ទីក្រុងបាងកក ៖ ក្រុមប្រឹក្សាអូឡាំពិកអាស៊ី (OCA) កាលពីថ្ងៃទី១៩ ខែសីហា ឆ្នាំ២០២៤ បានបញ្ជាក់ជាផ្លូវការថា ការប្រកួតព្រឹត្តិការណ៍ពហុកីឡាអាស៊ីក្នុងសាល និងយុទ្ធគុនលើកទី៦…
ទីក្រុងបាងកក ៖ ក្រុមប្រឹក្សាអូឡាំពិកអាស៊ី (OCA) កាលពីថ្ងៃទី១៩ ខែសីហា ឆ្នាំ២០២៤ បានបញ្ជាក់ជាផ្លូវការថា ការប្រកួតព្រឹត្តិការណ៍ពហុកីឡាអាស៊ីក្នុងសាល និងយុទ្ធគុនលើកទី៦ ឬ Asian Indoor and Martial Arts Games (AIMAG) ដែលគ្រោងនឹងរៀបចំនៅទីក្រុងបាងកក និងទីក្រុងឈុនបុរី ខេត្តឈុនបុរី ប្រទេសថៃ ចាប់ពីថ្ងៃទី២១ ដល់ថ្ងៃទី៣០ ខែវិច្ឆិកា ឆ្នាំ២០២៤ ត្រូវបានលុបចោល។ នេះបើតាមការចេញផ្សាយពីកាសែតបាងកកប៉ុស្តិ៍។
តាមការប្រកាសរបស់លោក គង់សក្តិ យ៉តម៉ានី (Gongsak Yodmani) អភិបាលអាជ្ញាធរកីឡាថៃ (SAT) កាលពីល្ងាចថ្ងៃចន្ទដើមសប្តាហ៍នេះថា ស្ថាប័នគ្រប់គ្រងកីឡារដ្ឋាភិបាលថៃទទួលបានអ៊ីមែលបន្ទាន់ពីក្រុមប្រឹក្សាអូឡាំពិកអាស៊ី ដែលបញ្ជាក់ថា ព្រឹត្តិការណ៍ពហុកីឡា Asian Indoor and Martial Arts Games ត្រូវលុបចោលជាផ្លូវការ។ ក្រោមហេតុផលខ្វះមូលនិធិរៀបចំ ក៏ដូចជាខ្វះពេលវេលាមុនពេលចាប់ផ្តើមការប្រកួត ដែលជាហេតុផលឈានដល់ការលុបចោលព្រឹត្តិការណ៍នេះ។ លោក គង់សក្តិ បន្ថែមថា នោះហើយជារបៀបដែលអ្វីៗកើតឡើងនៅពេលនេះ ប៉ុន្តែក្រុមប្រឹក្សាអូឡាំពិកអាស៊ី នៅតែផ្តល់ឱកាសបើកចំហសម្រាប់ថៃ ដើម្បីរៀបចំព្រឹត្តិការណ៍មួយនេះ នាពេលអនាគត។
អ៊ីមែលរបស់ក្រុមប្រឹក្សាអូឡាំពិកអាស៊ី ផ្ញើមកដល់ចំពេលអភិបាលអាជ្ញាធរកីឡាថៃ កំពុងប្រជុំបន្ទាន់ពិភាក្សាអំពីបញ្ហាថវិកាសម្រាប់រៀបចំការប្រកួត នៅទីស្នាក់ការកណ្តាលរបស់ខ្លួន កាលពីល្ងាចថ្ងៃចន្ទដើមសប្តាហ៍នេះ។ ហើយរបាយការណ៍ចេញផ្សាយលើគេហទំព័រក្រុមប្រឹក្សាអូឡាំពិកអាស៊ីបញ្ជាក់ថា គណៈកម្មាធិការរៀបចំការប្រកួតថៃ មិនអាចបំពេញតាមលក្ខណៈវិនិច្ឆ័យដែលបានស្នើសុំក្នុងកិច្ចសន្យានៃទីក្រុងម្ចាស់ផ្ទះ ដោយកាលបរិច្ឆេទចុងក្រោយនៅថ្ងៃច័ន្ទទី១៩ ខែសីហា ឆ្នាំ២០២៤។
