សហរដ្ឋអាមេរិក ៖ សហជីពមួយក្នុងចំណោមសហជីពដ៏មានឥទ្ធិពលបំផុតរបស់សហរដ្ឋអាមេរិក ដែលមានឈ្មោះថា International Brotherhood of Teamsters បានប្រកាសបដិសេធធ្វើបដ្ឋិលេខ ឬចារលើកិច្ចព្រមព្រៀងណាមួយពីប្រធានាធិបតីអាមេរិកជាលើកដំបូង…
សហរដ្ឋអាមេរិក ៖ សហជីពមួយក្នុងចំណោមសហជីពដ៏មានឥទ្ធិពលបំផុតរបស់សហរដ្ឋអាមេរិក ដែលមានឈ្មោះថា International Brotherhood of Teamsters បានប្រកាសបដិសេធធ្វើបដ្ឋិលេខ ឬចារលើកិច្ចព្រមព្រៀងណាមួយពីប្រធានាធិបតីអាមេរិកជាលើកដំបូង ចាប់តាំងពីឆ្នាំ ១៩៩៦ មក។ នេះបើយោងតាមប្រភពពី BBC និង Reuters បានចេញផ្សាយ។
សហជីពដែលមានសមាជិកប្រហែល១.៣លាននាក់ ទូទាំងសហរដ្ឋអាមេរិក និងប្រទេសកាណាដា ដែលមានលោក Sean O’Brien ជាប្រធាន បានប្រកាសថា សហជីពបានទទួលការប្តេជ្ញាចិត្តមួយចំនួនលើបញ្ហាធំៗពីបេក្ខជនមកពីគណបក្សប្រជាធិបតេយ្យ លោកស្រី កាម៉ាឡា ហារីស (Kamala Harris) និងបេក្ខជនមកពីគណបក្សសាធារណរដ្ឋ លោក ដូណាល់ ត្រាំ (Donald Trump)។
សហជីពក៏បានអះអាងថា ការស្ទង់មតិពីសមាជិកបានឃើញថា មិនមានការគាំទ្រច្បាស់លាស់សម្រាប់ទាំងលោកស្រី ហារីស និងលោក ត្រាំ នៅក្នុងការប្រជែងតំណែងប្រធានាធិបតីអាមេរិក បើទោះបីជាការស្ទង់មតិ២លើកនាពេលថ្មីៗនេះបង្ហាញពីការគាំទ្រចំពោះលោក ត្រាំ យ៉ាងណាក៏ដោយ។
ការផ្លាស់ប្តូរនេះ គឺជាការវាយប្រហារដ៏ធំមួយចំពោះកិច្ចខិតខំប្រឹងប្រែងរបស់យុទ្ធនាការបោះឆ្នោតរបស់លោក ហារីស ដើម្បីទាក់ទាញម្ចាស់ឆ្នោតដែលមានវណ្ណៈការងារ ពោលគឺតិចជាង៥០ថ្ងៃ មុនការបោះឆ្នោត។ ហើយការផ្លាស់ប្តូរទៀតសោតមានសក្តានុពលក្នុងការប្រមូលផ្តុំក្រុមសហជីព Teamsters រាប់ពាន់នាក់ដែលរស់នៅ ធ្វើការ និងបោះឆ្នោតនៅក្នុងរដ្ឋដ៏សំខាន់ៗដូចជា រដ្ឋផេនស៊ីលវ៉ានី (Pennsylvania) រដ្ឋមីឈីហ្គេន (Michigan) និងរដ្ឋវីនស្កុនស៊ីន (Wisconsin)។ ប៉ុន្តែទោះយ៉ាងណា ភ្លាមៗបន្ទាប់ពីការប្រកាសនេះ ក្រុមប្រឹក្សាប្រចាំតំបន់របស់សហជីព Teamsters មួយចំនួនតំណាងឱ្យសមាជិកជាងកន្លះលាននាក់នៅក្នុងរដ្ឋមីឈីហ្គេន រដ្ឋវីនស្កុនស៊ីន រដ្ឋណេវ៉ាដា (Nevada) និងរដ្ឋកាលីហ្វ័រញ៉ា (California) បានប្រកាសថា ពួកគេនឹងគាំទ្រលោកស្រី ហារីស។
នៅក្នុងសេចក្តីថ្លែងការណ៍មួយបង្ហាញថា យុទ្ធនាការលោកស្រី ហារីស បានបង្ហាញពីការគាំទ្រភាគច្រើនលើសលប់លើការរៀបចំប្រព័ន្ធការងារ ហើយបានកត់សម្គាល់ថាពលរដ្ឋនៃសមាជិកសហជីព Teamsters ជាច្រើននាក់បានទទួលអត្ថប្រយោជន៍ ផ្ទុយពីលោក ត្រាំ ធ្លាប់និយាយថា កម្មករដែលធ្វើកូដកម្មគួរតែត្រូវបានបណ្តេញចេញការងារ។
សមាជិកសហជីព និងសម្ព័ន្ធសមាជិកសហជីពនៅសហរដ្ឋអាមេរិក ដែលរួមមាន បើកបរឡានដឹកទំនិញ កម្មករឃ្លាំង និងអ្នកបើកយន្តហោះជាដើម ត្រូវបានចាត់ទុកថាមានភាពចម្រុះផ្នែកនយោបាយជាយូរមកហើយ ដែលជាហេតុនាំឱ្យបេក្ខជនប្រធានាធិបតីអាមេរិក រិះរកគន្លឺះនៅក្នុងការទាក់ទាញពួកគេសម្រាប់សំឡេងឆ្នោត៕
<<កំណត់សម្គាល់: រាល់ការបញ្ចេញមតិទៅលើអត្ថបទមិនមែនជាការទទួលខុសត្រូវរបស់កោះសន្តិភាពទេ។ វាជាការទទួលខុសត្រួវដោយផ្ទាល់របស់អ្នកបញ្ចេញមតិ។ ដូច្នេះ សូមមិត្តអ្នកអានទាំងអស់ ធ្វើការបញ្ចេញ មតិប្រកបដោយការទទួលខុសត្រូវ មានសីលធម៌ និង ប្រកបដោយន័យស្ថាបនា ហើយចៀសវាង ការបញ្ចេញមតិណាដែលមិនពិត ជេរប្រមាថ និង អុជអាល នាំដល់ការយល់ច្រឡំ ឬ ការរើសអើង ជាតិសាសន៍ សាសនា ឬក៏ បុគ្គលណាមួយ។>>
ចែករំលែកព័តមាននេះ