រាជធានីភ្នំពេញ ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានគូសបញ្ជាក់ថា រឿងព្រំដែនជារឿងអនាគតរបស់កូនខ្មែរទាំងអស់គ្នា ដូច្នេះត្រូវតែធ្វើផ្លូវទៅដល់ ដើម្បីឲ្យកូនខ្មែរបានស្គាល់ និងធ្វើការអភិវឌ្ឍ…
រាជធានីភ្នំពេញ ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានគូសបញ្ជាក់ថា រឿងព្រំដែនជារឿងអនាគតរបស់កូនខ្មែរទាំងអស់គ្នា ដូច្នេះត្រូវតែធ្វើផ្លូវទៅដល់ ដើម្បីឲ្យកូនខ្មែរបានស្គាល់ និងធ្វើការអភិវឌ្ឍ ដោយដាក់ប្រជាពលរដ្ឋឲ្យរស់នៅទីនោះធ្វើជារបងការពារ ។
សម្តេចធិបតី ហ៊ុន ម៉ាណែត បានថ្លែងក្នុងពិធី«ប្រគល់វិញ្ញាបនបត្រជូនសិស្សមេធាវី និងសិក្ខាកាមមេធាវី នៃគណៈមេធាវីនៃព្រះរាជាណាចក្រកម្ពុជា» នាព្រឹកថ្ងៃទី៥ ខែកញ្ញា ឆ្នាំ២០២៤ នៅមណ្ឌលសន្និបាត និងពិព័ណ៌អន្តរជាតិជ្រោយចង្វាយ(OCIC)ថា យើងត្រូវតែធ្វើផ្លូវព្រំដែន ដើម្បីធ្វើយ៉ាងណាឲ្យកូនខ្មែរបានទៅដល់ស្គាល់គ្រប់ច្រកគ្រប់ទិសទីនៃផ្ទៃដីរបស់ខ្មែរ ។ ការធ្វើផ្លូវព្រំដែរត្រូវបានសម្តេចនាយករដ្ឋមន្ត្រីបានគូសបញ្ជាក់យ៉ាងដូច្នេះថា ៖«នេះហើយ គឺជាការការពារទឹកដី ហើយយើងគ្មានផ្លូវទៅដល់ បើគេយកយើងមិនដឹង ។ ឧទាហរណ៍ យើងមានដី២០ហិកតា តែបើយើងទៅដល់ដីតែ១០ហិកតា នៅសល់១០ហិកតាទៀតទៅមិនដល់បើគេយកយើងម៉េចដឹង! ។ ដូច្នេះយើងត្រូវតែធ្វើប្រព័ន្ធហេដ្ឋរចនាសម្ព័ន្ធតភ្ជាប់រុញឲ្យដល់គ្រប់កន្លែង» ។
សម្តេចធិបតីបានលើកឡើងទៀតថា ត្រូវតែធ្វើការអភិវឌ្ឍផ្នែកសេដ្ឋកិច្ចនៅតាមព្រំដែន ហើយបញ្ជូនប្រជាពលរដ្ឋទៅរស់នៅទីនោះដែលចំណុចនេះ គឺជាការដោះស្រាយកង្វល់របស់ប្រជាពលរដ្ឋ ។ ជាមួយគ្នានោះដែរ សម្តេចធិបតីនាយករដ្ឋមន្ត្រីគូសបញ្ជាក់បន្ថែមថា ៖«រឿងCLV – DTA មិនមែនជារឿងបច្ចុប្បន្ននោះទេ គឺជារឿងអនាគតដែលយើងទាំងអស់គ្នាព្រួយបារម្ភបាត់បង់ ។ យើងទៅមើលឥលូវអត់បាត់ តែនៅ២០ ឬ៥០ឆ្នាំទៀត ។ ប៉ុន្តែដើម្បីអស់កង្វល់យើងពង្រាយកូនខ្មែរ ឲ្យច្រើននៅតំបន់នោះតែម្តង ។ យកប្រជាពលរដ្ឋទៅរស់នៅទីនោះធ្វើជារបងការពារអធិបតេយ្យភាពរបស់យើង ហើយពង្រឹងសេដ្ឋកិច្ច» ។
សម្តេចធិបតី បានលើកឡើងទៀតថា រឿងដែលមិនទាន់កើត គឺមានការពិបាកដូច្នេះយើងត្រូវតែធ្វើការការពារ ។ រាជរដ្ឋាភិបាលបានដាក់ចេញ និងជំរុញការអភិវឌ្ឍគោលនយោបាយក្នុងការធ្វើផ្លូវព្រំដែន ដើម្បីការពារព្រំដែន និងធ្វើឲ្យប្រជាពលរដ្ឋមានទំនុកចិត្ត ។ ក្នុងនាមជាកូនខ្មែរម្នាក់ សម្តេចធិបតីនាយករដ្ឋមន្ត្រីបានគូសបញ្ជាក់ទៀតថា ៖«ខ្ញុំមិនចង់ឃើញប្រជាពលរដ្ឋខ្ញុំបែកបាក់គ្នាមិនទុកចិត្តគ្នា ឈ្លោះគ្នា ដោយសាររឿងអ្វីដែលមិនទាន់កើតមានឡើង ។ អីញ្ចឹងយើងត្រូវធ្វើអ្វីដើម្បីធានា និងរម្ងាប់ចិត្តប្រជាពលរដ្ឋ ។ ហើយខ្ញុំគិតថា មានបងប្អូនមួយចំនួនមិនទាន់សប្បាយចិត្តទេ ព្រោះខ្លះចង់ធ្វើរបងព្រំដែនដោយមិនធ្វើផ្លូវ ។ មានវិធីសាស្ត្រច្រើន តែខ្ញុំសុំធ្វើផ្លូវហើយ ដើម្បីយកប្រជាពលរដ្ឋជារបងការពារ» ។
ក្នុងឱកាសនោះដែរ សម្តេចធិបតីបានឲ្យដឹងថា តាមការគណនាផ្ទៃដីចំនួន១២៧០គីឡូម៉ែត្រ គុណជារបងកម្ពស់២ម៉ែត្រ កម្រាស់២តឹក ចំណាយលុយជាង១៧០លានដុល្លារអាមេរិក ។ ផ្លូវចំនួន១៣០០គីឡូម៉ែត្រចំណាយខ្ទង់ជាង៥០០លានដុល្លារ ។ សម្តេចធិបតី ក៏បានលើកឡើងថា ការធ្វើរបងព្រំដែនមិនមានការងាយស្រួលនោះទេ សូម្បីប្រទេសចិន-វៀតណាមរបងរបស់គេ មានព្រំដែនជាង២០០០គីឡូម៉ែត្រ គេធ្វើតែមួយផ្នែកទេ ។ អាមេរិកចង់ធ្វើរបង គេធ្វើបានតែមួយផ្នែកទេ ហើយប្រទេសអ៊ីសស្រាអ៊ែល និងប្រទេសហាម៉ាស់ធ្វើរបងក៏នៅមានការឆ្លងកាត់ក្រោមដីបាន ៕
ចែករំលែកព័តមាននេះ