ទីក្រុងកៀវ៖ ថ្មីៗនេះ មានហេតុការណ៍ធ្លាក់យន្តហោះម៉ាកអែហ្វ១៦ (F16) មួយគ្រឿងរបស់អ៊ុយក្រែនដែលជាជំនួយរបស់ក្រុមបស្ចិមប្រទេស។ នៅពេលបើកប្រតិបត្តិការវាយតដៃជាមួយកងទ័ពរុស្ស៊ីសុខៗ យន្តហោះនេះក៏ធ្លាក់ទៅលើដីតែម្ដង។ នេះបើយោងតាមការអះអាងរបស់យោធាអ៊ុយក្រែន។ ហេតុការណ៍ធ្លាក់យន្តហោះរបស់ប្រទេសអាមេរិកនេះកើតឡើងតាំងពីថ្ងៃចន្ទ។ ប៉ុន្តែគេទើបតែទម្លាយឱ្យដឹងកាលពីយប់មិញ។ អាកាសយានិកអ៊ុយក្រែនម្នាក់ក៏បានស្លាប់នៅពេលនោះផងដែរ។
អ៊ុយក្រែនស្នើសុំយន្តហោះនេះតាំងពីយូរមកហើយ។ លុះពេលទទួលបានយន្តហោះនេះត្រឹមតែប៉ុន្មានសប្ដាហ៍ប៉ុណ្ណោះក៏កើតមានហេតុការណ៍ធ្លាក់យន្តហោះតែម្ដង។ អគ្គសេនាធិការដ្ឋានកងទ័ពអ៊ុយក្រែនសរសេររៀបរាប់នៅលើហ្វេសប៊ុកថាយន្តហោះ១គ្រឿងបានធ្លាក់ហើយ ហើយអាកាសយានិកក៏បានស្លាប់ដែរនៅពេលបើកទៅកៀកនឹងគោលដៅវាយប្រហារ។
អែហ្វ១៦មានប្រសិទ្ធខ្ពស់ក្នុងការវាយប្រហារ និងធ្លាប់បាញ់ទម្លាក់គ្រាប់មីស៊ីលរបស់រុស្ស៊ីបួនគ្រាប់។ នៅថ្ងៃធ្លាក់យន្តហោះនោះ អ៊ុយក្រែនអះអាងថារុស្ស៊ីបានបាញ់មីស៊ីលជាងពីររយគ្រាប់ និងបញ្ជូនយន្តហោះដ្រូនជាច្រើនគ្រឿងចូលទឹកដីអ៊ុយក្រែន។ គោលដៅរបស់ពួកគេគឺវាយសង្គ្រប់ទៅលើទីតាំងផលិតថាមពលដូចជាអគ្គិសនី និងប្រេងឥន្ធនៈជាដើម។
អ៊ុយក្រែនថ្លែងថានៅពេលបើកទៅកៀកនឹងគោលដៅវាយប្រហារ យន្តហោះនោះស្រាប់តែដាច់ការទាក់ទងគ្នា។ លុះពេលភ្ជាប់ទំនាក់ទំនងគ្នាឡើងវិញ គេដឹងថាយន្តហោះនោះបានធ្លាក់ហើយ។ មន្ត្រីយោធាអាមេរិកយល់ថាតាមមើលទៅ យន្តហោះនេះប្រហែលជាមិនមែនធ្លាក់ដោយសារការបាញ់ប្រហាររបស់គ្រាប់មីស៊ីលរុស្ស៊ីទេ។ យន្តហោះប្រហែលជាធ្លាក់ដោយសារអាកាសយានិក ឬដោយសារបញ្ហាបច្ចេកទេស។ ឥឡូវនេះ គេកំពុងស៊ើបអង្កេតសំណុំរឿងធ្លាក់យន្តហោះនេះហើយ។
អ៊ុយក្រែនមិនដែលទម្លាយអាថ៌កំបាំងថាខ្លួនបានទទួលយន្តហោះម៉ាកនេះប៉ុន្មានគ្រឿងទេ។ គ្រាន់តែថាតិចឬច្រើន ការបាត់បង់យន្តហោះត្រឹមតែ១គ្រឿងក៏ជាការគួរឱ្យសោកស្ដាយផងដែរនៅពេលយន្តហោះកំពុងខ្សត់ខ្សោយ។ ប្រភពខ្លះអះអាងថាអ៊ុយក្រែនមានយន្តហោះនេះចំនួន៦គ្រៀង។ លោកហ្សេឡិនស្គីថ្លែងថាអ៊ុយក្រែនគ្មានអាកាសយានិកដែលមានជំនាញគ្រប់គ្រាន់ច្រើនទេដើម្បីបញ្ជូនទៅរៀនបើកយន្តហោះម៉ាកនេះ ហើយអ៊ុយក្រែនក៏គ្មានយន្តហោះនេះច្រើនគ្រប់គ្រាន់នោះដែរ។
យោធាអ៊ុយក្រែនបញ្ជាក់នៅលើហ្វេសប៊ុកថាអាកាសយានិកដែលស្លាប់នោះឈ្មោះអូឡិចស៊ីមេស (Oleksiy Mes)។ គាត់ធ្លាប់មានស្នាដៃឆ្នើមក្នុងការបាញ់ទម្លាក់គ្រាប់មីស៊ីលរបស់រុស្ស៊ី។ ប៉ុន្តែគួរឱ្យស្ដាយគាត់ត្រូវពលីជីវិតនៅពេលបំពេញការងារនេះ។ លោកមេសមានឈ្មោះសម្ងាត់ថាមូនហ្វ៊ីស (Moonfish)។ គាត់ចូលរួមហ្វឹកហាត់បើកយន្តហោះអែហ្វ១៦កាលពីឆ្នាំ២០២៣។
ជាការពិត នៅពេលអ៊ុយក្រែនមានយន្តហោះនេះនៅក្នុងដៃ វាជាខ្នងបង្អែកដ៏សំខាន់មួយដើម្បីតទល់ជាមួយរុស្ស៊ីដែលបន្តធ្វើព្យុះធ្វើភ្លៀងរយៈពេលពីរឆ្នាំកន្លះមកហើយ។ ក៏ប៉ុន្តែអ្នកវិភាគយោធាយល់ថាទោះបីយន្តហោះអែហ្វ១៦មានសមត្ថភាពខ្លាំងប៉ុណ្ណាក៏ដោយ បើអ៊ុយក្រែនមានយន្តហោះនេះត្រឹមតែបន្តិចបន្តួច វាមិនអាចជួយអ្វីបានច្រើនទេនៅក្នុងសង្គ្រាមនេះ៕
ចែករំលែកព័តមាននេះ