ប្រទេសកម្ពុជា នឹងមានអាកាសធាតុអាប់អួរខ្លាំង ចាប់ពីថ្ងៃទី២១ រហូតដល់ថ្ងៃទី៣១ ខែសីហានេះ។ ក្រសួងធនធានទឹក និងឧតុនិយម បានអះអាងនៅថ្ងៃទី២០ ខែសីហា ឆ្នាំ២០២៤…
ប្រទេសកម្ពុជា នឹងមានអាកាសធាតុអាប់អួរខ្លាំង ចាប់ពីថ្ងៃទី២១ រហូតដល់ថ្ងៃទី៣១ ខែសីហានេះ។
ក្រសួងធនធានទឹក និងឧតុនិយម បានអះអាងនៅថ្ងៃទី២០ ខែសីហា ឆ្នាំ២០២៤ បានអះអាងថា ស្ថានភាពវិវត្តនៃធាតុអាកាសនៅក្នុងតំបន់ជ្រលងសម្ពាធទាបមួយនឹងគ្របដណ្តប់លើសមុទ្រចិនខាងត្បូង ភាគកណ្តាលនៃអាងទន្លេមេគង្គ និងលើព្រះរាជាណាចក្រកម្ពុជា ហើយទន្ទឹមនឹងនេះ ខ្យល់មូសុងនិរតី ដែលបក់លើសមុទ្រ Andaman និងឈូងសមុទ្រថៃ នឹងបង្កើនឥទ្ធិពលខ្លាំងមកលើកម្ពុជា ធ្វើឲ្យអាកាសធាតុអាប់អួរខ្លាំង។
ប្រភពដដែល បានអះអាងថា ស្ថានភាពខាងលើនេះ នឹងបណ្តាលឱ្យកម្ពុជា ចាប់ពីថ្ងៃទី២១ ដល់ថ្ងៃទី៣១ ខែសីហា ឆ្នាំ២០២៤ មានភ្លៀងធ្លាក់គ្របដណ្តប់ស្ទើរទូទាំងប្រទេស និងមានកម្រិតកម្ពស់ខ្ពស់ជាង មធ្យមភាគច្រើនឆ្នាំនៅតំបន់មួយចំនួន រួមមាន ៖ តំបន់វាលទំនាប ខ្ពង់រាប មាត់សមុទ្រ ជួរភ្នំ និងតំបន់ភ្នំ។
ប្រភពដដែល បានអះអាងថា បាតុភូតទាំងនោះ នឹងធ្វើឲ្យតំបន់វាលទំនាបមានខេត្តបន្ទាយមានជ័យ បាត់ដំបង សៀមរាប ពោធិ៍សាត់ កំពង់ឆ្នាំង កំពង់ធំ កំពង់ចាម ត្បូងឃ្មុំ ព្រៃវែង ស្វាយរៀង កណ្តាល តាកែវ និងភ្នំពេញ, តំបន់ខ្ពង់រាបមានខេត្តកំពង់ស្ពឺ ប៉ៃលិន ឧត្តរមានជ័យ ព្រះវិហារ ស្ទឹងត្រែង ក្រចេះ រតនគិរី មណ្ឌលគិរី តំបន់ជួរភ្នំក្រវាញ និងតំបន់មាត់សមុទ្រមានខេត្តកោះកុង ព្រះសីហនុ កំពត កែប និងជួរភ្នំបូកគោ ទទួលភ្លៀងជោគជាំ ។
ប្រភពដដែល បានអះអាងថា នៅក្នុងស្ថានភាពនេះ រលកសមុទ្រ អាចមានកម្ពស់មធ្យមអប្បបរមា ០,៥០ម៉ែត្រ និងមធ្យមអតិបរមា ២,៥០ម៉ែត្រ។
នៅក្នុងស្ថានភាពបែបនេះ ក្រសួងបានជំរុញឲ្យមានការប្រុងប្រយ័ត្នខ្ពស់ ជាពិសេសតាមបណ្តាខេត្តដែលបានជម្រាបជូន អំពីស្ថានភាពធាតុអាកាសដូចជា ៖ ផ្គរន្ទះ ខ្យល់កន្ត្រាក់ ភ្លៀងខ្លាំង ដើម្បីជៀសវាងពីគ្រោះថ្នាក់ផ្សេងៗ ដែលអាចកើតមានឡើងជាយថាហេតុ។
ដោយ ៖ ស ផាន់
ចែករំលែកព័តមាននេះ