សម្ដេចព្រះព្រហ្មរតនមុនី ពិន សែម សិរីសុវណ្ណោ ទីប្រឹក្សានៃគណសង្ឃនាយកនៃកម្ពុជា បានមានថេរដីកា កាលពីពេលថ្មីៗនេះ រំលឹកពុទ្ធបរិស័ទរឿងឧទ្ទិសកុសល ។ តាមរយៈសារដែលបានបង្ហោះ…
សម្ដេចព្រះព្រហ្មរតនមុនី ពិន សែម សិរីសុវណ្ណោ ទីប្រឹក្សានៃគណសង្ឃនាយកនៃកម្ពុជា បានមានថេរដីកា កាលពីពេលថ្មីៗនេះ រំលឹកពុទ្ធបរិស័ទរឿងឧទ្ទិសកុសល ។
តាមរយៈសារដែលបានបង្ហោះ នៅលើបណ្តាញសង្គមផ្លូវការរបស់ព្រះអង្គ សម្ដេចព្រះព្រហ្មរតនមុនី ពិន សែម បានមានថេរដីកាថា សុំឈប់ឧទ្ទិសបុណ្យកុសលត្រឹមញាតិ៧ សន្ដានទៅ ព្រោះអី ញាតិរបស់យើងច្រើនណាស់ គួររំលឹក និងឧទ្ទិសកុសលដល់ពួកគេផង ។
សម្ដេចព្រះព្រហ្មរតនមុនី ពិន សែម សិរីសុវណ្ណោ បានមានថេរដីកាថា បើឧទ្ទិសត្រឹម៧សន្តាន គឺបានតែបន្តិចទេ ប៉ុន្តែញាតិញោមមានដឹងទេថា ញាតិសន្តានរបស់យើង មានច្រើនណាស់ រាប់ដំណរមកហើយ តាំងពីសម័យកសាងអង្គរ ឬមុនអង្គរមកឯណោះ ។ សម្ដេចព្រះព្រហ្មរតនមុនី ពិន សែម សិរីសុវណ្ណោបានមានថេរដីកាបន្ថែមថា នៅពេលទៅធ្វើបុណ្យឧទ្ទិស កុសល គឺសូមរំលឹក និងឧទ្ទិសដល់ញាតិគ្រប់សន្តាន ។
សម្ដេចព្រះព្រហ្មរតនមុនី ពិន សែម សិរីសុវណ្ណោ បានមានថេរដីកាថា ព្រះពុទ្ធជាម្ចាស់ព្រះអង្គបានប្រៀនប្រដៅថា នេះ គឺជាហេតុ និងផលនៅក្នុងសង្សាវដ្ត ជាច្រើនដំណរ ហើយត្រូវជឿលើកម្មផលដែលខ្លួនបានសាង ។ «ឧទាហរណ៍ផ្កាឈូក ដែលញោមញាតិយកមកបូជាធម្មទេសនា ពេលនេះ គឺជាផល ហើយហេតុ គឺវាមាននៅក្នុងដើមឈូកពីព្រោះថា បើសិនជាអត់ដើមវាក៏អត់ផ្កាឈូកដែរ ។ នោះ គឺជាអ្វីដែលព្រះពុទ្ធជាម្ចាស់ព្រះអង្គបានសំដែង» ។ សម្ដេចព្រះព្រហ្មរតនមុនី ពិន សែម សិរីសុវណ្ណោ បានពន្យល់ ។
សម្ដេចព្រះព្រហ្មរតនមុនី ពិន សែម សិរីសុវណ្ណោ បានមានថេរដីកាទៀតថា ញោមញាតិក៏មានហេតុមានផលដែរ ដោយឪពុក និងម្តាយរបស់ញោមញាតិ គឺជាហេតុ ហើយញោមនេះ គឺជាផល ។ បើគ្មានមេ ឪជាហេតុក៏វាគ្មានកូនជាផលដែរ ។ ដល់កូននោះជាផល វាត្រឡប់ទៅជាហេតុ រហូតដល់បានចៅជាផល ហើយចៅនៅត្រឡប់ទៅជាហេតុបានចៅទួតទៀត ។ នេះជាហេតុផល ។ ហើយសម្រាប់យើងនេះមិនដឹងថា ជាហេតុប៉ុន្មានជំនាន់មកទេ ដូច្នេះពេលធ្វើបុណ្យធ្វើទាន សូមឧទ្ទិសឲ្យគ្រប់សន្តាន ។
តាមការគ្រោងទុក ពុទ្ធបរិស័ទនៅកម្ពុជាគ្រោងនឹងរៀបចំពិធីកាន់បិណ្ឌនៅថ្ងៃទី១៨ ខែ កញ្ញាខាងមុខ រហូតដល់ថ្ងៃពុធទី២ ខែតុលា ឆ្នាំ២០២៤ ៕
ចែករំលែកព័តមាននេះ