ផ្ទុះអាវុ.ធច្រើនគ្រាប់ កណ្តាលក្រុងព្រះសីហនុ ក្រោយឮសំឡេងស្រែ.កជជែកគ្នាខ្លាំងៗមិនបានប៉ុន្មាននាទីផង
ខេត្តព្រះសីហនុ ៖ ស្នូរផ្ទុះអាវុធជាច្រើនគ្រាប់ទាំងកណ្ដាលរាត្រី កាលពីវេលាម៉ោង 11 និង 10 នាទីយប់ថ្ងៃទី 2 ខែកញ្ញា…
ខេត្តព្រះសីហនុ ៖ ស្នូរផ្ទុះអាវុធជាច្រើនគ្រាប់ទាំងកណ្ដាលរាត្រី កាលពីវេលាម៉ោង 11 និង 10 នាទីយប់ថ្ងៃទី 2 ខែកញ្ញា ឆ្នាំ 2024 ត្រង់ចំណុចមុខសណ្ឋាគារ ប្លូ បេ ស្ថិតក្នុងភូមិ០១សង្កាត់លេខ 3 ក្រុងនិងខេត្តព្រះសីហនុ បង្កឲ្យមានការភ្ញាក់ផ្អើលយ៉ាងខ្លាំងដល់បងប្អូនប្រជាពលរដ្ឋនិងសមត្ថកិច្ច ដល់ក្នុងហេតុការណ៍នេះបណ្ដាលឲ្យ មានជនរងគ្រោះជនជាតិចិនចំនួនពីរនាក់និងសន្តិសុខជនជាតិខ្មែរម្នាក់។
ជុំវិញករណីនេះផងដែរ តាមប្រភពបឋមពីសមត្ថកិច្ចក្នុងខេត្តព្រះសីហនុបានបង្ហើបឲ្យដឹងថា នៅវេលាម៉ោងកើតហេតុខាងលើ មានករណីផ្ទុះអាវុធមួយកើតឡើង បណ្ដាលឲ្យមនុស្សចំនួន3នាក់ រងរបួស ក្នុងនោះជនជាតិចិនចំនួនពីរនាក់ និងជនជាតិខ្មែរដែលជាសន្តិសុខម្នាក់រងរបួស។
តាមប្រភពដដែលបានបន្តថា តាមការសាកសួរបឋមបានឲ្យដឹងថា ទាំងភាគីជនបង្ក និងភាគីជនរងគ្រោះបានណាត់គ្នាមកនិយាយការងារនៅក្នុងសណ្ឋាគារយីហោ ប្លូបេ ប៉ុន្តែមិនដឹងមានបញ្ហាអ្វីទេ ភាគីទាំងពីរបានទាស់សម្ដីគ្នាហើយហើយភាគីជនរងគ្រោះបានដើរចេញពីសណ្ឋាគារ ក៏ត្រូវភាគីម្ខាងទៀតយកកាំភ្លើងខ្លីមិនស្គាល់ម៉ាកបាញ់ជាច្រើនគ្រាប់ បណ្ដាលឱ្យភាគីម្ខាងទៀតរងរបួស២នាក់ និងផ្លាតគ្រាប់ទៅត្រូវសន្តិសុខដែលកំពុងឈយាមនៅខាងមុខសណ្ឋាគារបណ្ដាលឲ្យរងរបួស។
ភ្លាមៗនោះសមត្ថកិច្ចចម្រុះ ចុះមកដល់ទីតាំងនិងបញ្ជូនជនរងគ្រោះទៅកាន់មន្ទីរពេទ្យភ្លាមៗដែរ។ចំពោះមូលហេតុក៏ដូចជាមុខសញ្ញាជនបង្កកំពុងត្រូវបានសមត្ថកិច្ចអនុវត្តនីតិវិធីនិងស៊ើបអង្កេត។
ដោយឡែកតាមប្រភពពីសាក្សីនៅជុំវិញកន្លែងកើតហេតុបានឱ្យដឹងថា នៅមុនកើតហេតុ ខណៈពេលគាត់កំពុងអង្គុយលើកង់បីរង់ចាំម៉ូយ ពួកគាត់បានឮសំឡេងស្រែកជជែកគ្នាខ្លាំងៗមិនបានប៉ុន្មាននាទីផង ស្រាប់តែឃើញមនុស្សមួយចំនួនរត់ចេញពីរក្នុងសណ្ឋាគារ ជាមួយគ្នានេះផងដែរ ស្នូរអាវុធជាច្រើនគ្រាប់បានបន្លឺឡើងធ្វើឲ្យស្ថានភាពពេលនោះមានភាពច្របូកច្របល់ ទាំងពួកគាត់និងប្រជាពលរដ្ឋដែលកំពុងធ្វើដំណើរនៅលើដងផ្លូវមុខសណ្ឋាគារនេះ។
ក្រោយកើតហេតុប៉ុន្មានត្រឹមតែ5នាទីទៅ10នាទីប៉ុណ្ណោះ សមត្ថកិច្ចចម្រុះបានមកដល់ទីតាំងកើតហេតុ គ្រប់គ្រងស្ថានភាព និងបានចូលទៅក្នុងសណ្ឋាគារ ដើម្បីធ្វើការសាកសួរ ឯរឿងអ្វីផ្សេងពួកគាត់ពុំដឹងនោះទេ ៕
ចែករំលែកព័តមាននេះ