រាជធានីភ្នំពេញ ៖ ខណៈចាក់សំឡេងជាសាធារណៈពីផែនការ របស់ក្រុមប្រឆាំងនៅក្រៅប្រទេស សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាបានសម្តែងការប្រតិកម្ម និងហួសចិត្តទៅលើការលើកឡើងរបស់មេក្រុមបាតុកម្ម ១៨…
រាជធានីភ្នំពេញ ៖ ខណៈចាក់សំឡេងជាសាធារណៈពីផែនការ របស់ក្រុមប្រឆាំងនៅក្រៅប្រទេស សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជាបានសម្តែងការប្រតិកម្ម និងហួសចិត្តទៅលើការលើកឡើងរបស់មេក្រុមបាតុកម្ម ១៨ សីហា ដែលជំរុញឱ្យពលរដ្ឋចូលរួមធ្វើយ៉ាងណាឱ្យសេដ្ឋកិច្ចកម្ពុជាធ្លាក់ចុះ ដើម្បីឱ្យរាជរដ្ឋាភិបាលដួលរលំ ប៉ុន្តែមិនប៉ះពាល់ដល់ជីវភាពរស់នៅរបស់ពលរដ្ឋទូទៅ ។
ការលើកឡើងរបស់សម្តេចធិបតីខាងលើនេះធ្វើឡើង បន្ទាប់ពីព្រឹត្តិការណ៍ ១៨ សីហា ដែលជាផែនការប្រមូលផ្តុំធ្វើបាតុកម្ម ចង់ផ្តួលរំលំរាជរដ្ឋាភិបាលត្រូវបានបរាជ័យទាំងស្រុង ។ ក្រោមរូបភាពប្រឆាំងនឹងកិច្ចសហប្រតិបត្តិការអភិវឌ្ឍតំបន់ត្រីកោណ CLV ដោយចង់ឱ្យពលរដ្ឋរួមគ្នាដុតកំដៅឱ្យមានភាពវឹកវរចលាចលសង្គម ដើម្បីឱ្យសេដ្ឋកិច្ចមានការធ្លាក់ចុះនោះ គឺជាផែនការដ៏អាក្រក់បំផុត ហើយដែលថា មិនប៉ះពាល់ទៅប្រជាពលរដ្ឋទូទៅទៀតនោះក៏ជាការភូតកុហកពលរដ្ឋផងដែរ ។
ថ្លែងពិធីប្រគល់វិញ្ញាបនបត្រជូនសិស្សមេធាវី និងសិក្ខាកាមមេធាវីនៃគណៈមេធាវីនៃព្រះរាជាណាចក្រកម្ពុជាចំនួន១៦៦០រូបដែលពិធីធ្វើឡើងនៅមណ្ឌលសន្និបាត និងពិព័រណ៍អន្តរជាតិជ្រោយចង្វារ នាថ្ងៃទី៥ ខែកញ្ញា បន្ទាប់ពីបានស្តាប់លឺសាររបស់ក្រុមប្រឆាំង កាលពីថ្ងៃទី១៨ សីហា កន្លងមកសម្តេចធិបតី នាយករដ្ឋមន្ត្រីបានសម្តែងការហួសចិត្តនឹងគំនិតខាងលើ ហើយបានផ្ញើសារក្រើនរំលឹកដល់សាធារណជន ជាពិសេសអ្នកដែលចង់ផ្តួលរំលំរដ្ឋាភិបាល ត្រូវយល់ពីចេតនាពិតប្រាកដរបស់ក្រុមប្រឆាំងជ្រុលនិយមពីខាងក្រៅប្រទេស ដែលតែងតែញុះញ៉ង់ឱ្យខ្មែរបែកបាក់បង្កទៅជាសង្គ្រាមស៊ីវិលម្តងហើយម្តងទៀត ។
