ថៃ ៖ នៅ​ព្រឹក​ថ្ងៃ​ទី​១៣ ខែកញ្ញា ឆ្នាំ​២០២៤ នាយក​រដ្ឋមន្ត្រី​ថៃ ទី​៣១ បាន​ដឹកនាំ​ក្បាលម៉ាស៊ីន រដ្ឋាភិបាល​ថ្មី​របស់​ខ្លួន​ទៅ​បន់ស្រន់ នៅ​វិមាន​រដ្ឋាភិបាល មុន​នឹង​ចាប់ផ្តើម​បេសកកម្ម​ថ្ងៃ​ដំបូង​ទៅ​កាន់​ខេត្ត​ឈៀង​រ៉ៃ បន្ទាប់​ពី​លោកស្រី Paethongtarn Shinawatra បាន​បញ្ចប់សេចក្តី​ថ្លែងការណ៍ គោលនយោបាយ​នៅ​ក្នុង​សភា កាលពី​ថ្ងៃ​ទី​១២ ខែកញ្ញា ឆ្នាំ​២០២៤ ដោយ​ប្រកាស​ទុក​មុន​ថា ក្រោយ​ទទួល​បាន​អំណាច​ពេញដៃ ក្នុង​នាម​នាយក​រដ្ឋមន្ត្រី លោកស្រី នឹង​ទទួល​បន្ទុក​ដោះស្រាយ​បញ្ហា​ទឹកជំនន់ នៅ​ខេត្ត​ភាគ​ជើង ដោយ​ចុះ​ផ្ទាល់​ទៅ​កាន់​តំបន់​រង​គ្រោះ ។

យោង​តាម​សារព័ត៌មាន​ថៃ TNN បាន​បង្ហាញ​រូបភាព​ជា​ច្រើន​សន្លឹក ដែល​លោកស្រី Paethongtarn Shinawatra អមដំណើរ​ដោយ​មន្ត្រីជាន់ខ្ពស់​ជា​ច្រើន​រូប បាន​នាំ​យក​កម្រងផ្កា​ទៅ​ដាក់​ថ្វាយ នៅ​តាម​ទី​សក្ការៈបូជា និង​វត្ថុ​ស័ក្តិសិទ្ធិ​នានា នៅ​ក្នុង​វិមាន​រដ្ឋាភិបាល​ថៃ ដើម្បី​បួងសួង​សូម​សេចក្តីសុខ​សប្បាយ មុន​ពេល​ចេញ​ទៅ​បំពេញបេសកកម្ម​ការងារ​ដែល​នៅ​ថ្ងៃនេះ នាយក​រដ្ឋមន្ត្រី​ស្រី​វ័យក្មេង គ្រោង​នឹង​ធ្វើ​ដំណើរ​ទៅ​កាន់​តំបន់ ដែល​លិចលង់ ដោយ​ទឹកជំនន់​ធ្ងន់ធ្ងរ​បំផុត​នៅ​ខេត្ត​ឈៀង​រ៉ៃ ដើម្បី​ត្រួតពិនិត្យ​ស្ថានភាព​ជាក់ស្តែង និង​ផ្តល់​ជំនួយ​ដល់​ប្រជាពលរដ្ឋ​រង​គ្រោះ ។

កាលពី​ថ្ងៃ​ទី​១២ កញ្ញា នៅ​ក្នុង​កិច្ចប្រជុំ​បន្ទាន់​មួយ លោកស្រី Paetongtarn បាន​បញ្ជា​ឱ្យ​រដ្ឋមន្ត្រីក្រសួង​ពាក់ព័ន្ធ ត្រូវ​ដោះស្រាយ​ជា​បន្ទាន់ នូវ​បញ្ហា​ទឹកជំនន់​នៅ​ភាគ​ខាងជើង​នៃ​ប្រទេស​ថៃ ដើម្បី​កាត់​បន្ថយ​ផល​ប៉ះពាល់​ប្រកបដោយ​ប្រសិទ្ធភាព និង​ធានា​ឱ្យ​មាន​កិច្ចសហការ​ជា​ប្រព័ន្ធ ដើម្បី​ជួយ​ជន​រង​គ្រោះ​ឱ្យ​បាន​ឆាប់​តាម​ដែល​អាច​ធ្វើ​ទៅ​បាន ។

