រាជធានីភ្នំពេញ ៖ ជនសង្ស័យជាចោរឆក់ ២នាក់ បានធ្វើសកម្មភាពឆក់ម្ដងហើយ ម្ដងទៀត បានសម្រេចទាំង២លើក ត្រូវបានកម្លាំងនគរបាលព្រហ្មទណ្ឌខណ្ឌដង្កោ សហការណ៍ជាមួយកម្លាំងនគរបាលប៉ុស្តិ៍ដង្កោ ប៉ុស្តិ៍ព្រែកកំពឹស…
រាជធានីភ្នំពេញ ៖ ជនសង្ស័យជាចោរឆក់ ២នាក់ បានធ្វើសកម្មភាពឆក់ម្ដងហើយ ម្ដងទៀត បានសម្រេចទាំង២លើក ត្រូវបានកម្លាំងនគរបាលព្រហ្មទណ្ឌខណ្ឌដង្កោ សហការណ៍ជាមួយកម្លាំងនគរបាលប៉ុស្តិ៍ដង្កោ ប៉ុស្តិ៍ព្រែកកំពឹស និងប៉ុស្តិ៍រលួស ដេញស្ទាក់ចាប់បាន កាលពីវេលាម៉ោង៣និង១៥នាទីរសៀល ថ្ងៃទី២១ ខែសីហា ឆ្នាំ២០២៤នេះ ។
មន្ត្រីនគរបាល បានប្រាប់ឲ្យដឹងថា ជនសង្ស័យទាំង២នាក់នោះ រួមមាន ៖
ទី១. ឈ្មោះ មុន្នី អ៊ូខុង អាយុ១៧ឆ្នាំ មុខរបរមិនពិតប្រាកដ ស្នាក់នៅភូមិព្រែកទល់ សង្កាត់ស្ទឹងមានជ័យទី២ ខណ្ឌមានជ័យ ។
ទី២. ឈ្មោះ សូ វិច្ឆិកា អាយុ១៨ឆ្នាំ មុខរបរ និងទីកន្លែងស្នាក់នៅ មិនពិតប្រាកដ ។
មន្ត្រីនគរបាលបានប្រាប់ឲ្យដឹងបន្តទៀតថា នៅពុំទាន់បានសាកសួរលម្អិតនៅឡើយទេ ប៉ុន្តែនៅចុងក្រោយ ក្នុងពេលថ្មីៗនេះ មុននឹងត្រូវចាប់ខ្លួន ក្រុមជនសង្ស័យខាងលើនេះ បានធ្វើសកម្មភាពបានសម្រេចចំនួន២លើកផ្ទួនៗ ។ ក្នុងនោះលើកទី១ ជនសង្ស័យទាំងពីរនាក់នេះ ជិះម៉ូតូម៉ាកស៊ុយហ្ស៊ុយគីនិច ពណ៍ស ពាក់ស្លាកលេខ ភ្នំពេញ1KW-0953 ទៅធ្វើសកម្មភាពឆក់កាបូបលុយពីនារីរងគ្រោះម្នាក់បានសម្រេច ស្ថិតនៅតាមបណ្តោយផ្លូវផ្លូវ២១៧ សង្កាត់ដង្កោ ខណ្ឌដង្កោ រាជធានីភ្នំពេញ ដោយនៅក្នុងកាបូបនោះ មានលុយចំនួន៣០,០០០រៀល និងគ្រឿងអលង្ការ មួយចំនួន ។
មន្ត្រីនគរបាលរូបនោះ បានប្រាប់ឲ្យដឹងបន្ថែមទៀតថា បន្ទាប់ពីឆក់បានសម្រេចហើយ ជនសង្ស័យទាំងពីរនាក់ខាងលើ បានជិះម៉ូតូឌុបគ្នា មកធ្វើសកម្មភាពឆក់យកទូរសព្ទដៃ និងលុយពីស្ត្រីម្នាក់ទៀត នៅតាមបណ្តោយផ្លូវជាតិ ក្នុងសង្កាត់ព្រែកកំពិស ខណ្ឌដង្កោ ។ ដោយយកបាន ចំនួន១៦០,០០០រៀល ហើយភ្លាមៗនោះ ជនរងគ្រោះបានជិះម៉ូតូដេញតាមពីក្រោយ ព្រមទាំងស្រែកថា «ចោៗ» ធ្វើឲ្យជនសង្ស័យភ័យស្លន់ស្លោ បណ្តាលឲ្យដួលម៉ូតូ ។ បន្ទាប់មក បាននាំគ្នារត់ចោលម៉ូតូ ទៅសំងំចូលទៅក្នុងព្រៃ ក្នុងតំបន់ជិតកន្លែងកើតហេតុនោះ ហើយក៏ត្រូវបានកម្លាំងនគរបាល ធ្វើការឡោមព័ទ្ធចាប់ខ្លួនបានយកមកធ្វើការសាកសួរ និងចាត់ការតាមច្បាប់ ៕
ចែករំលែកព័តមាននេះ