ទីក្រុងយេរូសាឡឹម៖ ថ្មីៗនេះ អ៊ីស្រាអែលរំដោះបានចំណាប់ខ្មាំងម្នាក់ទៀតអាយុ៥២ឆ្នាំដែលត្រូវក្រុមហាម៉ាស់ចាប់យកទៅបង្ខាំងទុកនៅក្នុងរូងក្រោមដី។ អ៊ីស្រាអែលបញ្ជូនកងកម្លាំងពិសេសរបស់ខ្លួនចេញប្រតិបត្តិការពិសេសដ៏ស្មុគស្មាញមុននឹងឈានទៅដល់ការរំដោះចំណាប់ខ្មាំងឈ្មោះខាអ៊ីត ហ្វារ៉ាន់ អាល់កាឌី (Kaid Farhan Al-Qadi) ជាអ្នករស់នៅតំបន់ខាងត្បូង។…
ទីក្រុងយេរូសាឡឹម៖ ថ្មីៗនេះ អ៊ីស្រាអែលរំដោះបានចំណាប់ខ្មាំងម្នាក់ទៀតអាយុ៥២ឆ្នាំដែលត្រូវក្រុមហាម៉ាស់ចាប់យកទៅបង្ខាំងទុកនៅក្នុងរូងក្រោមដី។ អ៊ីស្រាអែលបញ្ជូនកងកម្លាំងពិសេសរបស់ខ្លួនចេញប្រតិបត្តិការពិសេសដ៏ស្មុគស្មាញមុននឹងឈានទៅដល់ការរំដោះចំណាប់ខ្មាំងឈ្មោះខាអ៊ីត ហ្វារ៉ាន់ អាល់កាឌី (Kaid Farhan Al-Qadi) ជាអ្នករស់នៅតំបន់ខាងត្បូង។
គាត់ត្រូវទាហានអ៊ីស្រាអែលជួយសង្គ្រោះចេញពីរូងក្រោមដី។ អ្នកនាំពាក្យអ៊ីស្រាអែលបញ្ជាក់ថានៅពេលនេះ គាត់មានសុខភាពល្អជាធម្មតា។ ក្រុមគ្រួសាររបស់គាត់ត្រូវគេផ្ដល់ព័ត៌មានលម្អិតរួចហើយអំពីស្ថានភាពរបស់ចំណាប់ខ្មាំងរូបនេះ។ កាលពីមុននេះបន្តិច កងទ័ពពិសេសរបស់អ៊ីស្រាអែលបានដើររាតត្បាតនៅក្នុងរូងក្រោមដីសុខៗក៏ប្រទះឃើញចំណាប់ខ្មាំងម្នាក់ខាងលើនេះ។ ចម្លែកណាស់នៅពេលនោះគាត់នៅតែម្នាក់ឯងប៉ុណ្ណោះ គ្មានឃើញក្រុមហាម៉ាស់នៅក្បែរនោះសូម្បីតែម្នាក់។
បងប្រុសរបស់លោកអាល់កាឌី (ដែលជាចំណាប់ខ្មាំង) ប្រាប់ថាគាត់រកពាក្យអ្វីថ្លាថ្លែងមិនចេញទេចំពោះអារម្មណ៍មួយនេះ។ មិនត្រឹមតែមានអារម្មណ៍ថាប្អូនរបស់គាត់ប្រៀបបាននឹងស្លាប់ហើយរស់ឡើងវិញប៉ុណ្ណោះទេ ប៉ុន្តែវាលើសពីហ្នឹងទៅទៀត។ លោកអាល់កាឌីជាចំណាប់ខ្មាំងទី៨ដែលវិលត្រឡប់មកវិញទាំងរស់នៅក្នុងប្រតិបត្តិការរំដោះចំណាប់ខ្មាំងចំនួន៤ដង។
មានន័យថាពេលខ្លះចូលទៅរំដោះបានត្រឹមតែសាកសពត្រឡប់មកវិញ។ ពេលខ្លះមិនត្រឹមតែសាកសពទេ ប៉ុន្តែនៅសល់តែឆ្អឹងប៉ុណ្ណោះព្រោះចំណាប់ខ្មាំងមិនដឹងស្លាប់តាំងពីអង្កាល់។ ដោយឡែក ករណីលោកអាល់កាឌីមានលក្ខណៈពិសេសជាងគេ។ ទី១-ទាហានអ៊ីស្រាអែលរំដោះគាត់បានទាំងនៅរស់ និងទី២-ទាហានអ៊ីស្រាអែលចូលទៅរំដោះនៅក្នុងរូងក្រោមតែម្ដង។
ចំណាប់ខ្មាំង៧នាក់ទៀតរំដោះបានទាំងរស់មែន ប៉ុន្តែរំដោះនៅខាងក្រៅរូងក្រោមដី។ ករណីចម្លែក១ទៀតនៅត្រង់ថាហេតុអ្វីក្រុមហាម៉ាស់មិនដាក់កម្លាំងយាមចំណាប់ខ្មាំងម្នាក់នេះក្រែងលោមានអ្នកណាមកជួយរំដោះ? នាយករដ្ឋមន្ត្រីអ៊ីស្រាអែល លោកណឺតាន់យ៉ាហ៊ូ បានសួរសុខទុក្ខលោកអាល់កាឌីតាមរយៈការសន្ទនាតាមប្រព័ន្ធវីឌីអូពីចម្ងាយ។ លោកណឺតាន់យ៉ាហ៊ូថ្លែងថា «លោកហ្វារ៉ាន់, ខ្ញុំមានចិត្តត្រេកអរណាស់ដែលបាននិយាយជាមួយលោក។ ខ្ញុំចង់ប្រាប់លោកថាយើងមិនដែលបំភ្លេចនរណាម្នាក់ឡើយ។ ដូចលោកឃើញស្រាប់, យើងមិនដែលភ្លេចលោកទេ។
រដ្ឋមន្ត្រីការពារជាតិអ៊ីស្រាអែលថ្លែងថាទម្រាំអាចរំដោះលោកអាល់កាឌីមកវិញ ទាហានអ៊ីស្រាអែលខំប្រឹងយ៉ាងរលះរលាំងខ្លាំងណាស់ដែរប្រកបដោយទឹកចិត្តមោះមុតបំផុត។ ប្រធានាធិបតីអ៊ីស្រាអែលថ្លែងថាលោកមានអារម្មណ៍លើសពីសប្បាយរីករាយទៅទៀតចំពោះដំណឹងនៃការរំដោះបានចំណាប់ខ្មាំងលើកនេះ។
ឥឡូវនេះ បន្ទាប់ពីលោកអាល់កាឌីអាចវិលត្រឡប់មកវិញដោយសុវត្ថិភាពហើយ មានន័យថាចំណាប់ខ្មាំងដែលនៅសេសសល់ក្នុងដៃរបស់ក្រុមហាម៉ាស់មានចំនួន១០៤នាក់ទៀត។ នេះបើយោងតាមរបាយការណ៍របស់ខុទ្ទកាល័យលោកណឺតាន់យ៉ាហ៊ូ និងសមាគមក្រុមគ្រួសាររបស់ចំណាប់ខ្មាំង។ នៅក្នុងចំណោមនោះ គេគិតថាចំណាប់ខ្មាំង៣៤នាក់បានស្លាប់ហើយ៕
ចែករំលែកព័តមាននេះ