ក្នុង​នោះ លោកស្រី Paetongtarn បាន​បញ្ជា​ឱ្យ ៖ ក្រសួងមហាផ្ទៃ ជា​ពិសេស​នាយកដ្ឋាន​បង្ការ និង​កាត់​បន្ថយ​គ្រោះ​មហន្តរាយ ទទួលខុសត្រូវ​លើ​ការ​រៀបចំ​ទីជម្រក និង​តម្រូវការ​មូលដ្ឋាន​ដូច​ជា អាហារ ទឹក ថ្នាំ និង​សម្លៀក​បំពាក់​ទៅ​ដល់​ជន​រង​គ្រោះ ។ ក្រសួងការពារជាតិ​ត្រូវ​រៀបចំ​យន្តហោះ ទូក និង​ឧទ្ធម្ភាគចក្រ ដើម្បី​ព​ន្លឿ​ន​ជំនួយ​ដល់​ជន​រង​គ្រោះ​ដោយ​ទឹកជំនន់ និង​សហការ​ជាមួយ​ក្រសួង​ដឹក​ជញ្ជូន ដើម្បី​ជួសជុល​ផ្លូវ និង​ស្ពាន ដើម្បី​សម្រួល​ដល់​ការ​ជម្លៀស ។ ក្រសួងកសិកម្ម និង​ក្រសួងបរិស្ថាន ទទួល​បន្ទុក​ជួសជុល​ទំនប់ និង​ទ្វារ​ទឹក ដើម្បី​កាត់​បន្ថយ​ផល​ប៉ះពាល់​ទឹកជំនន់ ។

គួរ​កត់​សម្គាល់ថា មុន​ពេល​ដែល​លោកស្រី Paethongtarn Shinawatra ធ្វើ​ដំណើរ​ទៅ​ដល់ គិត​ត្រឹម​ព្រឹក​ម៉ោង​១០​ថ្ងៃ​ទី​១៣ ខែកញ្ញា ឆ្នាំ​២០២៤ ស្ថានភាព​ទឹកជំនន់​នៅ​ខេត្ត​ឈៀង​រ៉ៃ មាន​ភាព​ប្រសើរ​ឡើង​បន្តិច​ក្តី ប៉ុន្តែ​វា​នៅ​តែ​ប៉ះពាល់​ដល់​ប្រជាពលរដ្ឋ ជា​ពិសេស​តំបន់​ទំនាប​ជា​ច្រើន នៅ​តែ​ជន់​លិច ដោយសារ​ទឹក​ពី​ទន្លេ​នានា នៅ​តែ​បន្ត​ហូរ​ចូល​តំបន់​នោះ ។

ប្រភព​ពី​សារព័ត៌មាន​ថៃ PSB បានឱ្យ​ដឹង​ថា ទោះបីជា​តំបន់​ខ្លះ ក្នុងស្រុក Muang កម្រិត​ទឹកបាន​ស្រក​ចុះ​ក៏​ពិតមែន ប៉ុន្តែ​នៅ​ឯ​ស្រុក Mae Sai តំបន់​ជា​ច្រើន​កម្រិត​ទឹក នៅ​តែ​ខ្ពស់ ប្រជាពលរដ្ឋ​ថៃ​ជា​ច្រើន​រយ​នាក់​កំពុង​បន្ត​រង់ចាំ​ជំនួយ​សង្គ្រោះ ខណៈ​ចំនួន​អ្នក​ស្លា​.​ប់​បាន​កើន​ឡើងជា​បន្តបន្ទាប់ ដោយសារ​ទឹកជំនន់ និង​ការ​បាក់​ដី ។

អ្នកស្រុក​ក្នុង​តំបន់​រង​គ្រោះ​ខ្លាំង​ដែល​កំពុង​សម្រាក​ក្នុង​តង់​បាន​អះអាង​ថា កម្ពស់​ទឹកជំនន់​នៅ​ព្រឹក​នេះ​បាន​ស្រក​ជាង​១​ម៉ែត្រ​ហើយ ប៉ុន្តែ​នៅ​តែ​ជន់​លិច​សហគមន៍​នៅឡើយ ដែល​ពួក​គាត់​មិន​ទាន់​អាច​ត្រឡប់​ទៅ​ផ្ទះ​បាន​ឡើយ ហើយ​ផ្ទះសម្បែង និង​របស់របរ​ស្ទើរតែ​ទាំងអស់​ត្រូវ​បាន​ខូចខាត ។ ខណៈ​ពេល​ដែល​ផ្លូវ​ទៅ​កាន់​ស្រុក Mae Sai ឥឡូវនេះ​អាច​ឆ្លងកាត់​បាន​ត្រឹមតែ​ស្ពាន Nong Dan ប៉ុណ្ណោះ ស្ពាន​ផ្សេង​ទៀត ដែល​ជា​ផ្លូវ​សំខាន់​នៅ​តែ​លិចលង់ ។

