ប្រទេសថៃ ៖ ប្រភពពីកាសែត South China Morning Post កាលពីពេលថ្មីៗនេះ បានរាយការណ៍ថា ប្រទេសថៃកំពុងពង្រឹងជំហររបស់ខ្លួនជាអ្នកផ្គត់ផ្គង់ផ្លែទុរេនធំបំផុត…
ប្រទេសថៃ ៖ ប្រភពពីកាសែត South China Morning Post កាលពីពេលថ្មីៗនេះ បានរាយការណ៍ថា ប្រទេសថៃកំពុងពង្រឹងជំហររបស់ខ្លួនជាអ្នកផ្គត់ផ្គង់ផ្លែទុរេនធំបំផុត និងឈានមុខគេទៅកាន់ប្រទេសចិន។
ការនាំចេញផ្លែទុរេនស្រស់ពីប្រទេសថៃទៅប្រទេសចិន ដែលជាអ្នកនាំចូលផ្លែទុរេនធំបំផុតរបស់ពិភពលោក បានស្ទុះងើបឡើងវិញនៅក្នុងត្រីមាសទី២ បន្ទាប់ពីការធ្លាក់ចុះ កាលពីដើមឆ្នាំនេះ។ ការស្ទុះងើបឡើងវិញរបស់ថៃ ត្រូវបានកំណត់ថាជាការប្រមូលផលតាមរដូវកាល និងកេរ្តិ៍ឈ្មោះល្បីល្បាញយូរអង្វែងមកហើយ សម្រាប់គុណភាព។
ទិន្នន័យពីគយចិនបានបង្ហាញថា ការនាំចូលផ្លែទុរេនពីប្រទេសថៃបានកើនជិត ២,៦៧ ពាន់លានដុល្លារអាមេរិក ដែលស្មើនឹង ៧៥% នៃការនាំចូលផ្លែទុរេនសរុបរបស់ខ្លួន។ តួលេខនេះ គឺមានភាពប្រសើរឡើងគួរឱ្យកត់សម្គាល់បើធៀបទៅនឹង ៤២.៥% ដែលបានកត់ត្រានៅក្នុងត្រីមាសទី១ នៃឆ្នាំនេះ។ លើសពីនេះ ប្រទេសថៃមានចំណែកទីផ្សារនាំចូលទុរេនរបស់ប្រទេសចិនចំនួន ៦៨% នៅក្នុងឆ្នាំ ២០២៣។
ដៃគូប្រកួតប្រជែងសំខាន់របស់ប្រទេសថៃ គឺប្រទេសវៀតណាមបានផ្គត់ផ្គង់ស្ទើរតែទាំងអស់នៃការដឹកជញ្ជូនដែលនៅសេសសល់ក្នុងត្រីមាសទី២ របស់ខ្លួន។ ផ្លែទុរេនវៀតណាមមានតម្លៃប្រកួតប្រជែងជាងប្រទេសថៃសម្រាប់ទីផ្សារនៅចិន ដោយសារតែតម្លៃដឹកជញ្ជូនទាបតាមរយៈការប្រើប្រាស់ព្រំដែនគោក។
អ្នកសង្កេតការណ៍បាននិយាយថា ត្រីមាសទី២ នៃឆ្នាំនីមួយៗ គឺជារដូវកាលប្រមូលផលផ្លែទុរេនដ៏ធំបំផុតរបស់ប្រទេសថៃ ខណៈការរក្សាបានភាពជាប់លាប់នៃរសជាតិ និងការទទួលស្គាល់ម៉ាកយីហោផ្តល់ភាពទាក់ទាញបន្ថែមផងដែរ។ លោក លឹម ឈិន ឃី (Lim Chin Khee) ទីប្រឹក្សារបស់មជ្ឈមណ្ឌល Durian Academy ដែលស្ថាប័នបណ្តុះបណ្តាលអ្នកដាំដុះម៉ាឡេស៊ី បានអះអាងថា ការកើនឡើងចំណែករបស់ប្រទេសថៃក្នុងត្រីមាសទី២ អាចត្រូវបានសន្មត់ថាជាចម្បងដោយរដូវកាលទុរេនថៃ បណ្តាញពាណិជ្ជកម្មដ៏រឹងមាំ និងត្រូវបានបង្កើតឡើង និងការពេញចិត្តរបស់អ្នកទទួលទានលើផ្លែទុរេនថៃ អំឡុងពេលនេះ។
គួរឱ្យដឹងថា ប្រទេសចិន គឺជាប្រទេសទិញផ្លែទុរេនច្រើនជាងគេបំផុតនៅលើពិភពលោក ដោយបាននាំចូលរហូតដល់ ១.៤លានតោន កាលពីឆ្នាំ ២០២៣។ ដោយសារតែងប់ងល់នឹងរសជាតិផ្លែទុរេននេះហើយ ទើបបានជាប្រទេសមហាអំណាចសេដ្ឋកិច្ចធំលំដាប់ទី២ ពិភពលោកមួយនេះ ត្រូវបានគេដាក់រហស្សនាមថា «ស្តេចផ្លែទុរេន» ដោយអ្នកទទួលទានជាច្រើនចាត់ទុកទុរេនជាផ្លែឈើឆ្ងាញ់បំផុត ហើយថែមទាំងត្រូវបានផ្តល់ជាអំណោយដើម្បីអបអរឱកាសពិសេសដូចជា អាពាហ៍ពិពាហ៍ ជាដើម។
លោក Song Seng Wun ទីប្រឹក្សាសេដ្ឋកិច្ចនៃក្រុមហ៊ុនសេវាកម្មហិរញ្ញវត្ថុ CGS ដែលមានមូលដ្ឋាននៅប្រទេសសិង្ហបុរីបានលើកឡើងថា ផ្លែទុរេនថៃ នៅតែមានប្រជាប្រិយភាពខ្លាំងសម្រាប់ប្រទេសចិន ដោយសារតែរសជាតិកម្ររកបាន បើទោះបីជាផ្លែឈើដ៏កម្រនេះមានរសជាតិខុសៗប្លែកពីគ្នាយ៉ាងណាក៏ដោយ៕ (ប្រភព ៖ VnExpress)
ចែករំលែកព័តមាននេះ