ប្រទេសឥណ្ឌូណេស៊ី ៖ រដ្ឋាភិបាលឥណ្ឌូណេស៊ី បានយល់ព្រមកំណត់ការផ្អាកការសង់សណ្ឋាគារ វីឡា និងក្លិបកម្សាន្តរាត្រីក្នុងតំបន់មួយចំនួននៅលើកោះបាលី (Bali) ដែលជារមណីយដ្ឋានទេសចរណ៍ប្រវត្តិសាស្ត្រ ដែលកំពុងប្រឈមនឹងការប្រើប្រាស់ដីអភិវឌ្ឍន៍ហួសកម្រិត។ នេះបើតាមការលើកឡើងរបស់មន្ត្រីក្រសួងជាន់ខ្ពស់មួយរូប…
ប្រទេសឥណ្ឌូណេស៊ី ៖ រដ្ឋាភិបាលឥណ្ឌូណេស៊ី បានយល់ព្រមកំណត់ការផ្អាកការសង់សណ្ឋាគារ វីឡា និងក្លិបកម្សាន្តរាត្រីក្នុងតំបន់មួយចំនួននៅលើកោះបាលី (Bali) ដែលជារមណីយដ្ឋានទេសចរណ៍ប្រវត្តិសាស្ត្រ ដែលកំពុងប្រឈមនឹងការប្រើប្រាស់ដីអភិវឌ្ឍន៍ហួសកម្រិត។ នេះបើតាមការលើកឡើងរបស់មន្ត្រីក្រសួងជាន់ខ្ពស់មួយរូប កាលពីថ្ងៃទី៩ ខែកញ្ញា ឆ្នាំ២០២៤។
ប្រភពពីទីភ្នាក់ងារសារព័ត៌មាន Reuters កាលពីថ្ងៃទី៩ ខែកញ្ញា បានឱ្យដឹងថា ការផ្អាកនេះ គឺជាផ្នែកមួយនៃកិច្ចខិតខំប្រឹងប្រែងរបស់ប្រទេសរដ្ឋាភិបាលឥណ្ឌូណេស៊ីក្នុងការធ្វើកំណែទម្រង់ទេសចរណ៍នៅលើកោះបាលី ដែលជាកន្លែងទាក់ទាញដ៏សំខាន់មួយរបស់ប្រទេសឥណ្ឌូណេស៊ី ក៏ដូចជាដើម្បីព្យាយាមលើកកម្ពស់គុណភាព និងការងារ រួមទាំងរក្សាវប្បធម៌ជនជាតិដើមភាគតិចរបស់កោះមួយនេះ។
លោក ហឺមីន អេសធី (Hermin Esti) មន្ត្រីជាន់ខ្ពស់ក្រសួងសម្របសម្រួលកិច្ចការសមុទ្រ និងការវិនិយោគ បានប្រាប់ Reuters ថា រដ្ឋាភិបាលបានយល់ព្រមកំណត់ការផ្អាកនេះ បើទោះបីជាពេលវេលាពិតប្រាកដកំពុងត្រូវបានពិភាក្សាយ៉ាងណាក៏ដោយ។
កាលពីថ្ងៃសៅរ៍មុន លោក សាងម៉េត ម៉ាហេនដ្រា ចាយ៉ា (Sang Made Mahendra Jaya) អភិបាលបណ្តោះអាសន្នកោះបាលីបានថ្លែងថា លោកបានស្នើឱ្យផ្អាកនៅតំបន់មមាញឹកចំនួន ៤ របស់កោះបាលីទៅរដ្ឋាភិបាលកណ្តាល ដោយផ្តោតលើការអភិវឌ្ឍន៍ហួសហេតុ សម្រាប់គោលបំណងពាណិជ្ជកម្ម ដូចជាសណ្ឋាគារ វីឡា និងក្លិបកម្សាន្តជាដើម។ លោក លូហ៊ត ផេនចាតាន (Luhut Pandjaitan) រដ្ឋមន្ត្រីសម្របសម្រួលកិច្ចការសមុទ្រ និងការវិនិយោគ ត្រូវបានដកស្រង់សម្តីដោយសារព័ត៌មានក្នុងស្រុក Detik ដោយបានលើកឡើងថា ការផ្អាកអាចអូសបន្លាយពេលរហូតដល់១០ឆ្នាំ។
ការមកដល់របស់ជនបរទេសនៅកោះបាលី បានកើនឡើងចាប់តាំងពីកោះនេះបើកឡើងវិញសម្រាប់វិស័យទេសចរណ៍ បន្ទាប់ពីការរាតត្បាតកូវីដ-១៩។ វីដេអូរបស់ភ្ញៀវទេសចរដែលប្រព្រឹត្តអាកប្បកិរិយាមិនសមរម្យក៏បានកើនឡើងផងដែរ ដោយធ្វើឱ្យអ្នកស្រុកនៅកោះបាលីមិនពេញចិត្ត និងខឹងសម្បាយ៉ាងខ្លាំង។
តួលេខរបស់រដ្ឋាភិបាលឥណ្ឌូណេស៊ីបង្ហាញថា ភ្ញៀវបរទេសចំនួន ២.៩លាននាក់បានមកដល់អាកាសយានដ្ឋានកោះបាលី នៅក្នុងឆមាសទី១ នៃឆ្នាំនេះ ដែលស្មើនឹង ៦៥% នៃចំនួនភ្ញៀវបរទេសសរុបនៅក្នុងប្រទេសឥណ្ឌូណេស៊ីតាមផ្លូវអាកាស។ សណ្ឋាគារចំនួន ៥៤១ នៅលើកោះបាលីត្រូវបានកត់ត្រាកាលពីឆ្នាំមុន ពោលកើនឡើងពីចំនួន ៥០៧ កាលពីឆ្នាំ ២០១៩៕ (ប្រភព ៖ Reuters)
ចែករំលែកព័តមាននេះ