ទីក្រុងប៊ែឡាំង៖ មានហេតុការណ៍ចាក់សម្លាប់មនុស្សនៅឯពិធីអបអរសាទរខួបអនុស្សាវរីយ៍មួយដែលគេរៀបចំឡើងនៅទីក្រុងសូលីងហ្គែន (Solingen) ប្រទេសអាល្លឺម៉ង់ភាគខាងលិច បណ្ដាលឱ្យមនុស្ស៣នាក់ស្លាប់ និង៤នាក់រងរបួសធ្ងន់។ សមត្ថកិច្ចកំពុងតាមស្វែងរកបុរសជាជនដៃដល់សព្វទីកន្លែង ខណៈដែលគាត់កំពុរត់គេចខ្លួន។ គេបានបញ្ជូនកងកម្លាំងពិសេសចុះទៅកន្លែងកើតហេតុដើម្បីការពារសន្តិសុខ។
សាក្សីនិយាយថាហេតុការណ៍នោះកើតឡើងនៅម៉ោងជាង៩យប់។ នៅពេលនោះ បុរសជាជនដៃដល់បានយកកាំបិតដេញចាក់ដោយឥតរើសមុខទៅលើហ្វូងមនុស្សដែលចូលរួមនៅក្នុងពិធីបុណ្យ។ នេះជាពិធីអបអរសាទរខួបទី៦៥០ឆ្នាំនៃការបង្កើតទីក្រុងសូលីងហ្គែន។ សមត្ថកិច្ចរកឃើញថាហេតុការណ៍ចាក់សម្លាប់មនុស្សនេះកើតឡើងនៅក្បែរកន្លែងរៀបចំពិធីនេះតែម្ដងដែលមានការប្រគំតន្ត្រីយ៉ាងអ៊ឹកអធិក។
រដ្ឋមន្ត្រីមហាផ្ទៃនៅតំបន់ន័សរ៉ាញ-វេសហ្វាលា (North Rhine-Westphalia) បង្ហាញអារម្មណ៍ស្លុតរន្ធត់ចំពោះហេតុការណ៍នេះនៅលើកញ្ចក់ទូរទស្សន៍។ លោកថ្លែងថាគ្មាននរណាម្នាក់ដឹងថាមានរឿងនេះកើតឡើងទេ។ លោកមិនអាចធ្វើអត្ថាធិប្បាយអ្វីទាល់តែសោះពាក់ព័ន្ធនឹងដើមហេតុនៃការចាក់សម្លាប់មនុស្ស ហើយក៏មិនអាចធ្វើអត្ថាធិប្បាយអំពីជនដៃដល់រូបនោះដែរ។
អ្នកនាំពាក្យនគរបាលថ្លែងនៅក្នុងសន្និសីទសារព័ត៌មានថាបើយោងទៅតាមការវាយតម្លៃបឋម នេះជាអំពើចាក់សម្លាប់ដោយចេតនា និងគិតទុកជាមុន។ ចំពោះសំណួរថាតើនេះអាចចាត់ទុកជាអំពើភេរវកម្មដែរឬទេ? អ្នកនាំពាក្យរូបនេះសូមនិយាយដោយប្រយ័ត្នប្រយែង។ ការចាត់ទុកថាជាអំពើភេរវកម្មនោះគ្រាន់តែជាការប៉ាន់ស្មានតែប៉ុណ្ណោះ។ ដូច្នេះ សម្រាប់ពេលនេះ លោកសូមមិនទាន់ធ្វើអត្ថាធិប្បាយថាជាអំពើអ្វីឱ្យពិតប្រាកដទេ៕
ចែករំលែកព័តមាននេះ