អារ៉ាប៊ីសាអូឌីត ៖ កីឡាករបាល់ទាត់ឆ្នើមពិភពលោក Cristiano Ronaldo ទើបតែបានបើកដំណើរការឆានែលយូធូបរបស់ខ្លួនជាផ្លូវការ (YouTube’s Official Channel)។ ហើយគិតមកត្រឹមព្រឹកនេះ…
អារ៉ាប៊ីសាអូឌីត ៖ កីឡាករបាល់ទាត់ឆ្នើមពិភពលោក Cristiano Ronaldo ទើបតែបានបើកដំណើរការឆានែលយូធូបរបស់ខ្លួនជាផ្លូវការ (YouTube’s Official Channel)។ ហើយគិតមកត្រឹមព្រឹកនេះ មិនដល់២៤ម៉ោងផង មានអ្នកចុចតាមដាន ឬ Subscriber ជាង១១លាននាក់បាត់ទៅហើយ និងថែមទាំងបានបង្កើតកំណត់ត្រាមិនធ្លាប់មានក្នុងប្រវត្តិសាស្ត្ររបស់វេទិកាចែករំលែកវីដេអូអនឡាញដ៏ល្បីបំផុត នៅលើពិភពលោកមួយនេះ។
បើតាមប្រភពពីសាររព័ត៌មានធំៗជុំវិញពិភពលោក កាលពីថ្ងៃទី២១ ខែសីហា ឆ្នាំ២០២៤ កន្លងទៅ បានឱ្យដឹងថា ឆាណែលយូធូបថ្មីរបស់កំពូលខ្សែប្រយុទ្ធព័រទុយហ្គាល់ Cristiano Ronaldo ដែលមានឈ្មោះថា «UR · Cristiano» បានបង្ហោះវីដេអូលើកដំបូងកាលពីជាង១០ម៉ោងមុន កាលពីថ្ងៃទី២១ សីហា និងបានបង្កើតបំបែកកំណត់ត្រាថ្មីសន្លាំង ដែលមានអ្នកចុច Subscribe លឿនបំផុតមិនធ្លាប់មានពីមុនមក ពោលត្រឹមរយៈពេល៩០នាទីដំបូង អ្នកចុច Subscribe មានលើស១លាននាក់រួចទៅហើយ។ ហើយ៤ម៉ោងក្រោយមកទៀត ចំនួនបានកើនឡើងដល់ជាង៥លាននាក់ មុនពេលឈានដល់ជាង១១លាននាក់ នៅព្រឹកនេះ និងទទួលបានប៊ូតុងមាសរួចទៅហើយ។
ប្រធានក្រុមបញ្ចខែលព័រទុយហ្គាល់ ដែលកំពុងប្រកបអាជីពជាមួយក្លិប Al Nassr នៅលីគកំពូលអារ៉ាប៊ីសាអូឌីតវ័យ៣៩ឆ្នាំរូបនេះ ត្រូវបានចារឈ្មោះជាកីឡាករបាល់ទាត់ឆ្នើម និងល្បីល្បាញបំផុតមួយរូបនៅក្នុងពិភពកីឡា ដែលត្រូវបានចាត់ទុកថាជាកីឡាករបាល់ទាត់ដ៏អស្ចារ្យបំផុតគ្រប់ពេលវេលាផងដែរ។
ក្រៅអំពីសមត្ថភាពដ៏អស្ចារ្យ និងកំណត់ត្រាពិសេសជាច្រើនលើសមរភូមិវាលស្មៅ ហើយក៏ជាអ្នកជំនួញដ៏ជោគជ័យមួយរូបនោះ Ronaldo ក៏ជាបុគ្គមានអ្នកចុចតាមដានលើបណ្តាប្រព័ន្ធផ្សព្វផ្សាយសង្គមជាង៩០០លាននាក់ ដែលត្រូវបានកំណត់ជាបុគ្គលដ៏មានឥទ្ធិពលបំផុតលើអ៊ីនធឺណិតរួចទៅហើយ។ ប៉ុន្តែនៅពេលនេះ កីឡាករម្ចាស់ពានរង្វាន់ Ballon d’Or ៥សម័យកាលរូបនេះ បន្តបង្កើនប្រជាប្រិយភាពរបស់ខ្លួនបន្ថែមទៀតនៅលើអ៊ីនធឺណិត តាមរយៈការបើកដំណើរការឆាណែលយូធូបផ្លូវការរបស់ខ្លួន ដែលជាវេទិកាចែករំលែកវីដេអូអនឡាញដ៏មានប្រជាប្រិយភាពខ្លាំងបំផុតនៅលើពិភពលោក និងត្រូវបានគ្រប់គ្រងដោយក្រុមហ៊ុនបច្ចេកវិទ្យាខ្នាតយក្សអាមេរិក Google៕ (ប្រភព ៖ Forbes, Marca និង The Guardian)
ចែករំលែកព័តមាននេះ