ខេត្តព្រៃវែង ៖ ផ្លូវលំមួយខ្សែ ដែលមានទទឹង ៤ម៉ែត្រ និងបណ្ដោយប្រវែងជាង ៣,០០០ម៉ែត្រ តភ្ជាប់ពីផ្លូវជាតិលេខ១ ចាក់ទៅដល់ទន្លេតូច ក្នុងភូមិអាំងកុក…
ខេត្តព្រៃវែង ៖ ផ្លូវលំមួយខ្សែ ដែលមានទទឹង ៤ម៉ែត្រ និងបណ្ដោយប្រវែងជាង ៣,០០០ម៉ែត្រ តភ្ជាប់ពីផ្លូវជាតិលេខ១ ចាក់ទៅដល់ទន្លេតូច ក្នុងភូមិអាំងកុក ឃុំអ្នកលឿង ស្រុកពាមរក៍ បច្ចុប្បន្នកំពុងរងការខូចខាតយ៉ាងធ្ងន់ធ្ងរ ធ្វើឲ្យប្រជាពលរដ្ឋក្នុងភូមិនាំគ្នារអ៊ូរទាំ ថា ពិបាកធ្វើដំណើរណាស់ ។
ពលរដ្ឋនៅភូមិអាំងកុកនេះ បានរៀបរាប់ថា ផ្លូវមួយខ្សែនេះ ខូចរាល់ឆ្នាំទៅហើយ ព្រោះតំបន់នេះ ជាតំបន់ទំនៀប ទឹកលិចរាល់ឆ្នាំ ហើយអ្នកភូមិទាំងអស់ ក៏វេទនារាល់ឆ្នាំ ឡើងស៊ាំទៅហើយ ចំណែកខាងអាជ្ញាធរវិញ ក៏បានជួយជួសជុលរាល់ឆ្នាំផងដែរ តែបានត្រឹមឈូសគៀរលុបបង្ហាប់ជង្ហុកប៉ុណ្ណោះ មិនបានធ្វើអ្វីធំដុំទេ ព្រោះលុយមានកម្រិត ។
អ្នកភូមិអាំងកុក បានបញ្ជាក់ថា នៅសល់តែប៉ុន្មានថ្ងៃទៀត ពិធីបុណ្យភ្ជុំបិណ្ឌ នឹងចូលមកដល់ ពួកគាត់ត្រូវទៅវត្តធ្វើបុណ្យគ្រប់ៗគ្នា បើផ្លូវពោរពេញដោយជង្ហុកជ្រៅៗ ដុំថ្មធំៗបែបនេះ ពួកគាត់បារម្ភខ្លាចគ្រោះថ្នាក់ សូមឱ្យអាជ្ញាធរជួយជួសជុលផង ។
ឆ្លើយតបបញ្ហានេះ លោក ភោគ ផានី មេឃុំអ្នកលឿង បានឲ្យដឹងថា ផ្លូវនេះរងការខូចខាត ដោយសារតែក្រុមរថយន្តដឹកដីធំៗ បើកឆ្លងកាត់រាល់ថ្ងៃ ហាមឃាត់យ៉ាងណា ក៏មិនឈ្នះដែរ ។
លោកមេឃុំ បានអះអាងថា ចំពោះមុខ ពេលនេះ លោកបានឲ្យមេភូមិ ហៅគ្រឿងចក្រឈូសឆាយ ជួសជុលផ្លូវនេះ ជាបណ្ដោះអាសន្នសិន ដើម្បីសម្រួលការធ្វើចរាចរណ៍របស់ប្រជាពលរដ្ឋ នៅក្នុងឱកាសបុណ្យភ្ជុំបិណ្ឌខាងមុខ ហើយនៅឆ្នាំ២០២៦ ខាងមុខនេះ អាជ្ញាធរឃុំ និងជួសជុលធ្វើផ្លូវនេះ ជាផ្លូវបេតុង ជូនប្រជាពលរដ្ឋ តែម្ដង ៕
ចែករំលែកព័តមាននេះ