ទីក្រុងហាណូយ៖ ថ្មីៗនេះ ប្រទេសវៀតណាមទើបតែទទួលរងការវាយប្រហារដោយគ្រោះរញ្ជួយដីខ្នាតតូចកម្រិត៤,២រ៉ិចទ័រនៅស្រុកកូនប្លុង (Kon Plong) ខេត្តកូនទុំ (Kon Tum) នៃភាគកណ្ដាល។ ហេតុការណ៍នេះកើតឡើងនៅម៉ោង១:០៥រសៀលដោយមានចំណុចចាប់ផ្ដើមពីស្រទាប់ផែនដីជម្រៅជាង៨គីឡូម៉ែត្រចុះទៅក្រោម។…
ទីក្រុងហាណូយ៖ ថ្មីៗនេះ ប្រទេសវៀតណាមទើបតែទទួលរងការវាយប្រហារដោយគ្រោះរញ្ជួយដីខ្នាតតូចកម្រិត៤,២រ៉ិចទ័រនៅស្រុកកូនប្លុង (Kon Plong) ខេត្តកូនទុំ (Kon Tum) នៃភាគកណ្ដាល។ ហេតុការណ៍នេះកើតឡើងនៅម៉ោង១:០៥រសៀលដោយមានចំណុចចាប់ផ្ដើមពីស្រទាប់ផែនដីជម្រៅជាង៨គីឡូម៉ែត្រចុះទៅក្រោម។ ក៏ប៉ុន្តែការរញ្ជួយដីនេះមិនបានបង្កគ្រោះថ្នាក់សូម្បីតែបន្តិច។
កាលពីពេលព្រឹកនៅថ្ងៃដដែលនោះមានគ្រោះរញ្ជួយដីកើតឡើង២ដងបន្តបន្ទាប់គ្នានៅក្នុងកម្រិត៣,៤រ៉ិចទ័រម្ដង និងកម្រិត៣,៨រ៉ិចទ័រម្ដងទៀត។ ការរញ្ជួយទាំង២ដងនោះមានចំណុចចាប់ផ្ដើមពីស្រទាប់ផែនដីជម្រៅជាង៨គីឡូម៉ែត្រដូចគ្នា។ ទីតាំងដែលកើតឡើងគឺកើតនៅស្រុកកូនប្លុង ខេត្តកូនទុំដដែល។ ការរញ្ជួយដីទាំង២លើកនោះមិនបានបង្កការខូចខាតទ្រព្យសម្បត្តិ និងអាយុជីវិតមនុស្សទេ។ គ្រាន់តែថានេះជាសញ្ញាបង្ហាញពីសញ្ញាចាប់ផ្ដើមនៃគ្រោះរញ្ជួយដីនៅក្នុងប្រទេសដែលពុំធ្លាប់កើតមានហេតុការណ៍នេះពីមុនមក។
អាជ្ញាធរសង្កេតឃើញថាចាប់តាំងពីឆ្នាំ២០២១រហូតមកដល់ពេលបច្ចុប្បន្ននេះ ប្រទេសវៀតណាមកើតមានការរញ្ជួយដីកាន់តែញឹកញាប់នៅស្រុកកូនប្លុង។ ខាងលើនេះជាការថ្លែងរបស់បណ្ឌិតង្វៀនសួនអាញ់ (Nguyen Xuan Anh) ជានាយកវិទ្យាស្ថានស្រាវជ្រាវអំពីផែនដីវិទ្យារបស់វៀតណាម។ លោកថ្លែងបន្តទៀតថាស្រុកកូនប្លុងនៃខេត្តកូនទុំនេះស្ថិតនៅលើតំបន់ជង្ហុកផែនដី។ ដូច្នេះ ឧស្សាហ៍កើតមានគ្រោះរញ្ជួយដីតូចៗ។ មានន័យថាយ៉ាងខ្លាំងបំផុតត្រឹមកម្រិត៥រ៉ិចទ័រតែប៉ុណ្ណោះ។
លោកសូមធានាថាថ្វីដ្បិតទីតាំងភូមិសាស្ត្រនេះអាចនឹងកើតមានគ្រោះរញ្ជួយដីញឹកញាប់នាពេលអនាគត ប៉ុន្តែអ្នកស្រុកនៅម្ដុំនេះមិនចាំបាច់ភ័យស្លន់ស្លោពេកទេព្រោះគ្មានគ្រោះថ្នាក់ចំពោះអាយុជីវិតមនុស្ស និងទ្រព្យសម្បត្តិ។ លោកសន្យាថាវិទ្យាស្ថានរបស់លោកនឹងបន្តធ្វើបច្ចុប្បន្នភាពជាទៀងទាត់ពាក់ព័ន្ធនឹងគ្រោះរញ្ជួយដីដើម្បីឱ្យអាជ្ញាធរមូលដ្ឋាន និងប្រជាជនបានជ្រាបជាព័ត៌មាន។
វិទ្យាស្ថានរបស់លោកនឹងបន្តតាមដានដោយយកចិត្តទុកដាក់ទៅលើបាតុភូតរញ្ជួយដីនៅតំបន់នោះ។ បណ្ឌិតង្វៀនសួនអាញ់បានផ្ដល់ជាឱវាទថានៅពេលកើតមានគ្រោះរញ្ជួយដីម្ដងៗ ប្រជាជននៅតំបន់រងគ្រោះគួរណាស់ប្រញាប់រំកិលខ្លួនទៅរកទ្វារដើម្បីចាប់កាន់ឱ្យជាប់ ឬមិនដូច្នេះទេគួរក្រាបចុះនៅខាងក្រោមតុបើពួកគេស្ថិតនៅក្នុងអគារដែលជាសំណង់រឹងមាំ។
បើពួកគេកំពុងនៅខាងក្រៅផ្ទះ ឬក្រៅអគារសុខៗស្រាប់តែមានគ្រោះរញ្ជួយដីកើតឡើង ពួកគេគួរណាស់ជៀសវាងឱ្យឆ្ងាយពីខ្សែភ្លើង និងបង្គោលភ្លើង ហើយគួរប្រញាប់រត់ទៅរកទីកន្លែងកណ្ដាលវាល។ បើពួកគេបើកបរឡាន-ម៉ូតូសុខៗស្រាប់តែមានគ្រោះរញ្ជួយដីកើតឡើង ពួកគេគួរខំប្រឹងបួងចង្កូតយានជំនិះរបស់ខ្លួនទៅចិញ្ចើមផ្លូវ។ រួចហើយឈប់ទ្រឹង១កន្លែងសិន៕
ចែករំលែកព័តមាននេះ