ប្រទេសន័រវែស ៖ ប្រទេសន័រវែសសម្រេចបាននូវសមិទ្ធិផលបរិស្ថានដ៏គួរឱ្យភ្ញាក់ផ្អើល និងជាការកត់សម្គាល់ដ៏សំខាន់បំផុត ដោយបានបង្កើនទំហំព្រៃឈើរបស់ខ្លួនរហូតដល់៣ដងក្នុងរយៈពេល១០០ឆ្នាំចុងក្រោយនេះ។ នេះតាមប្រភពសារព័ត៌មាន Forskning.no, Echo Newz និង…
ប្រទេសន័រវែស ៖ ប្រទេសន័រវែសសម្រេចបាននូវសមិទ្ធិផលបរិស្ថានដ៏គួរឱ្យភ្ញាក់ផ្អើល និងជាការកត់សម្គាល់ដ៏សំខាន់បំផុត ដោយបានបង្កើនទំហំព្រៃឈើរបស់ខ្លួនរហូតដល់៣ដងក្នុងរយៈពេល១០០ឆ្នាំចុងក្រោយនេះ។ នេះតាមប្រភពសារព័ត៌មាន Forskning.no, Echo Newz និង Allthe News ចេញផ្សាយកាលពីថ្ងៃទី៣១ សីហា កន្លងទៅ។
កំណើនដ៏សំខាន់នេះ គឺជាលទ្ធផលនៃការអនុវត្តការគ្រប់គ្រងព្រៃឈើប្រកបដោយនិរន្តរភាពរបស់រដ្ឋាភិបាលន័រវែស ក៏ដូចជាកិច្ចខិតខំប្រឹងប្រែងដាំដើមឈើឡើងវិញ ដែលបានចាប់ផ្តើមនៅដើមសតវត្សទី ២០ ជាពិសេសការកើនឡើង ១០% នៅក្នុងរយៈពេលត្រឹមតែមួយទស្សវត្សចុងក្រោយនេះ។
ការប្ដេជ្ញាចិត្តរបស់ប្រទេសន័រវែសក្នុងការអភិរក្ស និងពង្រីកធនធានធម្មជាតិរបស់ខ្លួន មិនត្រឹមតែបង្កើនតំបន់ព្រៃឈើប៉ុណ្ណោះទេ ប៉ុន្តែថែមទាំងពង្រឹងជីវចម្រុះ ដែលធ្វើឱ្យប្រសើរឡើងនូវការប្រមូលផ្តុំកាបូន និងរួមចំណែកនៅក្នុងការប្រយុទ្ធប្រឆាំងនឹងការប្រែប្រួលអាកាសធាតុថែមទៀតផង។ ចាប់ពីទសវត្សរ៍ឆ្នាំ ១៩៦០ ដើមឈើជិត១០០លានដើម ត្រូវបានដាំទូទាំងប្រទេសន័រវែស ដែលគួបផ្សំនឹងសីតុណ្ហភាព និងកម្រិតកាបូនឌីអ៊ុកស៊ីតកើនឡើងក្នុងប៉ុន្មានឆ្នាំថ្មីៗនេះ បាននាំឱ្យមានការពង្រីកតំបន់ព្រៃឈើយ៉ាងច្រើនគួរឱ្យកត់សម្គាល់។
ការពង្រីកព្រៃឈើរបស់ប្រទេសន័រវែស ត្រូវបានគាំទ្រដោយគោលនយោបាយដែលលើកកម្ពស់ការកាប់ឈើប្រកបដោយនិរន្តរភាព ការដាំដុះឡើងវិញ និងការអភិរក្សព្រៃឈើចាស់ដែលលូតលាស់។ រដ្ឋាភិបាលន័រវែស រួមជាមួយអង្គការបរិស្ថាននានាបានធ្វើការយ៉ាងយកចិត្តទុកដាក់ដើម្បីធានាថា ការអនុវត្តលើការគ្រប់គ្រងព្រៃឈើមានតុល្យភាពផលប្រយោជន៍សេដ្ឋកិច្ច ជាមួយនឹងការអភិរក្សបរិស្ថាន។ ប្រការនេះបានបង្កើតឱ្យមានប្រព័ន្ធអេកូឡូស៊ីដែលធន់ បង្កើនចំនួនសត្វព្រៃ ហើយធនធានធម្មជាតិត្រូវបានប្រើប្រាស់ប្រកបដោយការទទួលខុសត្រូវខ្ពស់។
ភាពជោគជ័យរបស់ប្រទេសន័រវែស ដែលសម្រេចបាននូវសមិទ្ធិផលបរិស្ថាន តាមរយៈការបង្កើនទំហំព្រៃឈើរបស់ខ្លួន គឺជាការបំផុសគំនិតដ៏សំខាន់ដល់បណ្តាប្រទេសផ្សេងទៀត ដែលខិតខំបង្កើនទំហំព្រៃឈើរបស់ពួកគេ និងប្រយុទ្ធប្រឆាំងការកាប់បំផ្លាញព្រៃឈើ។ ហើយព្រៃឈើរបស់ប្រទេសន័រវែសឥឡូវនេះ គ្របដណ្តប់ផ្នែកដ៏ច្រើននៃផ្ទៃដីរបស់ខ្លួន ដែលរួមចំណែកដល់កិច្ចខិតខំប្រឹងប្រែងជាសកល នៅក្នុងការកាត់បន្ថយការប្រែប្រួលអាកាសធាតុ និងថែរក្សាជម្រកធម្មជាតិ៕
ចែករំលែកព័តមាននេះ