ទីក្រុងបាងកក៖ នៅសល់តែពីរបីថ្ងៃទៀតប៉ុណ្ណោះនឹងដល់ពេលឱសានវាទដែលគណបក្សភឿថៃត្រូវរៀបចំបញ្ជីគណៈរដ្ឋមន្ត្រីថ្មីដើម្បីបញ្ជូនទៅឱ្យសភាបោះឆ្នោតអនុម័ត។ លើកនេះច្បាស់ហើយថាគណបក្សភឿថៃសម្រេចចិត្តអូសគណបក្សប្រជាធិបតេយ្យដែលធ្លាប់ជាគូបដិបក្សនយោបាយនឹងគ្នាដើម្បីចូលទៅក្នុងកញ្ចប់សម្ព័ន្ធភាព។ ដូច្នេះ វាជាសញ្ញាបង្ហាញថាគណបក្សភឿថៃសុខចិត្តទុកទំនាស់ដែលធ្លាប់មានមានពីអតីតកាលមួយឡែកសិនដើម្បីចាប់ដៃគ្នាបង្កើតរដ្ឋាភិបាលចម្រុះ។
អគ្គលេខាធិការគណបក្សភឿថៃ លោកសារាវង្ស ធានថង (Sarawong Thienthong)តាមពិត ជម្រើសដែលមាននៅក្នុងដៃរបស់ភឿថៃសុទ្ធតែមិនសូវល្អដូចគ្នា។ ប៉ុន្តែគណបក្សនេះសុខចិត្តចងសម្ព័ន្ធភាពជាមួយគណបក្សប្រជាធិបតេយ្យ ហើយដកគណបក្សផាឡាំងប្រឆារ៉ាត់ចេញពីកញ្ចប់សម្ព័ន្ធភាព។ អគ្គលេខាធិការគណបក្សភឿថៃ លោកសារាវង្ស ធានថងបានផ្ញើលិខិតអញ្ជើញជាលក្ខណៈឯកជនទៅអគ្គលេខាធិការគណបក្សប្រជាធិបតេយ្យរួចហើយ ហើយក៏បានជូនដំណឹងទៅប្រធានគណបក្សប្រជាធិបតេយ្យរួចហើយដែរ។
ពោលគឺបន្ទាប់ពីគណបក្សភឿថៃសម្រេចចិត្តច្បាស់ហើយថាត្រូវតែផ្ដាច់សម្ព័ន្ធភាពជាមួយគណបក្សផាឡាំងប្រឆារ៉ាត់ដែលដឹកនាំដោយលោកប្រាវីតវង្សសុវណ្ណ។ ប៉ុន្តែភឿថៃនៅតែស្វាគមន៍ក្រុមផ្ដាច់ខ្លួនរបស់គណបក្សផាឡាំងប្រឆារ៉ាត់ដែលចង់ចូលរួមនៅក្នុងសម្ព័ន្ធភាព។ មូលហេតុដែលលោកអញ្ជើញគណបក្សប្រជាធិបតេយ្យឱ្យចូលរួមនៅក្នុងសម្ព័ន្ធភាពនេះដើម្បីធានាថារាជរដ្ឋាភិបាលមានសំឡេងគាំទ្រគ្រប់គ្រាន់ប្រកបដោយជានិរន្តរភាពនៅក្នុងសភា។
ក្រៅពីនេះ ភឿថៃក៏កំពុងដើរកៀរគរគណបក្សនយោបាយ និងអ្នកនយោបាយដែលគ្មានបក្ស (ឬអ្នកនយោបាយឯករាជ្យ) ដើម្បីចូលរួមនៅក្នុងសម្ព័ន្ធភាពនេះ។ លោកថ្លែងបន្តទៀតថាគណបក្សភឿថៃសុខចិត្តបំភ្លេចចោលទំនាស់នយោបាយជាមួយគណបក្សប្រជាធិបតេយ្យកាលពីអតីតកាល។ រឿងដែលបានកន្លងផុតទៅហើយទុកឱ្យវាកន្លងផុតទៅតាមដំណើរចុះ។
