រាជធានីភ្នំពេញ ៖ ក្រុមការងារប្រតិកម្មរហ័ស នៃមន្ទីរប្រឆាំងគ្រឿងញៀន នៅថ្ងៃទី៣១ ខែសីហា ឆ្នាំ២០២៤នេះ បានចេញសេចក្តីបំភ្លឺថា ប៉ុន្មានថ្ងៃចុងក្រោយនេះ មានសារព័ត៌មាន…
រាជធានីភ្នំពេញ ៖ ក្រុមការងារប្រតិកម្មរហ័ស នៃមន្ទីរប្រឆាំងគ្រឿងញៀន នៅថ្ងៃទី៣១ ខែសីហា ឆ្នាំ២០២៤នេះ បានចេញសេចក្តីបំភ្លឺថា ប៉ុន្មានថ្ងៃចុងក្រោយនេះ មានសារព័ត៌មាន និងអ្នកលេងបណ្តាញសង្គមមួយចំនួន បានបង្ហោះវីដេអូឃ្លីប (វីដេអូកាម៉េរាសុវត្ថិភាព) តាមហ្វេសប៊ុក និង Tiktok ស្តីពី «យុវជនម្នាក់អង្គុយលើម៉ូតូចាំយកឥវ៉ាន់សុខៗ ស្រាប់តែមានកម្លាំងមួយក្រុមឆ្មក់ចុះចាប់ឆៅៗ នៅម្តុំឈូកវ៉ា២ ខណ្ឌពោធិ៍សែនជ័យ រាជធានីភ្នំពេញ»។
វីដេអូឃ្លីបនេះ ត្រូវបានបង្ហោះចែកចាយតៗគ្នា ដោយមានការបញ្ចេញមតិយោបល់មួយចំនួន ធ្វើឱ្យមានការយល់ច្រឡំ ប៉ះពាល់ដល់កិត្តិយសសមត្ថកិច្ចជំនាញ ដែលកំពុងបន្តការស៊ើបអង្កេតបទល្មើសជាក់ស្តែង ស្រាវជ្រាវរកចាប់មុខសញ្ញាមេខ្លោង ពាក់ព័ន្ធនឹងបទល្មើសគ្រឿងញៀន ។
ជុំវិញការផ្សព្វផ្សាយវីដេអូនេះ ក្រុមប្រតិកម្មរហ័ស នៃមន្ទីរប្រឆាំងគ្រឿងញៀន សូមធ្វើការបំភ្លឺដល់សាធារណជន មេត្តាជ្រាបថា សមត្ថកិច្ចជំនាញ នៃមន្ទីរប្រឆាំងគ្រឿងញៀន បានបន្តការស៊ើបអង្កេតបទល្មើសជាក់ស្តែង ស្រាវជ្រាវតាមរកចាប់ខ្លួនឧក្រិដ្ឋជនជាមេខ្លោង ពាក់ព័ន្ធករណីជួញដូរគ្រឿងញៀនដ៏ធំមួយ ដែលត្រូវសមត្ថកិច្ចជំនាញយើងបង្ក្រាបបាន កាលពីថ្ងៃទី២៤ ខែសីហា ឆ្នាំ២០២៤។ លុះនៅថ្ងៃទី២៧ ខែសីហា ឆ្នាំ២០២៤ នៅម៉ោងប្រហែល៩យប់ កម្លាំងជំនាញមន្ទីរប្រឆាំងគ្រឿងញៀន បានស្រាវជ្រាវរកឃើញគោលដៅមុខសញ្ញាមេខ្លោង កំពុងលាក់ខ្លួននៅម្តុំផ្សារឈូកវ៉ា២ ក្នុងខណ្ឌពោធិ៍សែនជ័យ ក៏បានចុះប្រតិបត្តិការបន្ទាន់។ ពេលចុះដល់គោលដៅគាប់ជួនយុវជន មានភិនភាគស្រដៀងគ្នានឹងមុខសញ្ញាមេខ្លោងជួញដូរគ្រឿងញៀន ដែលកំពុងអង្គុយលើម៉ូតូ ក៏សមត្ថកិច្ចជំនាញយើងបានឃាត់សួរនាំ។ បន្ទាប់ពីពិនិត្យភិនភាគ និងអត្តសញ្ញាណ ទើបដឹងថា យុវជននោះ មិនមែនជាមុខសញ្ញាមេខ្លោងគ្រឿងញៀននោះទេ កម្លាំងជំនាញរបស់យើងក៏បានអនុញ្ញាតឱ្យរូបគេត្រឡប់ទៅវិញ ហើយកម្លាំងសមត្ថកិច្ច ក៏បានសុំការអធ្យាស្រ័យផងដែរ ។
មន្ទីរប្រឆាំងគ្រឿងញៀន សំណូមពរយ៉ាងទទូចដល់សារព័ត៌មាន និងអ្នកលេងបណ្តាញសង្គម ដែលបានបង្ហោះវីដេអូឃ្លីបនេះ មេត្តាកុំបង្ហោះចែកចាយបន្តទៀត ព្រោះបង្កឱ្យមានការភ័ន្តច្រឡំ មកលើសមត្ថកិច្ចជំនាញ ដែលបានខិតខំតស៊ូបង្ក្រាបបទល្មើសគ្រឿងញៀន និងបន្តការស្រាវជ្រាវរកមុខសញ្ញាមេខ្លោង និងមុខសញ្ញាពាក់ព័ន្ធ ។
មន្ទីរប្រឆាំងគ្រឿងញៀន សូមថ្លែងអំណរគុណ ចំពោះបណ្តាសារព័ត៌មាន និងសាធារណជនគ្រប់មជ្ឈដ្ឋាន ដែលតែងតែសហការគាំទ្រ និងតាមដានយ៉ាងយកចិត្តទុកដាក់រាល់កិច្ចការរបស់មន្ទីរប្រឆាំងគ្រឿងញៀន។ ជាមួយគ្នានេះមន្ទីរប្រឆាំងគ្រឿងញៀន ក៏សំណូមពរដល់បងប្អូនជាអ្នកសារព័ត៌មាន មុននឹងផ្សព្វផ្សាយព័ត៌មានអ្វីមួយ ពាក់ព័ន្ធនឹងមន្ទីរប្រឆាំងគ្រឿងញៀន ហើយពុំទាន់ប្រមូលព័ត៌មានគ្រប់ជ្រុងជ្រោយនោះ អាចធ្វើការទាក់ទងមកលេខ Hotline របស់មន្ទីរប្រឆាំងគ្រឿងញៀនចំនួន៥ខ្សែ ៖ 670 ប្រព័ន្ធ Cellcard អាចហៅទូរស័ព្ទចូលដោយឥតគិតថ្លៃ, 093 456 888 (Smart), 011 248 888 (Cellcard), 015 222 226 (Smart), 066 661 661 (Metfone) ដើម្បីជៀងវាងផ្សាយមិនច្បាស់អាចបង្កឱ្យប៉ះពាល់ដល់កិត្តិយសរបស់ស្ថាប័នអនុវត្តន៍ច្បាប់ ដែលបាន និងកំពុងខិតខំបំពេញការងារទាំងយប់ទាំងថ្ងៃ ដើម្បីថែរក្សាសន្តិសុខសណ្តាប់ធ្នាប់សង្គម ៕
ចែករំលែកព័តមាននេះ