រាជធានីភ្នំពេញ ៖ ទឹកត្នោតជូរនៅតែជាទីពេញនិយមសម្រាប់មនុស្សទូទៅនៅក្នុងសង្គមខ្មែរយើងដែលមានជាយូរលង់ណាស់មកហើយ ជាពិសេសតែម្ដងនោះគឺអ្នកដែលចូលចិតផឹកមានវណ្ណៈកសិករ កម្មករ និងមន្ត្រីរាជការមួយចំនួន ដែលមានប្រាក់ចំណូលទាប ។ ប៉ុន្តែទន្ទឹមនិងសម័យទំនើបនេះដើម្បីតម្រូវចិត្តអតិថិជនរបស់ខ្លួនផង ហើយក៏ដើម្បីបានប្រាក់ចំណេញផងនោះ…
រាជធានីភ្នំពេញ ៖ ទឹកត្នោតជូរនៅតែជាទីពេញនិយមសម្រាប់មនុស្សទូទៅនៅក្នុងសង្គមខ្មែរយើងដែលមានជាយូរលង់ណាស់មកហើយ ជាពិសេសតែម្ដងនោះគឺអ្នកដែលចូលចិតផឹកមានវណ្ណៈកសិករ កម្មករ និងមន្ត្រីរាជការមួយចំនួន ដែលមានប្រាក់ចំណូលទាប ។ ប៉ុន្តែទន្ទឹមនិងសម័យទំនើបនេះដើម្បីតម្រូវចិត្តអតិថិជនរបស់ខ្លួនផង ហើយក៏ដើម្បីបានប្រាក់ចំណេញផងនោះ អ្នកលក់ទឹកត្នោតជូរក៏បាននាំចូលស្រាបៀរដើម្បីដាក់លក់ជាមួយផងដែរ ។ ព្រោះក៏មានអតិថិជនខ្លះចូលទៅកន្លែងលក់ទឹកត្នោតជូរមែន ប៉ុន្តែមិនប្រាកដថាផឹកទឹកត្នោតជូរនោះទេ គឺបានកុម្ម៉ង់ស្រាបៀរមកផឹកទៅវិញ នេះជាការលើកឡើងរបស់ម៉ាក់ លីនណា ដែលជាអ្នកលក់ទឹកត្នោតជូរ ។
ក្នុងទឹកមុខញញឹមដៃអាំងសាច់ក្លែមញាប់ស្អេក សម្រាប់លក់តាមការកុម្ម៉ង់ពីអតិថិជនរបស់ខ្លួននោះអ្នកស្រីម៉ាក់ លីនណា អាយុ៣៥ឆ្នាំ បាននិយាយថាអ្នកស្រីមានស្រុកកំណើតនៅភូមិអង្គ្រង ឃុំគោករវៀង ស្រុកជើងព្រៃ ខេត្តកំពង់ចាម ។ អ្នកស្រីបានចាប់យកមុខរបរលក់ទឹកត្នោតជូរនេះ តាំងពីនៅតូចមកម្ល៉េះ ដោយលក់ជាមួយឪពុកម្ដាយ ហើយកាលនោះឪពុកម្ដាយអ្នកស្រីឡើងត្នោតលក់ទឹកត្នោតជូរផងនិងរម្ងាស់ជាស្ករលក់ផង ។ លុះដល់អ្នកស្រីមានគូស្រករបែកចេញពីឪពុកម្ដាយ ក៏បន្តមុខរបរមួយនេះធ្វើជាអាជីព ដើម្បីរកប្រាក់ចំណូលផ្គត់ផ្គង់ជីវភាពគ្រួសារប្រចាំថ្ងៃ ចិញ្ចឹមកូន២នាក់នៅក្នុងបន្ទុកឲ្យបានរៀនសូត្រដូចអ្នកដ៏ទៃទៀតដែរ ។
អ្នកស្រីលីនណា បាននិយាយបន្តទៀតថា សព្វថ្ងៃនេះអ្នកស្រីបានជួលដីគេមួយកន្លែងសង់រោងវែង១ខ្នងប្រក់ស្លឹកស្ថិតនៅក្នុងភូមិព្រៃព្រីងខាងជើង១ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ក្នុង១ខែថ្លៃ៤០០ដុល្លារ ដើម្បីប្រកបរបរលក់ទឹកត្នោតជូរនេះ ហើយលក់នៅទីនេះរយៈពេល៦ឆ្នាំមកហើយ ។ ដោយប្ដីអ្នកស្រីជាអ្នកឡើតត្នោត ដោយបានជួលដើមត្នោតគេនៅម្ដុំភូមិកប់ស្រូវ សង្កាត់គោករកា ខណ្ឌព្រែកព្នៅ រាជធានីភ្នំពេញ ចំងាយជាង១០គីឡូម៉ែត្រពីទីតាំងលក់ ។ ការជួលដើមត្នោតគេនោះគិតជារដូវ គឺក្នុង១ដើមតម្លៃ២ម៉ឺនរៀលនៅក្នុង១រដូវៗ ហើយសព្វថ្ងៃឡើងចំនួន១៥ដើម និងឡើងបានទាំងរដូវប្រាំងនិងរដូវវស្សាផងដែរ ហើយក្នុង១ថ្ងៃឡើង២ដង គឺពេលព្រឹក១ដងនិងល្ងាច១ដង ។
