រឿងដុំថ្មមិនទាន់ច្នៃ នៅស្រុករមាសហែក ក្រោយមហាជនចោទសួរពេលនេះដឹងការពិតហើយ
- ស្វាយរៀង
ខេត្តស្វាយរៀង ៖ ចាប់តាំងពីចុងសប្តាហ៍ រហូតមកដល់ថ្ងៃទី០៩ ខែកញ្ញា ឆ្នាំ២០២៤ នេះ មហាជននៅលើបណ្តាញសង្គម នៅតែបន្តចែកចាយ និងវែកញែកលើប្រធានបទ…
ខេត្តស្វាយរៀង ៖ ចាប់តាំងពីចុងសប្តាហ៍ រហូតមកដល់ថ្ងៃទី០៩ ខែកញ្ញា ឆ្នាំ២០២៤ នេះ មហាជននៅលើបណ្តាញសង្គម នៅតែបន្តចែកចាយ និងវែកញែកលើប្រធានបទ ដុំថ្មមួយដុំ ដែលត្រូវបានអាជ្ញាធរយកមកដាក់តាំង នៅផ្លូវបំបែកមួយកន្លែង ក្បែរសាលាស្រុករមាសហែក ខេត្តស្វាយរៀង ដែលការពិតទៅដុំថ្មមួយដុំនេះ មានឈ្មោះថា សិលាសុខសិរី សិលារួបរួមសុខសប្បាយ ។
ដើមហេតុដែលនាំឱ្យមហាជនផ្ទុះប្រតិកម្មនៅលើរឿងមួយនេះ គឺផ្តើមចេញពីការបង្ហោះរបស់ផេករដ្ឋបាលសាលាស្រុករមាសហែក កាលពីថ្ងៃទី០៦ ខែកញ្ញា ឆ្នាំ២០២៤ ដោយបញ្ជាក់ថា ផ្លូវបំបែកដុំថ្មនេះ គឺជាសមិទ្ធផលថ្មី ទឹកដីនៃស្រុករមាសហែក អរគុណសន្តិភាព! គិតត្រឹមព្រឹកថ្ងៃទី០៩ ខែកញ្ញា ឆ្នាំ២០២៤ រូបថតផ្លូវបំបែកដុំថ្មទាំង៥ សន្លឹកនេះ ត្រូវបានចែករំលែករហូតដល់ទៅចំនួនមួយ K Share និងខមិនពីមនុស្សជាង៤០០នាក់ ហើយត្រូវបានយកទៅបង្ហោះបន្ត ដោយបណ្តាផេកល្បីៗជាច្រើនអនេក ជាពិសេទាំងរូបភាព និងខ្លឹមសារខាងលើនេះ ក៏ត្រូវបានផេកមួយចំនួនយកទៅបង្ហោះបែបលេបខាយ លេងសើច បង្អាប់ ឬហៅថា Troll តាមបណ្ដាញសង្គមផ្សេងៗផងដែរ ។
ក្រោយរងការរិះគន់ដូចទឹកបាក់ទំនប់ ឈានមកដល់ម៉ោង១០ព្រឹកថ្ងៃទី០៩ ខែកញ្ញា ឆ្នាំ២០២៤ នេះ រដ្ឋបាលសាលាស្រុករមាសហែក បានចេញសារបកស្រាយយ៉ាងដូច្នេះថា ៖ «សូមជម្រាបជូនសាធារណៈជន ជ្រាបថា ថ្មដែលដាក់នៅផ្លូវបំបែកជា៤ក្បែរ សាលាស្រុកនេះ ជាសមិទ្ធផលមិនទាន់សម្រេច ។» មិនតែប៉ុណ្ណោះ រដ្ឋបាលសាលាស្រុករមាសហែក ក៏បានបង្ហោះវីដេអូដែលមានបុរស៤នាក់ឈរជជែកគ្នាជុះវិញដុំថ្មមួយនោះ ដោយអះអាងថា ជាសកម្មភាពរបស់ក្រុមជាងពេលចុះទៅវាស់វែងដុំថ្ម ដើម្បីធ្វើការរចនា ។
