ត្រសក់ ក្រៅពីប្រើប្រាស់សម្រាប់ទទួលទានក៏នៅមានប្រយោជន៍ដល់រាងកាយ និងអាចយកទៅកែច្នៃសម្រាប់ផលប្រយោជន៍នៅលើស្បែកបានទៀត ។ នៅក្នុងផ្លែត្រសក់មានទឹកជាធាតុផ្សំដល់ទៅ៩៦%ធ្វើឱ្យមានគុណសម្បត្តិសម្រាប់បង្កើនភាពស្រស់ស្រាយ ។ ក្រៅពីនេះ ថែមទាំងមានវីតាមីនសេ កាល់ស្យូម និងប៉ូតាស្យូម ដែលសុទ្ធសឹងតែធ្វើឱ្យស្បែកមានសុខភាពល្អ ។ ត្រសក់អាចកម្ចាត់មុននៅលើផ្ទៃមុខបានដោយប្រើសាច់ត្រសក់ដែលឈូសជាសរសៃយកមកបិទលើផ្ទៃមុខ និងក រួចទុកចោលពី១០ទៅ២០នាទី គឺអាចការពារការកើតមុន និងមុនមុខខ្មៅបាន ។ ប្រសិនបើអនុវត្តឱ្យបានញឹកញាប់ ឬយកទៅបុកឱ្យម៉ដ្ឋរួចច្រោះយកតែទឹកទៅដុសលាបលើដងខ្លួននឹងធ្វើឱ្យស្បែកស្រស់ស្អាតមានសំណើមមិនស្ងួតបែកស្រកា ។
ក្រៅពីនេះ ផ្លែត្រសក់ក៏អាចយកទៅលុបបំបាត់ស្នាមជាំក្រមៅនៅរន្ធក្លៀកបានដោយប្រើប្រេងដូង១ស្លាបព្រាបាយ ទឹកត្រសក់ច្របាច់១ស្លាបព្រាកាហ្វេ ទឹកក្រូចឆ្មារ១ស្លាបព្រាកាហ្វេ និងម្សៅរមៀតកន្លះស្លាបព្រាកាហ្វេ ។ ក្រោយពីងូតទឹកនិងជូតខ្លួនស្អាតហើយ យកសំឡីជ្រលក់ប្រេងដូងជូតនៅក្រោមក្លៀករាងជារង្វង់ បន្ទាប់មកលាយទឹកត្រសក់ ទឹកក្រូចឆ្មារ និងម្សៅរមៀតចូលគ្នាលាបនៅក្រោមក្លៀករក្សាទុកប្រហែល២០នាទី រួចលាងទឹកនិងជូតឱ្យស្ងួត។ លោកអ្នកគួរសាកល្បងអនុវត្តក្នុងមួយសប្តាហ៍២ទៅ៣ដង ក្លៀកនឹងមានពណ៌សគួរឱ្យចង់គយគន់ ។
លើសពីនេះ ផ្លែត្រសក់ថែមទាំងមានប្រយោជន៍ដល់កែវភ្នែក ប្រសិនបើមានអាការរមាស់ផ្សារភ្នែក ឬហើមភ្នែក ត្រូវយកត្រសក់ក្លាស្សេហាន់ជាចំណិតស្តើងៗដាក់នៅលើភ្នែក ហើយគេងសម្រាកភ្នែករយៈពេលប្រហែល១០នាទី នឹងជួយលើកស្ទួយភ្នែកឱ្យមានសភាពស្រស់ស្រាយ ព្រោះផ្លែត្រសក់មានវីតាមីន និងរ៉ែខនិជខ្ពស់ ថែមទាំងជួយបន្ថយអាការចុករោយនៃកែវភ្នែក សម្រាប់អ្នកដែលត្រូវប្រើភ្នែកក្នុងការសម្លឹងរយៈពេលយូរ ឬទទួលរងធូលីឬផ្សែងជាដើម ៕
ចែករំលែកព័តមាននេះ