គាត់បានរៀបរាប់ប្រាប់បន្តថា ការផលិតទឹកត្នោតជូរគឺមិនបានយកមកចាក់ត្រាំមេនៅក្នុងពាងឬក្រឡ និងឪឪទិនដូចពេលមុនៗទៀតនោះទេ ប្ដីគាត់បានដាក់បំបៅមេនៅលើដើម បន្ទាប់មកបានឡើងទៅផ្ទេរដាក់ក្នុងធុងជ័ររួចដាក់លក់តែម្ដង ។ ចំណែកមេទឹកត្នោតជូរគឺបានផ្សំចេញពីសម្បកដើមកកោះ សម្បកដើមស្លែងពណ៍ និងសម្បកដើមគុយ ដែលបានធ្វើឲ្យទឹកត្នោតជូរមានគុណភាពល្អ រស់ជាតិឆ្ងាញ់ ហើយផឹកទៅមិនឈឺក្បាលឡើយ ។ ដោយឡែកសាច់ក្លែមវិញមានត្រឡនតន ងៀតគោ យីហ៊ឺ ត្រីបបែល អន្ទង់ ត្រីឆ្អើរ និងកំពឹសលីងជាដើម ហើយកន្លែងគាត់បានបើកលក់ចាប់ពីព្រឹក រហូតដល់ម៉ោង១១យប់អស់ភ្ញៀវ ទើបបិទ ។
ម៉ាក់ លីនណា បានបញ្ជាក់ប្រាប់បន្ថែមផងដែរថា នៅដូវវស្សាអាចលក់បានត្រឹមតែ១ថ្ងៃជាង៣០លីត្រប៉ុណ្ណោះ តែបើនៅរដូវប្រាំង១ថ្ងៃអាចលក់បានជាង៦០លីត្រដែរ ហើយសព្វថ្ងៃសម័យទំនើបនេះបើមានទឹកត្នោតជូរ ក៏ត្រូវតែមានស្រាបៀរប្រភេទផ្សេងៗសម្រាប់ដាក់លក់ជាមួយផងដែរ ។ មូលហេតុទី១,ដើម្បីទទួលបានប្រាក់ចំណេញបន្លែមផង ទី២,ដើម្បីតម្រូវចិត្តអតិថិជនផងដែរ ព្រោះគ្រប់អតិថិជនទាំងអស់បានចូលទៅកន្លែងលក់ទឹកត្នោតជូរមែន ប៉ុន្តែមិនប្រាកដថាផឹកទឹកត្នោតជូរទាំងអស់នោះទេ ។ ក្នុងនោះមានអ្នកខ្លះ បានកុម្ម៉ង់ស្រាបៀរមកផឹកទៅវិញ និយាយរួមអ្នកខ្លះក៏ចូលចិត្តផឹកទឹកត្នោតជូរ ឯអ្នកខ្លះទៀតក៏មិនចូលចិត្តឡើយ ចំណែកគាត់វិញគឺធ្វើយ៉ាងណាខំរកប្រាក់ដើម្បីបង់ថ្លៃជួលទីតាំងនិងជួលដើមត្នោតគេ ហើយសល់ខ្លះទុកផ្គត់ផ្គង់គ្រួសារនិងឲ្យកូនសិក្សារៀនសូត្រ ។
ជាចុងក្រោយអ្នកស្រីម៉ាក់ លីនណា បានអំពាវនាវសុំឲ្យប្រជាពលរដ្ឋខ្មែរយើងជួយគាំទ្រទឹកត្នោតជូរដែលជាផលិតផលខ្មែរផង និងចូលរួមពិសារទឹកត្នោតជូរ ព្រោះមានអត្ថប្រយោជន៍ច្រើនសម្រាប់សុខភាព គ្មានជាតិគីមីនោះទេ ផលិតតាមបែបធម្មជាតិពិតៗ តាមរូបមន្តតពីដូនតាខ្មែរយើង ហើយមានតម្លៃថោកទៀត ។ សម្រាប់កន្លែងអ្នកស្រីវិញគឺលក់ក្នុង១លីតត្រឹមតែ២ពាន់រៀលប៉ុណ្ណោះ រីឯសាច់ក្លែមវិញមិនថាត្រឡនតន ងៀតគោ យីហ៉ឺ ត្រីបបែល អន្ទង់ ត្រីឆ្អើរ និងកំពឹសលីងនោះទេ គឺ១ចានត្រឹមតែ១០,០០០រៀល ទៅ១៥,០០០រៀលប៉ុណ្ណោះ ៕
ចែករំលែកព័តមាននេះ