ជុំវិញ​រឿងរ៉ាវ​ស្ត្រីបីកូន​ប្លុងចោល​ឱ្យអ្នក​លក់មាស​ ស្ត្រីជា​ម្តាយ​បង្ហាញ​ខ្លួន និង​អះអាងថា​កូនឈឺ​គ្មានលុយ​ទិញថ្នាំ


​ខេត្តកំពង់ចាម​​​ ៖ ​​រឿង​រ៉ាវ​​គួរ​ឱ្យ​​ភ្ញាក់​ផ្អើល​​មួយ ដែលស្ត្រីជា​​​ម្តាយ​បីកូនតូច​​មកប្លុង​​ឱ្យអ្នក​លក់​មាស​​នៅក្នុង​​ផ្សារ​ធំ​កំពង់ចាម ​ពិតជា​​មាន​​ការ​​សន្និដ្ឋាន​​​ផ្សេងៗគ្នា​​កាលពីថ្ងៃទី​​១៥ មិថុនា ​​ដែល​​អ្នក​​​ខ្លះនិយាយ​​ថា ​ទំនងស្ត្រី​ជា​ម្តាយ​ចង់​ឱ្យ​​អ្នក​​លក់​មាស​​រើស​កូន​​នេះ​ទៅចិញ្ចឹម ។ ​ទោះបីជា​បែប​ណា​ នៅថ្ងៃ​បន្ទាប់គឺក្រោយ​​ពេលដែល​​​អ្នក​លក់​មាស​បាន​យក​ក្មេង​ស្រី​​តូច​នោះ ​​ឱ្យអង្គការ​​ចិញ្ចឹម​ ហើយ​​ស្ត្រី​ជា​​ម្តាយ​​​ក៏បានបង្ហាញខ្លួន​។

អាជីវករ​​លក់មាស​​​តូប​លេខ​​១៨ ​ផ្សារ​ធំ​ក្រុង​កំពង់​ចាម ​​ឈ្មោះ​​​ឈាវ​ ស៊ាម​ម៉េង​ ភេទស្រី អាយុ​​​៣៤​ឆ្នាំ ​រស់នៅភូមិ​​​​១២ សង្កាត់​​​កំពង់ចាម ​​ក្រុងកំពង់ចាម ​នៅតែមានចិត្ត​​មេត្តា​​​ធម៌​ដល់ស្ត្រី​​​ជាម្តាយ​​​​ទោះបី​​បាន​ប្រើល្បិច​​​មក​ទិញចិញ្ចៀន​​ប្លាទីន​​១វង់​តម្លៃ​​​១៦ម៉ឺនរៀល ​មិន​ឱ្យ​លុយ​​​ហើយ​ថែម​​ទាំង​ទុក​ទារិកា​​តូច​អាយុ​​៦ខែជា​កូន​ចោល​​១​ថ្ងៃ​ក្តី ។ ស្ត្រីអាជីវករ​​លក់មាស​មិន​យក​​​ទោស​ពៃរ៍​​អ្វីនោះទេ ​​ខណៈស្ត្រី​​​ជាម្តាយ​​មក​រកកូនវិញទាំង​បង្ហូរ​ទឹកភ្នែក​​នា​ព្រឹកថ្ងៃទី​​​១៦ មិថុនា ឆ្នាំ​២០១១។