លោកមានជំនឿថាគណបក្សទាំង២នឹងស្រុះស្រួលគ្នាដើម្បីដឹកនាំជាតិ និងប្រជាជនឆ្ពោះទៅរកមាគ៌ាដ៏ត្រឹមត្រូវ។ ក្រុមអ្នកតំណាងរាស្ត្រគណបក្សភឿថៃមិនជំទាស់នឹងគម្រោងរួបរួមគ្នានេះទេ។ តាមពិត គេអាចដឹងតាំងពីដំបូងដៃមកម៉្លេះថាការរៀបចំក្បាលម៉ាស៊ីនដឹកនាំថ្មីរបស់គណបក្សប្រជាធិបតេយ្យដោយតែងតាំងលោកឆាឡឺមឆៃ និងដេតអ៊ីត (Charlermchai & Det-it) ឱ្យធ្វើជាប្រធានគណបក្សនេះកាលពីខែធ្នូ ឆ្នាំ២០២២៣ វាជាសញ្ញាបញ្ជាក់ថាគណបក្សនេះត្រៀមចូលរួមជាមួយភឿថៃ។
លោកឆាឡឺមឆៃ (រូបកណ្ដាល) ជាប្រធានគណបក្សប្រជាធិបតេយ្យដែលទើបឡើងថ្មីកាលពីឆ្នាំ២០២៣ឆ្លើយតបទៅនឹងមតិរិះគន់ថាបើគណបក្សទាំង២រួបរួមគ្នាយ៉ាងដូច្នេះ តើអាចជាការក្បត់ឆន្ទៈរាស្ត្រដែរឬទេ? លោកអគ្គលេខាធិការគណបក្សភឿថៃពន្យល់ថាសេណារីយោនយោបាយនៅពេលមុន និងពេលនេះមិនដូចគ្នាទេ។ អ្វីៗចាប់ផ្ដើមប្រែប្រួលនៅពេលគណបក្សប្រជាធិបតេយ្យផ្លាស់ប្ដូរក្បាលម៉ាស៊ីនដឹកនាំរបស់ខ្លួន។ អភិសិទ្ធិវិជ្ជាជីវ៉ា (Abhisit Vejjajiva) ដែលធ្លាប់បង្ក្រាបក្រុមអាវក្រហមយ៉ាងចាស់ដៃនោះបានដកខ្លួនទាំងស្រុងពីគណបក្សប្រជាធិបតេយ្យ និងប្រកាសឈប់ធ្វើនយោបាយជារៀងរហូត។
អគ្គលេខាធិការគណបក្សភឿថៃ លោកសារាវង្ស ធានថង (Sarawong Thienthong)គេដឹងថាមនុស្សសំខាន់ៗបីរូបរបស់គណបក្សប្រជាធិបតេយ្យដែលរួមទាំងលោកឈួនលិកប៉ៃ (Chuan Leekpai) ផងដែរបានប្រឆាំងជំទាស់នឹងការរួបរួមគ្នាជាមួយគណបក្សភឿថៃ។ ប៉ុន្តែអគ្គលេខាធិការគណបក្សប្រជាធិបតេយ្យបញ្ជាក់ថាអ្នកណាជំទាស់មិនសំខាន់ទេ។ សំខាន់គឺអ្នកតំណាងរាស្ត្រ និងសមាជិកទាំងអស់ត្រូវតែគោរពទៅតាមមាគ៌ានយោបាយ និងសេចក្ដីសម្រេចរបស់បក្ស។ មានន័យថាការជំទាស់នោះជាលក្ខណៈឯកជនតែប៉ុណ្ណោះ និងមិនមែនជាគោលជំហររួមនោះទេ៕
អគ្គលេខាធិការគណបក្សប្រជាធិបតេយ្យ លោកដេតអ៊ីត ខាវថង (Det-it Khaothong) (រូបកណ្ដាលខាងមុខ)
ចែករំលែកព័តមាននេះ