ប្រទេសអាហ្សង់ទីន ៖ ប្រធានក្រុមបាល់ទាត់ជម្រើសជាតិអាហ្សង់ទីន លីអូណែល ម៉េសស៊ី (Lionel Messi) ដែលអវត្តមានលើទីលានប្រកួតដោយសាររបួសនោះ ត្រូវបានដកឈ្មោះចេញពីបញ្ជីក្រុមជម្រើសជាតិដែលត្រូវបានប្រកាសកាលពីថ្ងៃចន្ទដើមសប្តាហ៍នេះ សម្រាប់ការប្រកួតជម្រុះពានរង្វាន់…
ប្រទេសអាហ្សង់ទីន ៖ ប្រធានក្រុមបាល់ទាត់ជម្រើសជាតិអាហ្សង់ទីន លីអូណែល ម៉េសស៊ី (Lionel Messi) ដែលអវត្តមានលើទីលានប្រកួតដោយសាររបួសនោះ ត្រូវបានដកឈ្មោះចេញពីបញ្ជីក្រុមជម្រើសជាតិដែលត្រូវបានប្រកាសកាលពីថ្ងៃចន្ទដើមសប្តាហ៍នេះ សម្រាប់ការប្រកួតជម្រុះពានរង្វាន់ World Cup 2026 ប្រចាំតំបន់អាមេរិកខាងត្បូងនៅខែក្រោយ ដែលត្រូវប្រកួតជាមួយប្រទេសឈីលី និងកូឡុំប៊ី។
ប្រធានក្រុមអាហ្សង់ទីនវ័យ៣៧ឆ្នាំរូបនេះ ត្រូវបានចាកចេញពីបញ្ជីកីឡាករទាំង២៨នាក់ ក្រោមការដឹកនាំរបស់លោកគ្រូបង្វឹក Lionel Scaloni បន្ទាប់ពីរងរបួសកជើងអំឡុងពេលការប្រកួតវគ្គផ្តាច់ព្រ័ត្រពានរង្វាន់ Copa America កាលពីខែមុន នៅសហរដ្ឋអាមេរិក។ ខ្សែប្រយុទ្ធឆ្នើមក្រុម Inter Miami បច្ចុប្បន្នកំពុងសម្រាកព្យាបាលក្រោមការយកចិត្តទុកដាក់ពីក្រុមគ្រូពេទ្យក្លិប។
ក្រៅពីប្រធានក្រុម Lionel Messi ដែលជួយអាហ្សង់ទីនឈ្នះជើងឯកពានរង្វាន់ World Cup 2022 នៅប្រទេសកាតា អ្នកចាំទីអាហ្សង់ទីន Franco Armani របស់ក្រុម River Plate ក៏ត្រូវចាកចេញពីក្រុមផងដែរ ក្រោយប្រកាសចូលនិវត្តន៍ពីក្រុមជម្រើសជាតិ ដូចនឹងខ្សែប្រយុទ្ធសា្លប Angel Di Maria បន្ទាប់ពីការប្រកួតពានរង្វាន់ Copa America 2024 ដែលអាហ្សង់ទីនជាម្ចាស់ជើងឯក។
លោកគ្រូបង្វឹក Lionel Scaloni បានកោះហៅខ្សែបម្រើ Ezequiel Fernandez និងខ្សែប្រយុទ្ធ Valentin Castellanos ចូលក្រុមឈុតធំជាលើកដំបូង រួមជាមួយនឹងកីឡាករវ័យក្មេងពោរពេញដោយទេពកោសល្យមួយចំនួនរួមមាន Alejandro Garnacho, Valentin Carboni, Valentin Barco និង Matias Soule ។ ក្រុមពពកសអាហ្សង់ទីននឹងទទួលភ្ញៀវឈីលី នៅកីឡដ្ឋាន Monumental ស្ថិតក្នុងទីក្រុងប៊ុយណូស៊ែ (Buenos Aires) នៅថ្ងៃទី៥ ខែកញ្ញា ខាងមុខនេះ ពោលមុនពេលជួបជាមួយម្ចាស់ផ្ទះកូឡុំប៊ី ៥ថ្ងៃក្រោយ នៅក្នុងទីក្រុងបារ៉ាន់គីឡា (Barranquilla)។
គួរបញ្ជាក់ថា FIFA World Cup 2026 ប្រទេសកាណាដា ម៉ិកស៊ិក និងសហរដ្ឋអាមេរិក ទទួលធ្វើម្ចាស់ផ្ទះរួមគ្នា ជាមួយការបង្កើនចំនួនប្រទេសចួលរួមប្រកួតពី៣២ប្រទេស រហូតដល់៤៨ប្រទេស។ តាមការគ្រោងទុក ការប្រកួតនឹងចាប់ផ្តើមនៅថ្ងៃទី១១ ខែមិថុនា រហូតដល់ថ្ងៃទី១៩ ខែកក្កដា ឆ្នាំ២០២៦៕ (ប្រភព ៖ Reuters និង Daily Sabah)
ចែករំលែកព័តមាននេះ