ប្រទេសចិន ៖ សមាគមកីឡាបាល់ទាត់ចិន កាលពីថ្ងៃទី១០ ខែកញ្ញា ឆ្នាំ២០២៤ បានដាក់បម្រាមលើមនុស្សចំនួន៤៣នាក់ពីសកម្មភាពបាល់ទាត់អស់មួយជីវិត ជុំវិញការចោទប្រកាន់ពាក់ព័ន្ធការលេងល្បែងភ្នាល់បាល់ និងការរៀបចំលទ្ធផលការប្រកួត។ ហើយបើតាមប្រភពពីប្រព័ន្ធផ្សព្វផ្សាយរដ្ឋចិនបានឱ្យដឹងថា…
ប្រទេសចិន ៖ សមាគមកីឡាបាល់ទាត់ចិន កាលពីថ្ងៃទី១០ ខែកញ្ញា ឆ្នាំ២០២៤ បានដាក់បម្រាមលើមនុស្សចំនួន៤៣នាក់ពីសកម្មភាពបាល់ទាត់អស់មួយជីវិត ជុំវិញការចោទប្រកាន់ពាក់ព័ន្ធការលេងល្បែងភ្នាល់បាល់ និងការរៀបចំលទ្ធផលការប្រកួត។ ហើយបើតាមប្រភពពីប្រព័ន្ធផ្សព្វផ្សាយរដ្ឋចិនបានឱ្យដឹងថា នៅក្នុងនោះរួមទាំងអតីតកីឡាករជម្រើសជាតិចិន៣នាក់ និងកីឡាករជនជាតិកូរ៉េខាងត្បូង Son Jun-ho ផងដែរ។
ក្រសួងសន្តិសុខសាធារណៈរបស់ប្រទេសចិនបានប្រកាសថា ការដាក់បម្រាមលើមនុស្ស៤៣នាក់ភាគច្រើនជាកីឡាករ ដែលស្ថិតនៅក្នុងចំណោមមនុស្សសរុបចំនួន ១២៨នាក់ ដែលជាប់ពាក់ព័ន្ធនៅក្នុងការស៊ើបអង្កេតរយៈពេល២ឆ្នាំ លើការលេងល្បែងភ្នាល់បាល់ខុសច្បាប់ និងការរៀបចំលទ្ធផលការប្រកួតក្នុងស្រុក។ ប្រភពពីភ្នាក់ងារសារព័ត៌មានចិនស៊ីនហួរបានឱ្យដឹងថា ការស៊ើបអង្កេតរកឃើញថា ការប្រកួតចំនួន១២០ប្រកួតបានរៀបចំលទ្ធផល។ ប៉ុន្តែរបាយការណ៍មិនបានបញ្ជាក់ថា តើការប្រកួតទាំងអស់នៅក្នុងប្រទេសចិន ឬយ៉ាងណានោះទេ។
ការដាក់បម្រាមនេះ បានកើតឡើងប៉ុន្មានម៉ោងមុនការប្រកួតជម្រុះ World Cup 2026 ប្រចាំទ្វីបអាស៊ី គឺជាការប្រកួតទី២ក្នុងពូល C ដែលម្ចាស់ផ្ទះចិនបានចាញ់អារ៉ាប៊ីសាអូឌីតដោយលទ្ធផល ២-១ និងក្រោយការប្រកួតបើកឆាកពូល កាលពីសប្តាហ៍មុន ដែលចិនបានរងបរាជ័យយ៉ាងអាម៉ាស់នៅក្នុងលទ្ធផល ៧-០ ក្រោមថ្វីជើងម្ចាស់ផ្ទះជប៉ុន បង្កឱ្យអ្នកគាំទ្រចិនខឹងសម្បារយ៉ាងខ្លាំង។
សមាគមបាល់ទាត់ចិនបានចោទប្រកាន់កីឡាករ Son Jun-ho ដែលធ្លាប់លេងឱ្យក្លិប Shandong Taishan នៅលីគកំពូលរបស់ចិនថា ជាប់ពាក់ព័ន្ធនឹងការរៀបចំលទ្ធផលការប្រកួត និងទទួលសំណូក។ ខ្សែបម្រើអន្តរជាតិកូរ៉េខាងត្បូងរូបនេះ បានវិលត្រឡប់ទៅប្រទេសកំណើតរបស់ខ្លួនវិញ កាលពីខែមីនាឆ្នាំនេះ បន្ទាប់ពីត្រូវបានឃុំខ្លួនអស់រយៈពេល១០ខែនៅក្នុងប្រទេសចិន។ ក្រៅពីនោះ អតីតកីឡាករក្រុមជម្រើសជាតិចិន Jin Jingdao ដែលធ្លាប់លេងឱ្យក្លិប Shandong Taishan ក៏ស្ថិតក្នុងបញ្ជីបុគ្គលជាប់បម្រាមពីសកម្មភាពបាល់ទាត់អស់មួយជីវិតផងដែរ។
គួរឱ្យដឹងផងដែរថា កីឡាបាល់ទាត់នៅក្នុងប្រទេសចិន បានជួបប្រទះនឹងអំពើពុករលួយអស់ពេលជាយូរមកហើយ ដែលដើមចមអ្នកគាំទ្របានស្តីបន្ទោសចំពោះការធ្វើមិនបានល្អរបស់ក្រុមជម្រើសជាតិផ្នែកបុរស។ ប្រទេសចិនបានបង្កើនការបង្ក្រាបអំពើពុករលួយដែលទាក់ទងនឹងបាល់ទាត់។ តួយ៉ាង លោក Chen Xuyuan អតីតប្រធានសមាគមបាល់ទាត់ចិន កាលពីខែមីនា ឆ្នាំ២០២៤ ត្រូវបានកាត់ទោសឱ្យជាប់ពន្ធនាគារអស់មួយជីវិតពីបទទទួលសំណូក និងត្រូវបានដកហូតសិទ្ធិនយោបាយអស់មួយជីវិត និងរឹបអូសទ្រព្យសម្បត្តិផ្ទាល់ខ្លួនទាំងអស់ផងដែរ។
ក្រោយមកទៀត ពោលកាលពីខែសីហាកន្លងទៅ អតីតអនុប្រធានសមាគមបាល់ទាត់ចិន ក៏ត្រូវបានកាត់ទោសឱ្យជាប់ពន្ធនាគាររយៈពេល១១ឆ្នាំពីបទទទួលសំណូក ហើយអតីតប្រធាននាយកដ្ឋានរៀបចំការប្រកួតក៏ត្រូវបានកាត់ទោសឱ្យជាប់ពន្ធនាគាររយៈពេល៧ឆ្នាំផងដែរ សម្រាប់បទល្មើសដូចគ្នា៕ (ប្រភព ៖ AFP និង CNN)
ចែករំលែកព័តមាននេះ