ក្នុងន័យនេះសម្តេចធិបតី ចង់សង្កត់ធ្ងន់ថា ឱ្យតែក្រុមជ្រុលនិយមមួយក្តាប់តូចសម្រេចនូវអ្វីដែលក្រុមនោះចង់បានក្រុមទាំងនោះមិនខ្វល់ពីបញ្ហាសុខទុក្ខប្រជាពលរដ្ឋទូទាំងប្រទេសឡើយ ជាក់ស្តែងការសម្តែងថា ធ្វើឱ្យសេដ្ឋកិច្ចជាតិដាំក្បាលចុះ ដើម្បីផ្តួលរំលំរាជរដ្ឋាភិបាលនេះ គឺជាគំនិតដ៏អាក្រក់មួយដែលចង់ឃើញខ្មែរទាំងអស់ជួបទុក្ខលំបាកខណៈរាជរដ្ឋាភិបាលរយៈពេល៤០ឆ្នាំមកនេះខិតខំស្តារសេដ្ឋកិច្ច និងលើកកម្ពស់ជីវភាពរស់នៅរបស់ប្រជាជនឥតស្រាកស្រាំ ។
សម្តេចធិបតី មានប្រសាសន៍យ៉ាងដូច្នេះថា ៖ «យើងគ្មានជម្រើសអ្វីក្រៅពីការមិនឱ្យផែនការបែបនេះ ជោគជ័យនោះទេ នេះហើយបានជាការអនុវត្តច្បាប់របស់យើង ។ ប្រជាពលរដ្ឋអ្នកដែលមិនគាំទ្រ គម្រោង CLV DTA នេះក៏ច្រើនណាស់ដែលគាត់មិនគាំទ្រទៅដល់ការដុតប្រទេសខ្លួនឯង ដើម្បីសម្រេចគោលបំណងបែបនេះនោះទេព្រោះវាប៉ះពាល់ទៅដល់សិទ្ធិប្រជាពលរដ្ឋដែលត្រូវការរស់នៅត្រូវការសេចក្តីសុខប្រកបរបរប្រចាំថ្ងៃសេដ្ឋកិច្ចមិនស្រួល ប៉ុន្តែគេអត់ឱ្យសេដ្ឋកិច្ចដាំក្បាលចុះនោះទេ ដូចគាត់នេះគាត់អាងគាត់យកគ្រួសារទៅនៅជប៉ុន គាត់បបួលខ្មែរធ្វើយ៉ាងណាដុតរហូតទៅឱ្យផ្ទះយើងឆេះឱ្យខ្ទិចទៅ» ។
សម្តេចនាយករដ្ឋមន្ត្រីបានបន្ថែមថា «កុំប្រើវិធីសាស្ត្រជ្រុលនិយមដុតប្រទេស ឱ្យសេដ្ឋកិច្ចដាំក្បាលចុះ អ្នកខ្លះគេស្រែកចឹងសារមិញនេះ ខ្ញុំកោតនិយាយកើតនិស្សិតរៀននៅជប៉ុន នៅពេលដែលគាត់ចង់ឈ្នះចង់ស្ងោរពងមាន់ គាត់សុខចិត្តដុតផ្ទះគាត់ចោល ហើយផ្ទះនឹងពីណានៅ? ពងមាន់គាត់ហូបម្នាក់ឯង តែដុតផ្ទះនេះមួយគ្រួសារនៅឱ្យសេដ្ឋកិច្ចដាំក្បាលចុះ ដើម្បីឱ្យរដ្ឋាភិបាលធ្លាក់ បងប្អូនអត់ខ្វះអីហូបទេ បងប្អូនមានអង្ករ ហើយមានបន្លែជុំវិញផ្ទះហើយ មិនបាច់ហូបសាច់អីទៀតទេ» ។
ជាមួយគ្នានេះ សម្តេចធិបតី ក៏បានក្រឿនរលឹកជាថ្មី ចំពោះការបញ្ចេញមតិអំពីកង្វល់ មិនមែនជាបញ្ហានោះទេ មិនមានការហាមឃាត់ឡើយ ប៉ុន្តែត្រូវកំណត់ព្រំដែនឱ្យច្បាស់កុំធ្វើអ្វីដែលហួស ការអនុវត្តច្បាប់ និងការប្រើច្បាប់ក្នុងការការពារសិទ្ធិស្របច្បាប់របស់ប្រជាពលរដ្ឋផងដែរ៕
ចែករំលែកព័តមាននេះ