ជាអ្នកនយោបាយនិយមតាមទ្រឹស្ដីរបស់កាល់ម៉ាក្ស។…
ទីក្រុងកូឡុំបូ៖ នៅទីបំផុត ប្រទេសស្រីលង្ការកបានប្រធានាធិបតីថ្មីហើយ។ គាត់ឈ្មោះអនុរក្ស កុមារា ឌីសាណាយ៉ាកេ (Anura Kumara Dissanayake) ជាអ្នកនយោបាយនិយមតាមទ្រឹស្ដីរបស់កាល់ម៉ាក្ស។ ដូច្នេះ លោកកំពុងមានសង្ឃឹមថានឹងអនុវត្តកម្មវិធីនយោបាយកម្ចាត់អំពើពុករលួយឱ្យដល់ឫសគល់ និងខិតខំស្ដារសេដ្ឋកិច្ចជាតិដែលលិចលង់ដោយសារវិបត្តិហិរញ្ញវត្ថុ។
លោកឌីសាណាយ៉ាកេ (Dissanayake)សព្វថ្ងៃនេះមានអាយុ៥៥ឆ្នាំ មិនធ្លាប់មានសែស្រឡាយ ឬឈាមជ័រជាអ្នកនយោបាយទេ។ លោកមានជំនឿថារដ្ឋាភិបាលថ្មីអាចស្ដារស្ថានការណ៍ឡើងវិញ និងខិតខំធ្វើឱ្យមានស្ថិរភាពនយោបាយដើម្បីសម្លឹងទៅរកអនាគតកាល។ លោកយល់ថាឡើងកាន់អំណាចលើកនេះមិនមែនដើម្បីលាភសក្ការៈផ្ទាល់ខ្លួនទេ ប៉ុន្តែជាបន្ទុកដ៏ធំមួយដែលលោកត្រូវរ៉ាប់រងធ្វើ។
លទ្ធផលឆ្នោតលើកនេះជាសាលក្រមកាត់ក្ដីចំពោះរបបដឹកនាំរបស់ប្រធានាធិបតីចាំផ្ទះបច្ចុប្បន្ន (លោកវីក្រឹមមេស៊ីង -Wickremesinghe) ដែលឡើងមកកាន់អំណាចចំពេលស្ថានការណ៍ក្រឡាប់ចាក់, ប្រទេសជាតិជំពាក់បំណុលវ័ណ្ឌក និងសេដ្ឋកិច្ចទន់ខ្សោយ។ ប្រជាជនមិនពេញចិត្តនឹងការដឹកនាំរបស់លោកទេ។ លទ្ធផលបោះឆ្នោតនៅជុំទីបីបង្ហាញថាគាត់ទទួលបានសំឡេងគាំទ្រ១៧%, លោកឌីសាណាយ៉ាកេទទួលបាន៤២,៤% និងបេក្ខជនម្នាក់ទៀតទទួលបាន៣២,៨%។
នេះជាលើកទី១នៅក្នុងប្រវត្តិសាស្ត្ររបស់ខ្លួនដែលស្រីលង្ការៀបចំការបោះឆ្នោតជម្រុះជុំទី២។ មូលហេតុដោយសារតែគ្មានបេក្ខជនណាម្នាក់ទទួលបានសំឡេងគាំទ្រ៥០%។ យោងតាមរូបមន្តនៃការបោះឆ្នោតនៅស្រីលង្កា អ្នកបោះឆ្នោតម្នាក់ៗកាន់សន្លឹកឆ្នោតបីសន្លឹកនៅក្នុងដៃដើម្បីជ្រើសរើសបេក្ខជនដែលខ្លួនពេញចិត្ត។ បើបេក្ខជននីមួយៗទទួលបានសំឡេងគាំទ្រមិនគ្រប់៥០%នៅជុំទី១ទេ គេនឹងសម្រាំងយកបេក្ខជន២រូបដែលមានសំឡេងឆ្នោតខ្ពស់ដាច់គេ ហើយផ្គូផ្គងគ្នា។
បើបេក្ខជនរូបណាទទួលបានសំឡេងឆ្នោតច្រើនជាងម្នាក់ទៀតត្រូវចាត់ទុកថាជាអ្នកឈ្នះឆ្នោត។ ដូច្នេះ នៅវគ្គទី២នេះ ទោះបីមិនទទួលបានគ្រប់៥០%ក៏នៅតែឈ្នះឆ្នោតដែរ។ នៅក្នុងការបោះឆ្នោតលើកនេះមានប្រជាជន១៧លាននាក់ទៅបោះឆ្នោតឬស្មើនឹង៧៥%នៃអ្នកដែលបានទៅចុះឈ្មោះបោះឆ្នោតសរុប។ នេះបើយោងតាមគណៈកម្មការរៀបចំការបោះឆ្នោត។
ដោយសារលោកឌីសាណាយ៉ាកេដែលទើបតែឈ្នះឆ្នោតថ្មីនេះជាអ្នកកាល់ម៉ាក្សនិយម ដូច្នេះ ស្ថាប័នដែលផ្ដល់ឥណទានឱ្យប្រទេសស្រីលង្កាកំពុងតែបារម្ភថាតិចលោរដ្ឋាភិបាលថ្មីមិនទទួលស្គាល់បំណុលដែលទើបតែឱ្យខ្ចី២៥ពាន់លានដុល្លារនោះទៅ? ប៉ុន្តែកាលពីពេលឃោសនាបោះឆ្នោត បេក្ខជនរូបនេះសន្យាថាបើទុកជាមានអ្វីប្រែប្រួលក៏រដ្ឋាភិបាលមិនធ្វើអ្វីជាអត្តនោម័តទេ។ រដ្ឋាភិបាលនឹងពិគ្រោះគ្នាជាមួយមូលនិធិរូបិយវត្ថុអន្តរជាតិ (IMF)។ ម៉្យាងទៀត លោកក៏បានសន្យាដោយប្រាកដប្រជាថានឹងទូទាត់លុយទៅម្ចាស់បំណុលវិញ៕
ចែករំលែកព័តមាននេះ