អភិបាលខេត្តព្រះសីហនុ ចុះជួយប្រជាពលរដ្ឋរងគ្រោះដោយជំនន់ទឹកភ្លៀង នៅស្រុកព្រៃនប់
ខេត្តព្រះសីហនុ ៖ នៅវេលាម៉ោងជិត១១ព្រឹកថ្ងៃទី១៨ ខែកញ្ញា ឆ្នាំ២០២៤ លោក ម៉ាង ស៊ីណេត អភិបាល នៃគណៈអភិបាលខេត្តព្រះសីហនុ…
ខេត្តព្រះសីហនុ ៖ នៅវេលាម៉ោងជិត១១ព្រឹកថ្ងៃទី១៨ ខែកញ្ញា ឆ្នាំ២០២៤ លោក ម៉ាង ស៊ីណេត អភិបាល នៃគណៈអភិបាលខេត្តព្រះសីហនុ អមដំណើរដោយគណៈបញ្ជាការឯកភាពរដ្ឋបាលស្រុក បានចុះពិនិត្យស្ថានភាពជំនន់ទឹកភ្លៀង ដែលបានជន់លិច ហូរចូលលំនៅដ្ឋានរបស់បងប្អូនប្រជាពលរដ្ឋមួយចំនួន នៅក្នុងឃុំអណ្តូងថ្ម ស្រុកព្រៃនប់ ខេត្តព្រះសីហនុ និងអន្តរាគមន៍ជួយសង្គ្រោះប្រជាពលរដ្ឋ ដែលរងគ្រោះដោយជំនន់ទឹកភ្លៀង។ តែទោះជាយ៉ាងណានៅពេលនេះ ស្ថានភាពទឹក បានស្រកខ្លះហើយ ខណៈអាកាសធាតុ កំពុងធ្លាក់ភ្លៀងរលឹមតិចៗ ។
គួររម្លឹកថា កាលពីនៅព្រឹកថ្ងៃទី១៧ កញ្ញា ម្សិលមិញនេះ លោក ម៉ាង ស៊ីណេត អភិបាលខេត្តព្រះសីហនុ បានដឹកនាំគណៈបញ្ជាការឯកភាពស្រុក ចុះអន្តរាគមន៍ជួយសង្គ្រោះប្រជាពលរដ្ឋ ដែលរងគ្រោះដោយជំនន់ទឹកភ្លៀង ស្ថិតនៅភូមិ១ និងភូមិ២ ឃុំអូរត្រេះ ស្រុកស្ទឹងហាវ ។
លោកអភិបាលខេត្ត បានធ្វើការណែនាំដល់អាជ្ញាធរស្រុក កងកម្លាំងប្រដាប់អាវុធ ត្រូវយកចិត្តទុកដាក់តាមដានស្ថានភាពអាកាសធាតុជាប់ជាប្រចាំ ពិសេសជួយជម្លៀសប្រជាពលរដ្ឋរងគ្រោះ មានដូចជា ចាស់ជរា និងកុមារ មកកាន់ទីទួលសុវត្ថិភាពឱ្យបានទាន់ពេលវេលា ។
ទន្ទឹមនោះ លោកអភិបាលខេត្ត ក៏បានអំពាវនាវដល់ប្រជាពលរដ្ឋ ដែលរងគ្រោះដោយជំនន់ទឹកភ្លៀង ត្រូវមានការប្រុងប្រយ័ត្នកូនចៅ ត្រូវមានអនាម័យ ផឹកស្អាត ហូបស្អាត ដើម្បីចៀសផុតពីជំងឺផ្សេងៗ ។
សូមជម្រាបផងដែរថា ដោយសារតែខ្យល់លាយឡំ និងភ្លៀងបានធ្លាក់ជាបន្តបន្ទាប់ តាំងពីម៉ោង១យប់រំលងអាធ្រាត ឈានចូលថ្ងៃទី១៧ ខែកញ្ញា ឆ្នាំ២០២៤ ធ្វើឱ្យមានជំនន់ទឹកភ្លៀងជន់លិច ផ្ទះប្រជាពលរដ្ឋ មួយចំនួននៅស្រុកស្ទឹងហាវ និងស្រុកព្រៃនប់ នាំខេត្តព្រះសីហនុ ៕
ចែករំលែកព័តមាននេះ