តាម​គម្រោង​ក្នុង​ដំណើរ​ទៅ​កាន់​ខេត្ត​ឈៀង​រ៉ៃ នៅ​ពេល​ព្រឹក លោកស្រី Paethongtarn នឹង​ទៅ​ដល់​ស្រុក Mae Sai ហើយ​នៅ​ពេល​រសៀល​នឹង​បន្ត​ធ្វើ​ដំណើរ​ទៅ​កាន់​ស្រុក Muang ដើម្បី​ជួប​សំណេះសំណាល​ជាមួយ​ប្រជាពលរដ្ឋ​រង​គ្រោះ ។ គិត​ត្រឹម​ព្រឹក​ថ្ងៃ​ទី​១២ ខែកញ្ញា ផ្ទះ​អ្នកស្រុក​ចំនួន​៣៦,១៩៩ គ្រួសារ នៅ​ក្នុងស្រុក​ចំនួន​២៤ នៃ​ខេត្ត​ចំនួន​៧ នៅ​តំបន់​ភាគ​ខាងជើង និង​កណ្តាល ប្រទេស​ថៃ នៅ​តែ​រង​ការ​លិចលង់​ដោយ​ទឹកជំនន់​ខ្លាំង ។

នាយកដ្ឋាន​បង្ការ និង​កាត់​បន្ថយ​គ្រោះ​មហន្តរាយ​ថៃ បាន​បញ្ជាក់​នៅ​ក្នុង​របាយការណ៍​បច្ចុប្បន្នភាព​ចុង​ក្រោយ នៅ​ម៉ោង​១០​និង​៤៥​ព្រឹក ថ្ងៃ​ព្រហស្បតិ៍ ដោយ​បង្ហាញ​ថា មាន​ភូមិ​ចំនួន​៥៤៥ ក្នុងស្រុក​ចំនួន​២៤ ក្នុង​ខេត្ត ឈៀង​រ៉ៃ​, ឈៀង​ម៉ៃ​, តាក​, សុខោទ័យ​, ពិ​ស្នុ​លោក​, អាង​ថង និង​អយុធ្យា ត្រូវ​បាន​ជន់​លិច​នៅឡើយ ។

គួរ​រំលឹក​ថា ទឹកជំនន់​ទូ​ទាំង​ប្រទេស​ថៃ បាន​កើតឡើង​ចាប់តាំងពី​ថ្ងៃ​ទី​១៦ ខែសីហា ហើយ​គិត​មក​ទល់​ពេល​នេះ ប្រជាពលរដ្ឋ​ថៃ​សរុប 106,467 គ្រួសារ​នៅ​ក្នុងភូមិ​ចំនួន 2,975 ក្នុងស្រុក​ចំនួន 125 នៃ​ខេត្ត​ចំនួន 27 ត្រូវ​បាន​រង​ផល​ប៉ះពាល់​ដោយ​ទឹកជំនន់ ។ ចាប់តាំងពី​ពេល​នោះ​មក មនុស្ស​ចំនួន ៣៣ នាក់​បាន​ស្លាប់​ដោយសារ​លង់ទឹក ឬ​ការ​បាក់​ដី និង​២៤ នាក់​បាន​រង​របួស​។ ទោះ​យ៉ាងណា​ក៏​ដោយ ទឹកជំនន់​បាន​ធូរស្រាល​ខ្លះ​ៗ​នៅ​ក្នុង​ខេត្ត​ភាគច្រើន ។

លោក Chaiwat Chuntirapong ប្រធាន​នាយកដ្ឋាន​បង្ការ និង​កាត់​បន្ថយ​គ្រោះ​មហន្តរាយ​ថៃ និយាយ​ថា ស្ថានភាព​នៅ​ក្នុង​ខេត្ត​ចំនួន​ប្រាំពីរ ដែល​នៅ​សេសសល់​បាន​កាន់តែ​អាក្រក់​ទៅ​ៗ ដោយសារ​តែ​ឥទ្ធិពល​នៃ​ព្យុះ Yagi នៅ​ក្នុង​ប្រទេស​វៀតណាម និង​ទឹកជំនន់​ដែល​ហូរ​ចុះ​ពី​ប្រទេស​មី​យ៉ា​ន់​៕