តាមព័ត៌មាន​ពី​លោកញ៉ែម ​អ៊ឹម មន្ត្រី​នគរ​បាល​​​ប៉ុស្តិ៍​រដ្ឋ​បាល​​សង្កាត់កំពង់ចាម ​បានប្រាប់​​ឱ្យ​​​ដឹង​ថា ​កាលពីវេលាម៉ោង​​១​រសៀលថ្ងៃទី​​១៤ មិថុនា ​ស្ត្រី​ឈ្មោះ​​សុខ នឿន អាយុ​​២៧​ឆ្នាំ មាន​ស្រុក​កំណើត​​​នៅ​ភូមិ​​​ស្រែស្ពៃ ​ឃុំព្រះធាតុ ​ស្រុក​អូរ​រាំង​​ឪ​ ​បាន​បីកូន​​ស្រីតូចម្នាក់​​​​ចូលមក​ក្នុង​​ផ្សារ​ធំ ក្រុង​កំពង់ចាម ​ដោយបាន​ចូល​តូប​របស់​​​អាជីវ​ករ​​ខាង​លើ​ដើម្បី​​ទិញចិញ្ចៀន​​១វង់​​​ ហើយយក​មក​​​​​ពាក់​ក្នុង​ម្រាមដៃ ​​ដោយប្រាប់​​ទៅអ្នកលក់​​​​ថា សុំ​ផ្ញើ​កូន​​​១ភ្លែត​​ចេញ ទៅ​​យកលុយ​​នៅផ្ទះក្បែរ​​​ក្បាលស្ពាន​​គីហ្ស៊ុ​ណា​ ។ ម្ចាស់​​​តូប​​ចេះ​តែ​ចាំ​បាត់ៗ មិនឃើញ​​​ស្ត្រី​នោះ​មក​យកកូននឹង​ទូទាត់​លុយ​សោះ ​ព្រោះជិត​​​ដល់ពេល​ត្រូវបិទ​ផ្សារ​​ទៅ​ហើយ ទើបអាជីវករ​​​លក់មាស​បានរាយការណ៍​​មកប្រាប់​​សមត្ថកិច្ច​​​​ ព្រោះមិន​​​ហ៊ានទុក​​​ទារិ​កា​​នោះ​ក្នុង​​​តូបបន្តទៀត​​ទេ ខ្លាច​មាន​​បញ្ហា​​​ណា​មួយ​​​កើតឡើង ។​​

លោកចៅ​​សង្កាត់កំពង់ចាម ​រួម​ជាមួយ​​មន្ត្រី​​​មន្ទីរសង្គម​​កិច្ច​ខេត្ត​បានពិគ្រោះ​​​យោ​បល់​គ្នា​​ និង​បានឯកភាព​​​យក​ទារិកានោះ​ទៅចិញ្ចឹម​​នៅក្នុង​​​អង្គការមួយ​​ជា​បណ្តោះអាសន្ន​​​សិន ។​
​កញ្ញា​ឈុន សុពេជ្រ ​​បម្រើការ​ងារ​​នៅអង្គ​ការ​​គ្រាប់ពូជនៃ​​​កម្ពុជា ​​ស្ថិតនៅ​ភូមិបឹងកុក​​២ ​សង្កាត់ បឹង​កុក ​ក្រុងកំពង់ចាម ​បាន​ប្រាប់​ឱ្យ​ដឹង​ថា តាម គោល ការណ៍​របស់​អង្គការនោះ​​​គឺយក​ក្មេង​​កំព្រា​ណាដែល​​​ក្រីក្រ​មិន​​មាន​ឪពុកម្តាយ​ដោយ​មានការ​​​ធានា​ពី​អាជ្ញាធរ​មូលដ្ឋាន​ទើបអនុ​ញ្ញាត​​ទទួលយក​​មក​រស់នៅ​​ក្នុងមណ្ឌល​​​របស់អង្គ​ការ​បណ្តុះ​បណ្តាល​ឱ្យ​រៀន សូត្រ។ ​​ជាក់ស្តែង​​ដូច​ជា ទារិកា​​ខាងលើ​គ្រាន់តែ​​​យក មក​​​បាន​​​១យប់​ប៉ុណ្ណោះ​ត្រូវម្តាយ​មក​តាមសួរ​រក​យកទៅវិញ​នា​រសៀល​ថ្ងៃទី​​​១៥ មិថុនា ​តែមិន​ទាន់​អនុញ្ញាត​ឱ្យ​ទៅ​វិញ​ភ្លាម​នោះ​ទេ ព្រោះ​​ត្រូវបំពេញ​​​ឯកសារ​នៅ​​​សាលា​សង្កាត់​​កំពង់ចាម​ជាមុនសិន​។​

