ឡានកំពុងឆ្លងផ្លូវដែក ស្រាប់តែរថភ្លើងមកបុ.,កខ្ទា.តផ្លូវ
- ព្រះសីហនុ
ខេត្តព្រះសីហនុ ៖ នៅវេលាម៉ោង១២និង២០នាទីថ្ងៃទី២៥ ខែសីហា ឆ្នាំ២០២៤ នៅចំណុចក្រុម១ ភូមិ១ ឃុំអូរត្រេះ ស្រុកស្ទឹងហាវ ខេត្តព្រះសីហនុ…
ខេត្តព្រះសីហនុ ៖ នៅវេលាម៉ោង១២និង២០នាទីថ្ងៃទី២៥ ខែសីហា ឆ្នាំ២០២៤ នៅចំណុចក្រុម១ ភូមិ១ ឃុំអូរត្រេះ ស្រុកស្ទឹងហាវ ខេត្តព្រះសីហនុ មានករណីគ្រោះថ្នាក់ចរាចរណ៍មួយកើតឡើងរវាង រថភ្លើង និងរថយន្ត មុខបន្ទាយផ្នែកសឹករងស្ទឹងហាវ ។
តាមព័ត៌មានថា រថយន្តម៉ាកនីស្សាន់ ពណ៌ស ពាក់ផ្លាកលេខ ព្រះសីហនុ ២B៨៦០៥ បើកបរដោយឈ្មោះ សួន សុខណា ភេទប្រុស អាយុ៦៧ឆ្នាំ ជាមន្ត្រីយោធា ។ ការបើកមកដល់ចំណុចកើតហេតុខាងលើ គឺរថយន្តបានបើកចេញពីបន្ទាយផ្នែកសឹករងស្ទឹងហាវ ឆ្លងផ្លូវដែកក៏ត្រូវរថភ្លើងបុកតែម្ដង បណ្ដាលឱ្យខ្ទាតរថយន្តប្រហែល១០ម៉ែត្រពីផ្លូវដែក ធ្វើឱ្យអ្នកបើកបររថយន្តរបួសក្បាល ។
រថភ្លើងដែលបុកពណ៌ក្រហម មានទិសដៅពីភ្នំពេញមកខេត្តព្រះសីហនុ(រថភ្លើងអូសទូទទេ) ។
មន្ត្រីយោធាដែលរងរបួសបញ្ជូនទៅព្យាបាលនៅមន្ទីរពេទ្យបង្អែកខេត្តព្រះសីហនុ ចំណែករថភ្លើងបានបន្តដំណើរទៅខេត្តព្រះសីហនុ ដោយរលូនទៅ ។ ឯរថយន្តរងគ្រោះបានរក្សាទុកនៅបន្ទាយផ្នែកសឹករងស្ទឹងហាវ ។
មុននេះសួងសាធារណការ និងក្រុមហ៊ុន រ៉ូយ៉ាល់ រេលវែ ដែលគ្រប់គ្រងខ្សែរថភ្លើង បានប្រកាសដាក់ចេញនូវវិធានការបន្ទាន់ចំនួន៣ចំណុច តាមរយៈសន្និសីទសារព័ត៌មានមួយកាលពីដើមខែមេសា ។
វិធានការទាំង៣ចំណុចនោះទី១-ការបង្កើនការបំពាក់ហេដ្ឋារចនាសម្ព័ន្ធការពារសុវត្ថិភាពតាមផ្លូវ ដែលមានផ្លូវដែកឆ្លងកាត់ និងការដាក់ឆ្មាំការពាររបាំងផ្លូវដែក ។ទី២-ការបំពាក់ស្លាកសញ្ញាចរាចរណ៍ ។និងទី៣-វិធានការផ្សព្វផ្សាយអប់រំ ។
ការចេញវិធានការចំពោះមុខនេះ គឺធ្វើឡើងបន្ទាប់ពីគ្រោះថ្នាក់ចរាចរណ៍មួយកើតឡើងនៅខេត្តពោធិ៍សាត់ កាលពីថ្ងៃទី២៩ ខែមីនា រវាងរថយន្តក្រុង និងរថភ្លើង ។ សូមបញ្ជាក់ថា យ៉ាងហោចណាស់មនុស្សចំនួន៤៦នាក់ បានរងរបួសធ្ងន់ និងស្រាល ដោយសារតែរថភ្លើងដឹកអ្នកដំណើរមួយគ្រឿង បានបុកនឹងរថយន្តក្រុងដឹកអ្នកដំណើរដូចគ្នា កាលពីថ្ងៃទី២៩ ខែមីនា ឆ្នាំ២០២៤ នៅចំណុចផ្លូវចូលរមណីយដ្ឋានទឹកធ្លាក់ច្រកល្អៀង ស្ថិតក្នុងភូមិបំណក់ ឃុំឈើតុំ ស្រុកក្រគរ ខេត្តពោធិ៍សាត់ ។ នោះជាគ្រោះថ្នាក់គួរឱ្យភ្ញាក់ផ្អើលដែលមិនធ្លាប់មាន ។
គួរកត់សម្គាល់ថា ត្រឹមរយៈពេលតែ៣ខែដើមឆ្នាំ២០២៤នេះ គឺមានគ្រោះថ្នាក់រវាងរថភ្លើង បុករថយន្តកើតមានយ៉ាងតិច៣លើកហើយ គឺ២ករណីនៅខេត្តពោធិ៍សាត់ និង១ករណីនៅខេត្តបាត់ដំបង ។
នៅខេត្តបាត់ដំបង កាលថ្ងៃទី០១ ខែកុម្ភ: ឆ្នាំ២០២៤ ក៏មានករណីគ្រោះថ្នាក់ចរាចរណ៍មួយកើតឡើង រវាងរថយន្តដឹកដី និងរថភ្លើង បណ្តាលឱ្យមនុស្សម្នាក់របួសធ្ងន់ ខណៈថ្ងៃទី១៩ ខែកុម្ភៈ ឆ្នាំ២០២៤ រថភ្លើងបានបុកជាមួយរថយន្តម៉ាកហ៊ីយ៉ាន់ដាយដឹកស្រូវ នៅស្រុកបាកាន ខេត្តពោធិ៍សាត់ មានអ្នករងរបួសធ្ងន់៤នាក់ និងរបួសស្រាល១នាក់ ៕
ចែករំលែកព័តមាននេះ