ការសម្រេចចិត្តត្រូវបានធ្វើឡើង បន្ទាប់ពីរបាយការណ៍ទីក្រុងម្ចាស់ផ្ទះ ដែលបានបង្ហាញទៅកាន់មហាសន្និបាតក្រុមប្រឹក្សាអូឡាំពិកអាស៊ីលើកទី ៤៣ នៅទីក្រុងបាងកក កាលពីថ្ងៃទី១១ ខែឧសភា ឆ្នាំ ២០២៤ ដោយគណៈកម្មាធិការរៀបចំបានសន្យាថា តម្រូវការការប្រកួតទាំងអស់នឹងរួចរាល់ នៅខែកក្កដា ឆ្នាំ២០២៤ ប៉ុន្តែទីបំផុតបរាជ័យ។ ហើយនៅក្នុងក៏បានព្រមព្រៀងឯកច្ឆ័ន្ទ អំឡុងពេលកិច្ចប្រជុំបន្ទាន់របស់ក្រុមប្រឹក្សាប្រតិបត្តិ OCA កាលពីថ្ងៃព្រហស្បតិ៍សប្តាហ៍មុន ដើម្បីលុបចោលព្រឹត្តិការណ៍នេះ ដរាបណាអ្នករៀបចំបានបំពេញលក្ខខណ្ឌចំនួន ៩ ដែលត្រូវការដើម្បីធានាការធ្វើជាម្ចាស់ផ្ទះ។ ដូច្នេះជាមួយលទ្ធផលនេះ ក្រុមប្រឹក្សាអូឡាំពិកអាស៊ី ឬ OCA គ្មានជម្រើសអ្វីផ្សេងក្រៅពីការលុបចោលព្រឹត្តិការណ៍នេះទេ។
គួររំលឹកថា ការប្រកួតព្រឹត្តិការណ៍ Asian Indoor and Martial Arts Games លើកទី៦ ត្រូវបានកំណត់កាលបរិច្ឆេទឡើងវិញ នៅថ្ងៃទី ២១ដល់ថ្ងៃទី៣០ វិច្ឆិកា ឆ្នាំ២០២៤ បន្ទាប់ពីត្រូវបានពន្យារពេលជាច្រើនដង ដោយសារការរីករាលជំងឺកូវីដ១៨ និងបន្ទាប់មកមានការផ្លាស់ប្តូររដ្ឋាភិបាលនៅក្នុងប្រទេសថៃ។
ការអះអាងថា រដ្ឋាភិបាលថៃខ្វះថវិកាដើម្បីធ្វើជាម្ចាស់ផ្ទះរៀបចំព្រឹត្តិការណ៍នេះ ត្រូវបានប្រកាសលើកដំបូង កាលពីសប្តាហ៍មុន ដោយលោក ឆៃយ៉ាប៉ាក់ សីរីវ៉ាត់ (Chaiyapak Siriwat) អនុប្រធានគណៈកម្មាធិការជាតិអូឡាំពិកថៃ ក្នុងតួនាទីជាប្រធានគណៈកម្មាធិការរៀបចំ Asian Indoor and Martial Arts Games។ ហើយលោកក៏ជាអ្នកលើកឡើងអំពីការសម្រេចចិត្តរបស់ម្ចាស់ផ្ទះថៃ ដកកីឡា១៤ប្រភេទចេញ កាលពី៣ខែមុន ដែលបង្កភាពចលាចលដល់ភាតរភាពកីឡាអាស៊ី៕ (ប្រភព ៖ បាងកកប៉ុស្តិ៍)
ចែករំលែកព័តមាននេះ