ស្ត្រី​ឈ្មោះ​​សុខ នឿន ​ជាម្តាយ​របស់ទារិកា​​​ខាងលើ​បាន​​ប្រាប់​ទាំងបង្ហូរទឹកភ្នែក​​​​ថា នាង​មាន​ស្រុក​កំណើត​​នៅ​ស្រុក​​​អូររាំង​ឪ មានកូន​​២នាក់​ ក្នុងនោះ​​​​កូន​ប្រុស​បង​​អាយុ​​៤​ឆ្នាំ ​និង​កូន​​ប្អូន​ជា​​ស្រី​​អាយុ​៦ខែ ​បានមក​ជួល​ផ្ទះ​​គេនៅ​ខាង​​ស្រុក​កៀន​ស្វាយ ​​ខេត្តកណ្តាល​។​ ស្ត្រីជា​​​ម្តាយបន្ត​ថា ​ដោយ​សារ​​កូនស្រី​តូច​​មានជំងឺ​រលាកទងសួត ​នាង​បាន​​​យកទៅព្យា​បាល​​នៅ​មន្ទីរ​ពេទ្យគន្ធបុប្ផា​រាជធានី​ភ្នំពេញ​​បាន​រយៈ​ពេល​​​៥ថ្ងៃ​​ក៏ចេញដំណើរ​មក​កាន់​ក្រុងកំពង់ចាម នា​​រសៀល​​ថ្ងៃទី​១៤ ​មិថុនា និង​បាន​​​ចូលទៅ​​ក្នុងផ្សារ​​ធំ ក្រុង​កំពង់ចាម​ ទិញ​ចិញ្ចៀន​​​១វង់ តែមិន​មានលុយ​​ឱ្យក៏ទុក​​​កូនចោល​នៅនឹង​តូប​លក់​មាសនោះ​​​ពិតមែន ។

មន្ត្រី​ប៉ុស្តិ៍​សង្កាត់​​កំពង់​ចាម​​បាន​បញ្ជាក់​​​ថា មូល ហេតុដែល​​ស្ត្រី​រូប​នេះ​​សម្រេច​ចិត្ត​​​បែបនេះ ព្រោះ​​តែមិន​មាន​​​លុយ​មើល​កូន​​ស្រីតូច​ដែលឈឺ ។ ​ទោះបីជា​បែបណា​នៅ​​ព្រឹកថ្ងៃទី​​​១៦ មិថុនា ​​អាជីវករ​លក់មាស​មិន​​បានប្តឹង​​ប្តល់​អ្វី​នោះ​ទេ ​​ដោយគ្រាន់តែ​​​ធ្វើការ​​អប់​រំ​​​មិន​ឱ្យ​​​ធ្វើបែបនេះ​​​ជាលើកទី​​​២ទៀត ​នឹង​សម្រប​សម្រួល​​​ឱ្យទៅរស់​នៅ​​​ក្នុងអង្គការ​​​នោះទាំង​បីនាក់​​ម្តាយកូន។ ស្ត្រី​រូប​នេះ​និយាយ​ថា​ ប្តីរបស់ខ្លួន​​​បានរត់​តាម​​ស្រីទៅ​​​បាត់​ ហើយ​កន្លង​មក​​តែង​ធ្វើបាប​ទាំង​ផ្លូវចិត្ត​​ ផ្លូវ​កាយ​ទៀតផង​គ្មាន​​អ្វី​ជាទីពឹង​ទើបធ្វើ​ដូច្នេះ ៕​

Facebook Google Twitter Email

សន្ដិសុខ​សង្គម

អត្រាប្តូរប្រាក់

អត្រាប្តូរប្រាក់ផ្សេងទៀត

Sponsored News

ការស្ទង់មតិគេហទំព័រថ្មី




សូម​អរគុណ