រដ្ឋបាលស្រុករមាសហែក បានសង្កត់ធ្ងន់ថា ដុំថ្មមួយនេះត្រូវបានជាងវាស់វែងត្រៀមកែឆ្នៃតាំងតែពីមុនពេលដែលក្រុមការងារក្រាលថ្មម៉ាប និងដាក់អំពូលសូឡា នៅទីតាំងមួយនេះទៅទៀត ដែលមានន័យថា មិនមែនទើបតែចុះវាស់វែង ក្រោយការរិះគន់នោះទេ គឺខាងរដ្ឋបាលស្រុកបានគិតគូរយូរណាស់ហើយ ។
យ៉ាងណាក៏ដោយ ការបកស្រាយរបស់រដ្ឋបាលស្រុករមាសហែកត្រឹមកម្រិតប៉ុណ្ណេះ ជឿជាក់ថា នៅមិនទាន់អាចឆ្លើយតបបានគ្រប់១០០ភាគរយចំពោះការចង់ដឹងរបស់មហាជននូវសំណួរមួយចំនួន ដែលទាក់ទង់នឹងដុំថ្មខាងលើនៅឡើយនោះទេ ។ រឿងដែលពួកគាត់ចង់ដឹងនោះថា តើដុំថ្មមួយដុំ មានអត្ថន័យបែបណា និងប្រវត្តិប្រភពមកពីខាងណា ហើយមានហេតុផល និងគោលបំណងអ្វីទើបអាជ្ញាធរសម្រេចយកដុំថ្មមួយដុំនេះ មកតាំងជាសមិទ្ធផលប្រចាំស្រុករមាសហែកបែបនេះ?
តែការពិត ជាក់ស្តែងសំណួរ និងចម្ងល់ទាំងអស់នេះ ត្រូវបានរដ្ឋបាលស្រុករមាសហែក ធ្លាប់បានបញ្ជាក់លម្អិតតាំងពីថ្ងៃទី២៧ ខែកក្កដា ឆ្នាំ២០២៤ មកម្ល៉េះ គ្រាន់តែការបង្ហោះនោះពុំសូវផ្ទុះដូចការបង្ហោះថ្មីបំផុតចុងក្រោយ ។
តាមរយៈការបង្ហោះនោះ ដុំថ្មមួយដុំខាងលើនេះ គឺមានឈ្មោះថា សិលាសុខសិរី ឬសិលារួបរួមសុខសប្បាយ ។ ប្រភពពីរដ្ឋបាលស្រុករមាសហែក បានបញ្ជាក់ឱ្យដឹងថា សិលាសុខសិរី ឬសិលារួបរួមសុខសប្បាយ នេះ គឺជាអំណោយដ៏ថ្លៃថ្លារបស់ នាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស ដែលឯកឧត្តម គឺជាប្រធានក្រុមការងារចុះមូលដ្ឋានស្រុករមាសហែក ។
សិលាសុខសិរី ឬសិលារួបរួមសុខសប្បាយ ត្រូវបាននាយឧត្តមសេនីយ៍ សៅ សុខា នាំយកមកពីលើកំពូលភ្នំជុំសែនរីករាយ ដែលមានកម្ពស់ជាង៧០០ម៉ែត្រ មកតម្កល់ទុកក្នុងស្រុករមាសហែក ក្នុងគោលបំណង ដើម្បីឱ្យដុំសិលាមួយនេះនាំមកនូវភាពត្រជាក់ត្រជុំ សុខសប្បាយជូនបងប្អូនប្រជាពលរដ្ឋគ្រប់ៗរូប និងគ្រប់ក្រុមគ្រួសារ ៕ ដោយ៖ អោម ចែតច័ន្ទណារ៉ា
ចែករំលែកព័តមាននេះ