ខេត្តព្រៃវែង ៖ ផ្ទះឈើចំនួន០២ខ្នង ព្រមទាំងទ្រព្យសម្បត្តិជាច្រើន នៅក្នុងផ្ទះ សរុបជាទឹកប្រាក់ ប្រមាណជា២ម៉ឺនដុល្លារ ត្រូវបានអគ្គិភ័យឆាបឆេះអស់ទាំងស្រុង ត្រឹមតែរយៈពេលជាង ១ម៉ោង…
ខេត្តព្រៃវែង ៖ ផ្ទះឈើចំនួន០២ខ្នង ព្រមទាំងទ្រព្យសម្បត្តិជាច្រើន នៅក្នុងផ្ទះ សរុបជាទឹកប្រាក់ ប្រមាណជា២ម៉ឺនដុល្លារ ត្រូវបានអគ្គិភ័យឆាបឆេះអស់ទាំងស្រុង ត្រឹមតែរយៈពេលជាង ១ម៉ោង ប៉ុណ្ណោះ ។
គ្រោះអគ្គិភ័យនេះ បានកើតឡើងកាលពីវេលាម៉ោង១១ព្រឹក ថ្ងៃទី២០ ខែសីហា ឆ្នាំ២០២៤នេះ នៅត្រង់ចំណុចភូមិថ្មី ឃុំពាមមានជ័យ ស្រុកពាមរក៍ ខេត្តព្រៃវែង ។
ផ្ទះដែល ត្រូវភ្លើងឆេះនេះ ទី១-ជាប្រភេទផ្ទះឈើ ខាងក្រោមថ្ម មានទទឹង៦ម៉ែត្រ គុណនឹង ៩ម៉ែត្រ មានម្ចាស់ឈ្មោះ ថន ទិត្យ ភេទប្រុស អាយុ៤៦ឆ្នាំ។ ចំណែកផ្ទះទី២-ជាប្រភេទផ្ទះឈើដូចគ្នា មានទទឹង ៦ម៉ែត្រ គុណនឹង ៩ម៉ែត្រដូចគ្នា មានម្ចាស់ឈ្មោះ សួន សុខា ភេទស្រី អាយុ៦៤ឆ្នាំ ។
តាមការរៀបរាប់របស់ម្ចាស់ផ្ទះទី១ លោក ថន ទិត្យ បានបញ្ជាក់ថា ភ្លើងឆាបឆេះដំបូង គឺឆេះចេញពីផ្ទះមីង សុខា រួចឆ្លងរាលមកផ្ទះគាត់ទៀត ហើយគាត់ ក៏បានឃើញភ្លើងឆេះឆ្លងចូលផ្ទះដែរ តែម្តាយគាត់ចាស់ជរា កំពុងដេកលើគ្រែ ក្រោមផ្ទះ ដូច្នេះហើយគាត់ ត្រូវបីម្តាយរត់ចេញរកកន្លែងសុវត្ថិភាពសិន ពេលត្រឡប់មកវិញ ភ្លើងឆាបឆេះពេញផ្ទះទៅហើយ ទើបមិនអាចចូលប្រមូលទ្រព្យសម្បត្តិក្នុងផ្ទះបាន ។
ចំណែកលោក គង់ ផុន អាយុ៦៣ឆ្នាំ ជាម្ចាស់ផ្ទះទី២ បានអោយដឹងថា មុនពេលកើតហេតុ គាត់ដេកលើអង្រឹងក្រោមផ្ទះ លុះលង់លក់១សន្ទុះដឹងខ្លួនវិញ ភ្លើងបានឆេះពេញផ្ទះទៅហើយ ទើបមិនអាចធ្វើអ្វីបាន បានត្រឹមស្រែកហៅអ្នកជិតខាង អោយជួយ ។
ដោយឡែក ខាងសមត្ថកិច្ចវិញ បានអោយដឹងថា ក្រោយពេលកើតហេតុភ្លាម អ្នកស្រុកជិតខាងបានប្រើម៉ាស៊ីនបូមទឹក ៣គ្រឿង ជួយបាញ់ទឹកពន្លត់ ហើយកម្លាំងអធិការស្រុក បានប្រើឡានទឹក ៣គ្រឿង បាញ់ទឹកពន្លត់អស់ទឹក៣ឡាន ដោយប្រើប្រាស់ពេលវេលាជាង១ម៉ោង ទើបអណ្តាតភ្លើង ត្រូវបានពន្លត់ជាស្ថាពរ ។
សមត្ថកិច្ច បានបញ្ជាក់ថា គ្រោះអគ្គិភ័យនេះ មិនបានបណ្តាលអោយមានមនុស្សសត្វរងគ្រោះទេ ដោយគ្រាន់តែឆេះផ្ទះអស់ ២ខ្នង សរុបការខូចខាតជាទឹកប្រាក់ ប្រមាណជាង២ម៉ឺនដុល្លារ ដែលមូលហេតុ គឺបណ្តាលមកពីឆ្លងចរន្តអគ្គិសនីនៅក្នុងផ្ទះ ៕
ចែករំលែកព័តមាននេះ