រាជធានីភ្នំពេញ ៖ បុរសជនជាតិចិនម្នាក់ ខណៈកំពុងបើករថយន្ត ម៉ាកហ៊ីយ៉ាន់ដាយ ស៊ីវីអ៊ិច ១គ្រឿង ស្រាប់តែងងុយដេក ហើយងោក១ភាំង ក៏បានរេចង្កូត…
រាជធានីភ្នំពេញ ៖ បុរសជនជាតិចិនម្នាក់ ខណៈកំពុងបើករថយន្ត ម៉ាកហ៊ីយ៉ាន់ដាយ ស៊ីវីអ៊ិច ១គ្រឿង ស្រាប់តែងងុយដេក ហើយងោក១ភាំង ក៏បានរេចង្កូត ជ្រុលបុកបង្កាន់ដៃស្ពាន មហាវិថីស៊ីជីនពីង ពេញទំហឹង បណ្ដាលឲ្យបង្កាន់ដៃស្ពាន បាក់និងវៀច ហើយរថយន្ត បានរងការខូចខាតខ្ទេចមុខទាំងស្រុងតែម្ដង ប៉ុន្តែសំណាងល្អ ពុំបានបណ្ដាលឲ្យបុរសជនជាតិចិនរូបនោះ រងរបួសនោះឡើយ ។
ឧប្បត្តិហេតុនេះ បានកើតឡើងនៅវេលាម៉ោង៣និង៣០នាទីរសៀលថ្ងៃទី៣ ខែកញ្ញា ឆ្នាំ២០២៤ នៅតាមមហាវិថីស៊ីជីនពីង ហៅផ្លូវក្រវាត់ក្រុងទី៣ ស្ថិតនៅក្នុងភូមិទឹកថ្លា សង្កាត់ក្រាំងពង្រ ខណ្ឌដង្កោ រាជធានីភ្នំពេញ ។
តាមប្រភពពីអ្នកដំណើរ ដែលបានឃើញហេតុការណ៍នោះ បានឲ្យដឹងថា នៅមុនពេលកើតហេតុ គាត់បានឃើញរថយន្តម៉ាកហ៊ីយ៉ាន់ដាយស៊ីវីអ៊ិច ១គ្រឿង ពណ៍ទឹកប្រាក់ពាក់ស្លាកលេខ ភ្នំពេញ 2BY-8408 បើកបរដោយបុរសជនជាតិចិនម្នាក់ ធ្វើដំណើរក្នុងទិសដៅពីលិចទៅកើត ក្នុងល្បឿនលឿនគួរសមដែរ លុះពេលទៅដល់ត្រង់ចំណុចកើតហេតុ ស្រាប់តែរេចង្កូតជ្រុលទៅបុកបង្កាន់ដៃស្ពានមហាវិថីស៊ីជីនពីង នោះពេញទំហឹងតែម្ដង ។
ប្រភពដដែល បានប្រាប់ឲ្យដឹងបន្តទៀតថា ខណៈនោះបានបណ្ដាលឲ្យបង្កាន់ដៃស្ពាន បាក់និងវៀច ហើយរថយន្តបានរងការខូចខាតខ្ទេចមុខទាំងស្រុងតែម្ដង ប៉ុន្តែសំណាងល្អពុំបានបណ្ដាលឲ្យបុរសជនជាតិចិនរូបនោះ រងរបួសនោះឡើយ។ បុរសនេះបានបើកទ្វារចុះពីលើរថយន្តដោយសុវត្ថិភាព ដែលមើលទៅស្ទើរតែមិនគួរឲ្យជឿថា គាត់គ្មានរបួសបែបនេះទេ ព្រោះបុកលាន់សូរខ្លាំងណាស់ ។
ក្រោយពេលកើតហេតុ កម្លាំងនគរបាលប៉ុស្តិ៍ក្រាំងពង្រ និងនគរបាលចរាចរខណ្ឌដង្កោ បានចុះទៅកាន់ទីនោះ ហើយបុរសជនជាតិចិនខាងលើ បានប្រាប់នគរបាលថា គាត់ងងុយដេក និងងោកក្នុងពេលកំពុងបើកបរ ទើបជួបរឿងបែបនេះ។ បន្ទាប់មកនគរបាល បានធ្វើការវាស់វែង រួចស្ទូចយករថយន្តទៅរក្សាទុករង់ចាំការដោះស្រាយចំពោះការខូចខាតទ្រព្យសម្បត្តិរដ្ឋ នៅពេលក្រោយ ៕
ចែករំលែកព័តមាននេះ